NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
17
Sun, Oct
25 Nuovi articoli

Sa cida sulcitana in curtzu, Dae su 12 a su 18 de mese de argiolas

Novas in Sardu (LSC)
Aspetto
Condividi

Sa cida sulcitana in curtzu, Dae su 12 a su 18 de mese de argiolas

Lunis a chitzi mannu sa Guàrdia Costera est dèpida intervènnere pro tragare una barchita cun 8 algerinos (nche fiant puru 2 fèmminas cun 2 pipios) chi aiat ispaciadu sa benzina e fiat bordigende a-i largu de Cabu Teulada. A s’acabada ddos fatos isbarcare a su portu cummertziale de Sant’Antiogu e a pustis sa Politzia nche-ddos at lòmpidos a su tzentru de collidura de Muristenis.


Semper lunis, ma a merie,su Consìliu Comunale de Carbònia at cunfèrridu sa Citadinàntzia onorària a Liliana Segre e at intregadu a is parentes de Modesto Melis, iscampadu a su lager de Mauthausen, un’ atestadu de benemerèntzia proite chi at passadu is ùrtimos annos de sa vida sua portende in is iscolas sa testimonia de su dramma chi at bìvidu issu etotu impari a miliones de personas chi fiant presoneris in is campos de cuntzentramentu nazistas.


Su Carbonia Calcio cun d-unu comunicadu at fatu ischire chi est rischende de non partecipare a su campionadu de fuba de sèrie D. Su problema est su de s’annu passadu etotu: s’istàdiu Zoboli est serradu dae su mese de donniassantu pro su dèpidu chi sa sotziedade tenet cun s’Amministratzione Comunale. Is chi faent parte de sa Commissione comunale de Controllu e Garantzia at fatu apellu pro chi s’amministratzione agatit una solutzione. S’assessore a s’isport V. Piria at arrispùndiu chi non benit bene a cuntzèdere un’isturutura isportiva a un’assòtziu chi tenet dèpidu cun su Comunu (fatu cunfirmadu puru dae una sentèntzia de su TAR) e chi su Consìliu Comunale in su mese de martzu at mudadu su regulamentu comunale pro cuntzèdere una pròroga pro pagare. Su dirigente de su servìtziu isport at donadu 30 dies de tempus pro chi s’assòtziu isportivu abèrrat una fideiussione bancària chi fatzat de garantzia a su dèpidu e de prus non si podet fàere proite su dirigente comunale riscat de cummìtere dannu erariale e siguramente at a donare parre negativu a calesisiat àtera proposta.


Cenàbara a merie su sìndigu de Igrèsias Mauro Usai e impari a s’assessora a sa cultura Claudia Serra at incingiadu su MuMiSa (su Museu de Mineralogia Sardu) in s’Istitutu Mineràriu Asproni e s’àula magna chi ant dedicadu a Quintino Sella. Duncas in Igrèsias nc’at una prenda in prus (su MuMiSa tenit una de is colletziones de minerales prus mannas de totu s’Itàlia) de mostrare a is amantiosos de sa geologia chi si podet trasformare in atrativa pro su turismu culturale.


Custu fine de cida puru is piròmanes si sunt ispassiados. Sàbudu est partidu unu fogu in sa zona de Is Toneddus in comunu de Santadi chi ispintu dae su bentu estu chi fiat sulende a forte fiat impunnende conca a su padente de Pantaleu. S’interventu lestru e imponente de is mezos aèreos (3 elicoteros e 1 canadair) e de is iscuadras a terra (Guàrdia Forestale, is volontàrios de su GEV de Nuxis e de sa ProCiv de Santadi e S.A. Arresi) at sarvadu ancora una borta sa foresta de ìlighe prus manna de totu s’Europa. Fogu puru acanta de Is Pillonis (S.A.Arresi) e in Bruncu Tèula (S.G.Suèrgiu) aundi sunt intervènnidos is Pompieris de Carbònia pro nde istudare sa pampa chi at brusiadu campos de istua sena de fàere dannu meda.


Ant otentu unu sutzessu de importu 4 atletas de sa Old School Gym de Santadi: infatis Beatrice Palazzi, Cristina Mocci, Battista Casti e Enrico Palombo (allenadore e atleta) in Sàrdara ant bintu su tìtulu italianu e si sunt cualificados a is campionados mondiales de powerlifting (ispetzialidade de fortza chi prevedit de nde pesare cantu prus pesu si podet cun d-una ripetzione sceti) chi s’ant a fàere in Valledoria in su mese de Cabudanni. Ispantosa meda sa prova de Beatrice Palazzi: at artziadu 62.5 kilos in sa panca piana e 120 kilos de istacu dae terra istabilende su record de categoria. Cunsiderande chi custa picioca tenet sceti 21 annos is prospetivas de ammelliorare sunt mannas meda.


Su covid-19 est torrende a cùrrere puru in Sardigna e a pustis de cidas chi non si comunicaiat nudda su sìndigu de Carbònia at fatu ischire chi nc’at 16 positivos in prus (nde fiant abarrados 2 sceti). Siguramente sa campagna de vacinatzione est faende brofetu – su 90% de is chi sunt ricoverados non sunt immunizados – ma su perìgulu, cunsiderande chi una parte manna de is chi sunt prus a riscu (dae 60 annos a innantis) po calincuna resone no at fatu mancu una dose de vacinu, no est passadu ancora. Duncas depimus sighire a abarrare atentos a rispetare su distantziamentu sotziale istransende is atrupèlios de gente e is règulas de igene. Abarrade sanos!


Roberto Pinna