NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
30
Fri, Sep
19 Nuovi articoli

Sa cida sulcitana in curtzu Dae su 19 a su 25 de mese de argiolas

Novas in Sardu (LSC)
Aspetto
Condividi

Sa cida sulcitana in curtzu Dae su 19 a su 25 de mese de argiolas

Mèrcuris 21 in Roma in sa sea de su Ministeru de sa Transitzione Ecològica ant fatu riunione pro commissariare su Geoparco ma su presidente de s’ente, Tarcisio Agus, dae chi at ispiegadu totu is crititzidades e est arrinnèschidu a otènnere unu rinviu. Agus at fatu sa proposta de crèschere sa dotatzione orgànica de s’ente e in prus at faeddadu de sa reforma giurìdica de su Geoparco chi a pustis de 20 annos de s’istitutzione no est ne “ente” de chirca e nemancu unu “parcu”: duncas sa reforma est netzessària pro incumentzare a pònnere òrdine in sa màchina burocràtica.

Giòbia 22 s’assessora regionale a su traballu Alessandra Zedda at atobiadu a is diretziones de s’ASPAL, de sa Sider Alloy e is sindacados pro afungudare sa chistiones de is traballadores de s’ex ALCOA. S’idea est de aprontare a lestru unu pianu de formatzione professionale chi arrispundat a is esigèntzias de sa sienda pro is 364 traballadores chi imoi sunt in mobilidade in dèroga. Su pianu de formatzione de su personale depet èssere su primu passu pro chi sa cunferèntzia de servìtzios in ue s’at a arresonare de su revamping (prevèdida su 28 de custu mese) tengat un’èsitu positivu, ma pro imoi sa sienda at fatu ischire chi no est in cunditziones de podet firmare sa partèntzia noa.

Dae giòbia passadu sa sala de letura e sa sala de istùdiu de sa Biblioteca Comunale de Igrèsias ant torradu a abèrrere a is utentes (dae lunis a cenàbara, dae is 9:00 a is 13:00 e dae is 15:30 a is 19:00). Est permìtidu s’intrada a grupos de istùdios de 10-13 personas (tocat a a prenotare telefonende a su nùmeru 078141795) in oràrios diversos e est pretzisu a rispetare totus is normas de cuntrastu a s’ispainadura de su covid-19.

Dae custu fin’e cida nd’ant tròcidu su semàfuru in sa SS126 acanta de Is Gannaus. Is traballos non sunt acabados: a pustis de is protestas de gente meda e lìteras a su prefetu, s’ANAS at sceti tramudau totus is ainas e su materiale a sa parte de sa pista ciclàbile permitende, assumancus pro su mese de austu, de tènnere su dòpiu sensu de circulatzione e duncas non s’iant a deper formare prus is fileras de veturas longas 3km e prus. Is traballos ant a torrare a incumentzare in su mese de cabudanni isperende chi no serbant àteros 6 meses pro ddos acabare.

Dae cenàbara est torra operativu is infopoint turìsticu de Masainas (in sa biblioteca comunali pròpiu in mesu de bidda) e dae cida chi benit torrat a abèrrere puru su de S.A. Arresi (in Porto Pino). Siguramente su de abèrrere infopoint pro donare informatziones a is turistas est una cosa bona, ma iat a èssere mellus si totus is comunos de sa zona de su Sulcis de Bàsciu si ponessint impari pro custu servìtziu a manera de ismenguare is costos e de assigurare una comunicatzione prus pretzisa e funguda. Pro imoe, a su chi contant is operadores, paret chi s’istasone siat andende bastante bene, cun nùmeros prus artos cunfronta a s’annu passadu. Si torrat a bìere puru unu "pillixeddu" de turistas frantzesos chi in is annos passados aiant fatu aumentare de meda su nùmeru totale de is presèntzias turìsticas. S’ispera de totus est chi funtzionint is mesuras de cuntenimentu adotadas dae su Guvernu pro firmare su covid-19 e chi non si torrit prus a tancare atividades.

In su mentris su covid-19 est torrende a cùrrere in manera fisiològica. A pustis de is 16 casos de cida passada de Carbònia si-nde sinnialant àteros in Teulada (1), S.A. Arresi (2), Domunosa (3), Gonnesa (3) e Portescusi (7). Siguramente sa situatzione est mellus cunfronta a s’ierru passadu, sa campagna de vacinatzione est faende brofetu ma su perìgulu, massimamente pro is chi non sunt ancora vacinados, no est passadu ancora. Duncas tocat a sighire a donare atentu mannu a istransire is avollotos e a rispetare is normas de igene. Abarrade sanos!

Roberto Pinna.