NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
18
Mon, Oct
25 Nuovi articoli

Sa cida sulcitana in curtzu. Dae su 26 de mese de argiolas a su 1 de Austu

Novas in Sardu (LSC)
Aspetto
Condividi

Sa cida sulcitana in curtzu. Dae su 26 de mese de argiolas a su 1 de Austu

Mèrcuris s’est ispaciadu Luciano Ottelli chi est istadu diretore de minieras e de sotziedades mineràrias pùbblicas e privadas chi fiat istimadu meda dae is traballadores de su setore. Ottelli, geòlogu de formatzione, est istadu puru dotzente universitàriu, diretore de su Geoparcu, e autore de pubblicatziones de importu mannu a pitzus de s’istòria e de sa cultura minerària.

Semper mèrcuris is sìndigos de s’Unione de is Comunos de su Sulcis ant fatu una riunione istraordinària pro arresonare a pitzus de is agiudos de mandare a sa popolatzione de su Montiferru chi est patende s’iscònciu mannu causadu dae su fogu mannu de su fin’e cida passadu. Is sìndigos ant domandadu de lassare a una parte s’emotzione e de ddos cuntatare pro organizare is viàgios – massimamente serbint mangime, ballones de foràgiu e retza pro torrare a fàere is serros pro su bestiàmine – in coordinamentu cun sa Protetzione Civile e is amministratziones locales chi sunt afrontende problemas mannos de logìstica sende chi sa parte prus manna de is magasinos e de is ricoveros de su bestiàmine sunt distrutos. Is chi bolent mandare dinari ddu podent fàere ma pro istransire trufas est mellus a castiare is sitos ufitziales de is amministratziones comunales interessadas.

Sa cida sulcitana in curtzu. Dae su 26 de mese de argiolas a su 1 de Austu A s’acabada su Carbonia Calcio s’est iscritu a su campionadu de fuba de serie D. S’amministratzione comunale de Carbònia no at firmadu su nulla osta pro sa cuntzessione de s’istàdiu Zoboli, sende chi est abertu unu cuntentziosu cun s’assòtziu isportivu, e duncas s’est agatada una solutzione cun s’amministratzione de Silìcua e est pròpiu me inias chi at a giogare s’iscuadra minerària. In su mentris ant cunfirmadu David Suazo allenadore pro 2 annos: s’ex atacante de su Casteddu aiat ghiadu s’iscuadra in is ùrtimas 6 partidas de s’istasone passada dae chi si fiat dimìtidu Marco Mariotti a sarvesa giae sigura, otenende resurtados discretos (1 binta, 3 parègios e 2 pèrdidas).

Cenàbara 30, a pustis de 23 annos, in Sant’Antiogu ant torradu a abèrrere a su pùbblicu sa necròpoli pùnica e s’acròpoli romana. Custas àreas sunt postas praticamente in mesu de su tzentru istòricu e dae pagu ant tentu interventos de recùperu e nc’ant postu puru suportos didàticos modernos. Pro custa istade si podent bisitare dònnia die dae is 09:00 a is 19:00 a incuru de sa cooperativa Archeotour chi gestit totu su polu museale santantioghesu.

Bona parte de is amministratziones comunales de su Sulcis de Bàsciu sunt incarrerende s’apaltu pro sa gestione assotziada de sa regorta seberada de s’àliga. Infatis is cunsìlios comunales de Villaperùciu, Nuxis, Giba, Masainas, Piscinas, Tratalias e Perdaxus sunt pro aprovare (o dd’ant fatu giae) sa cunventzione chi prevedit su passàgiu de sa gestione dereta a s’Unione de is Comunos de su Sulcis a manera de criare economia de iscala e otènnere rispàrmios pro is tzitadinos e prus pagu traballu pro is ufìtzios comunales.

Est acabadu unu mese de argiolas calente meda, cun su bent’e sole chi at portadu ùmidu e a at fatu artziare is termòmetros a giru de 40 grados. Duncas is cunditziones de su mare fiant perfetas pro is isbarcos de is clandestinos: custu fin’e cida sunt arribadas 70 personas in is pràgias de is Domus de Maria, de Teulada, de Porto Pino e calincuna barchita dd’at tragada a terra sa Guàrdia Costera. Comente dònnia borta is Fortzas de s’Òrdine nche-ddos ant lòmpidos a su tzentru de collidura de Muristenis pro is protzeduras de identificadura e de espulsione.

Sighit a si ispainare su covid-19. Si sinnianalant casos in Giba (4), in Narcau (4 positivos a su molecolare e àteros 10 positivos a s’antigènicu), in Bidda Massàrgia (7), artziant a 21 is positivos in Portescusi. Depeus sighire a rispetare is normas de igene e de distantziamentu sotziale circhende de istransire is atrupèllios de gente e oberende sa mascaredda dònnia borta chi non podeus mantènnere sa distàntzia de unu metru dae is àteras personas. Abarrade sanos!

Roberto Pinna