Sa cida sulcitana Dae su 10 su 16 de Maju
Cida passada in custa rubrica emus iscritu chi is traballos in sa SS 126 chi fiant tirende a longu meda e chi custu podiat causare problemas mannos de tràficu. Ebbenis su 14 de maju su responsàbile locale de s’ANAS at firmadu s’ordinàntzia de pròroga de is traballos pro àteros 2 meses. Duncas is traballos in su ponte chi est a s’intrada de Carbònia iant a deper acabare su 22 de mese de argiolas. Custa no est una nova bona pro su territòriu e su consilieri regionale de su PSdAz Fabio Usai at dimandadu a s’assessore regionale a is trasportos de intervènnere cun s’ANAS pro chi coitint a acabare.
Una nova interessante pro is chi sunt iscritos a sa biblioteca de Igrèsias: infatis s’amministratzione comunale at comporadu, in bia isperimentale, un’edìcola virtuale chi si aciungit a su servìtziu de imprèstidu de 2 e-book a su mese e a is audiolibros pro is chi tenet problemas de vista. Duncas dae mèrcuris sunt a disponimentu de is letores giornales e rivistas de argumentos diversos in 62 lìnguas. Pro gosare de custu servìtziu bastat a andare a biblioteca pro otènnere is credentziale de atzessu e iscarrigare sa app “PressReader” in su computer o in su telefoneddu.
D’istade est arribende e mancai is prospetivas de is operadores non siant bonas (isperant de sarvare su mese de cabudanni) in Sant’Antiogu ant incumentzadu a allichidire is àreas birdes, is pràgias e ant incumentzadu a nche pònnere is passerellas de linna. In prus sa pràgia de Maladroxa, pro su de tres annos de sighiu, at a tènnere sa bandiera asulla. Pro otennere custu reconnoschimentu de prestìgiu mannu, dadu dae s’organizatzione internatzionale “Foundation for Environmental Education”, no bastat chi s’àcua siat “lìmpia”, ma si tenent in cunsideru puru àteros fatores comente sa sustenibilidade ambientale e s’atzessibilidade a is servìtzios. Su sìndigu Nàssiu Locci est cuntentu meda e at nadu ca custu resurtadu est istadu possìbile gràtzias a sa collaboratzione de is ufìtzios comunale cun is assòtzios de volontariadu chi dònnia annu si impegnant in sa pràgia.
Cenàbara in Bidda Massàrgia ant presentadu unu servìtziu nou chi est atirende s’interessu de is mèdias internatzionales: est s’agriniu e s’agriasilu, unu progetu de educatzione ecològica incarreradu dae s’amministratzione comunale cun s’istitutu cumprensivu “F. Meloni” e s’asilu niu comunale “Rosa Parks” chi destinadu a is pipios de de 0 a 6 annos, chi ponet impari s’ecologia e sa pedagogia. In prus is autoridades presentes ant mandadu una lìtera a sa ministra de sa famìlia E. Bonetti dimandende su sustegnu a is servìtzios in favore de sa pipiesa in una zona chi est sunfrende meda sa denatalidade.
Custa cida sunt “sceti” 4 is algerinos chi sunt arribados in su Sulcis. Domìniga a meigama sa GdF ddos at intertzetados in mare e nche-ddos at acumpangiados e su portu de ponti e dae innias nche-ddos ant incarrerados a su tzentru de collidura de Muristenis pro is sòlitas protzeduras de identificadura e de espulsione.
Dae chi su Carbonia Calcio aiat otentu sa sarvesa sigura s’est dimìtidu s’allenadore Marco Mariotti e David Suazo, ex atacante de su Casteddu, at leadu su postu suo. Suazo at decraradu chi est bènnidu a allenare in Carbònia pro portare entusiasmu e at incumentzadu bene: s’iscuadra sua at paregiadu 2 a 2 in su campu de Santadi contras a s’Arzachena.
Agiornamentu de sa situatzione covid dae su territòriu. A pustis de su trèulu mannu de cida passada, ant torradu a abèrrere giae totus is iscolas (abarrant in DAD sceti is classes in ue ant agatadu positivos) e si isperat chi cun su sistema de prenotatzione de Poste Italiane, chi est ativu de cenàbara, totu su sistema funtzionit prus bene. Fintzas is residentes, dae 16 annos a innantis, de Caleseda e Sant’Antiogu (e puru is chi ddoe traballant) ant a partecipare a sa campagna de vacinatzione de massa prevèdida pro is ìsulas minores italianas. Sa campagna dd’at a incarrerare s’Esèrcitu cun sa collaboratzione de sa retza Ad Adiuvandum. S’at a protzèdere in òrdine alfabèticu e is comunos ant a donare comunicatzione de is datas e de is oràrios.
Pro su chi pertocat s’ispainadura de su cuntàgiu in su territòriu paret chi is datos si siant istabilizados. In Igrèsias nc’at 90 positivos; nd’abarrat 16 in S. G. Suèrgiu; 17 in Gonnesa; 8 in Bugerru (cun totus is iscolas serradas); 6 in Frùmini Majori; 3 in Portescusi; 2 casos in Villaperùciu. Chini iscriet no at agatadu datos de Carbònia.
Seus intrados in zona groga e podent torrare a abèrrere bar, ristorantes, museos e logos de cultura ma a comente semper depeus sighiere a donare atentzione manna a rispetare is règulas de distantziamentu sotziale e de igene. Abarrade sanos!
Roberto Pinna
