Sa cida sulcitana in curtzu. Dae su 5 a s’11 de mese de argiolas
No arribant novas bonas pro su chi pertocat su Geoparco. S’assessora regionale a s indùstria Anita Pili at arrispùndidu a s’interrogatzione de s’onorevole Michele Ennas (Lega) e at annuntziadu chi su Ministeru de sa Transitzione Ecològica (ex Ambiente) at incarreradu s’iter burocràticu pro su commissariamentu de s’Ente. A parre de Ennas custu fatu ammostrat in manera crara chi custu ente, chi iat a deper essere fundamentale pro sa funtzione de coordinamentu de s’isvilupu, est funtzionende male meda e chi sunt medas is episòdios chi in is ùrtimos annos ddu testimòngiant: a cumentzare dae sa pèrdida de su reconnoschimentu de s’Uneso e is cunflitos intr’e is organos de su parcu etotu. Sa presidèntzia de s’Ente narat ca su commissariamentu de siguru no est sa manera de risòlvere is problemas e arregordat totus is problemàticas chi ant dèpidu afrontare in is annos passados e chi s’Ente at incarreradu una programmatzione manna partecipende a bandos diferentes in su setore pùbblicu e privadu.
Su 7 de mese de argiolas ant fatu sa premiatzione de sa de XXVIII editziones de i Comuni Ricicloni, una manifestatzione organizada dae Legambiente. Ocannu puru ant premiadu su Comunu de Santu Giuanni Suèrgiu, chi est unu de is pagos comunos sardos chi tenet unu produtzione de sicu/procapite prus bàscia de 75 kilos. De siguru custu est unu bellu resurtatu otentu gràtzias a is polìticas incarreradas dae s’Amministratzione Comunale e ma su meressimentu prus mannu est de is tzitadinos chi rispetantant in manera pretzisa totus is normas pro seberare is refudos.
Semper su 7 de mese de argiolas ant presentadu in Igrèsias unu pianu nou pro bonìfica de su ludu arrùbiu de Monteponi. Su sìndigu de Igrèsias Mauro Usai at nadu chi su camminu at a èssere longu meda ma chi est est giai incumentzadu in is laboratòrios de Monteponi aundi sunt traballende is circadores. Sunt prevèdidos passos diferentes a cumentzare dae un’istrutura pilota a intrus de sa s’ex ZIR chi s’at a ocupare de isperimentatzione industriale. Ma su primu problema de afrontare est de natura burocràtica: infatis nc’at su vìnculu paesagìsticu e tocat a dimandare a sa sopraintendèntzia de nde-ddu bogare. Luigi Mansi, AD de su grupu internatzionale Solmar (chi traballat in su setore de sa chìmica) at ispiegadu chi su protzessu no at a prodùsere iscartos e nemancu immissiones est duncas est torrat pretzisu cun is diretivas europeas in materia de impreu integrale de is prodotos chi arribant dae àteros tziclos produtivos aprovadas cun su recovery plan.
No abastaiat su problema de unas milla personas chi sunt sena de dotore de famìlia in Santadi e Villaperùciu – cun s’assessoradu regionale chi at arrispùndidu chi cumprendent su problema ma tocat chi is residentes andint a che is dotores chi traballant in is biddas de acanta chentze però de ispiegare a comente podent fàere is antzianos solos e sena de vetura a si mòvere – imoi s’est ischìpidu chi in su comunu de S.A.Arresi non benit bene a ativare su servìtziu de guàrdia mèdica turìstica. Sa motivatzione est uguale: no nc’at dotores e duncas is turistas e fintzas is residentes podent contare sceti a pitzus de su servìtziu de guàrdia mèdica ordinària chi funtzionat dae is 20.00 a is 08.00 e su fine de cida dae is 10 de sàbudu fintzas a is 8 de lunis. De siguru custu fatucun is traballos firmos in sa SS126 acanta de Is Gannaus (custu fin’e cida puru si sunt formadas fileras de màchinas longas una pariga de kilòmeteros a s’ora de andare e de torrare dae mare) no est unu bellu billetu de bìsita de ammostrare a is turistas chi benint in fèrias in logu nostru.
Ant tentu unu sotzessu bonu de pùbblicu s’Anteprima de su Narcao Blues: dae giòbia a sàbudu ant sonadu 6 grupos internatzionales in pratza Europa chi fiat prena in totus is postos disponìbiles e, a su chi paret, at a tènnere sutzussu bonu su puru su Festival (21-25 de mese de argiolas) sende chi ant giae bèndidu totus is abonamentos. Est andada bene puru sa de ses editziones de Rosso in Miniera aundi is ex minadores de Rosas ant fatu de ghias pro is bisitadores chi a pustis ant pòtzidu tastare is mellus produtziones de binu locale.
Custa cida chi benit si faet una manifestatzione de importu: is ispetàculos de dantza “Alati senza quota” chi sunt parte de sa manifestatzione Sardigna Dance, cun sa regia de Barbara Martini s’ant a fàere dae su 16 a su 18 de mese de argiolas, in sa necròpoli de Montessu, in su Tèmpiu de Antas e in sa pratza de su forte de Su Pisu in Sant’Antiogu. S’ispàssiu pro is amantiosos de sa dantza moderna est prus che assiguradu.
Pro su chi pertocat s’ispainadura de su covid-19, chini iscriet custa rubrica no at prus agatadu datos e duncas ancora una borta nisciuna nova est nova bona. Abarrade semper atentos e semper sanos!
Roberto Pinna
