Sa cida sulcitana in curtzu. Dae su 17 a su 23 de Maju
Aici a comente bolet sa traditzione, su lunis a pustis de s’Ascensione, in Tratalias ant afestadu a Maria Munserrada, Reina de su Sulcis e Patrona de sa diocesi nostra. S’annu passadu pro more de sa pandemia no aiant fatu su pellegrinàgiu, ocannu invècias dae sa Seu de Igrèsias nc’ant lòmpidu, in manera discreta, sa Santa a sa crèsia de su brugu nou. Infatis pro rispetare is protocollos anticovid no est bènnidu bene a tzelebrare sa missa sulenne chi at prèsiedidu s’obispu nostru mons. G.P. Zedda (trasmìtida in Facebook e in televisione) in sa crèsia bècia. Fatu istat ca su prexu de is trataliesos e de is àteros fideles de su Sulcis de Bàsciu fiat mannu a su pròpiu sende chi ant torradu a bìere e a pregare sa Patrona insoru “de persona”.
Mèrcuris su cantante Mahmood (binchidore de su festival de Sanremo2019) fiat in Antas e in Piscinas pro ggirare is immàgines de su videoclip nou cosa sua. Invècias in Tratalias ant incumentzadu is seletziones pro is cumparsas de su film de “Il Milanese Imbruttito” chi est unu pàgina satìrica populare meda in Facebook e chi at a èssere prodùsiu dae sa Medusa Film e at a èssere giradu in parte in su brugu bèciu. Custas sunt produtziones de livellu artu meda chi siguramente ant a agiudare a fàere connoschere totu su territòriu de sa Sardigna sudocidentale.
Cenàbara in Carbònia unas cantu consilieris comunales de opositzione e unu grupu de tzitadinos si sunt atobiados de fronte a se sea locale de s’AREA e ant torradu a dimandare chi sa sienda regionale pongat unu dirigente fissu chi arrispundat a lestru a is istàntzias chi arribant dae Carbònia e dae totu su Sulcis.
In Sant’Antiogu invècias in conferèntzia streaming ant presendu su progetu “Isola dei Tesori - Museo diffuso isola di Sant’Antioco”: est unu sèrie de atziones a caràtere turìsticu e culturale (cartellonìstica interativa, su situ visitsantantioco.info e una guida turìstica noa) fatas gràtzias a sa collaboratzione de is giòvanos chi ant fatu su Servìtziu Tzivile (annualidades 2019/2020 e 2020/2021).
In Igrèsias invècias s’est arriscada una tragèdia manna: un’òmine de 47 at donadu un’istichida da caciavite a sa gorguenna de una picioca de 25 annos in su cavalcaferrovia de Serra Perdosa. Pròpiu in su momentu fiat passende unu mezu de is pompieris chi sunt intervènnidos e ant sarvadu sa picioca chi imoi est ricoverada a s’uspidale Brotzu de Casteddu. Sa Politzia est arribada prontamente e at firmadu s’òmine chi fiat giae connotu a is Fortzas de s’Òrdine.
Ant annuntziadu is datas de is 2 festivals musicale prus importantes de su Sulcis.
Dae su 21 a su 24 de mese de argiolas s’at a fàere sa de 31 editziones de su Narcao Blues in sa sea naturale de Pratza Europa. Invècias dae su 31 de austu a su 4 de cabudanni s’at a fàere sa de 36 editziones de su festival “Ai confini tra Sardegna e Jazz” chi at a èssere dedicadu a sa memòria de su fundadore Basilio Sulis chi ocannu tenet pro tema s’arribu in Atlantide: sa Sardigna no est prus sceti unu logu de passàgiu e de atòbiu de pòpulos e culturas ma puru una destinatzione disigiada. A giru de unu mese is assòtzios Progetto Evoluzione e Punta Giara ant a presentare su programma pretzisu e is òspites de ocannu.
Agiornamentu de sa situatzione covid-19. Sa campagna de vacinatzione est sighende bene in logu nostru, e ant abertu puru is prenotatziones pro is chi sunt nàschidos fintzas a su 1981. In Carloforte custu fine de cida passadu ant vacinadu su 90% de is residentes cun prus de 16 annos, invècias sa vacinatzione de massa pro is residentes e is traballadores fissientes de is comunos de Sant’Antiogu e Caleseda s’at a fàere dae su 28 de maju a su 2 de làmpadas e at a interessare unas 10.000 personas. Is operatziones s’ant a fàere in su palàtziu de s’isport de Sant’Antogu e is sìndigos de is duos comunos isulanos ant cumbidadu is residentes a chircare s’agiudu de is dotores de famìlia pro chi is ischedas de anamnesi siant bene cumpiladas a manera si potzat fàere a lestru.
A bellu a bellu paret chi su cuntàgiu, assumancus castiende is ùrtimos datos disponìbiles, siat firmende-sì. Infatis in Igrèsias is positivos sunt 41 (sceti duas cidas a coa fiant a 3 bortas), abasciant ancora is casos in Domunosa e in S.G. Suèrgiu (4 e 9 positivos), artziant a 8 in Portescusi e a 5 in Villaperùciu; est artu meda su datu de Gonnesa cun 42 positivos; S.A. Arresi invècias est torrada zeru. Custa cida puru nisciunu datu dae Carbònia.
Tocat semper a donare atentzione e a rispetare is normas de distantziamentu sotziale e de igene. Abarrade sanos!
Roberto Pinna
