Nc’at problemas mannos a sa Portovesme srl chi est s’ùnica fàbbrica de su polo industriale de Portovesme in atividade: su prètziu de s’energia, chi at aumentadu a 2 bortas in s’ùrtimu perìodu e fintzas de sa matèria prima, est ponende a riscu sa produtzione de sa lìnea de su zingu e duncas lunis sa sienda at detzìdidu de ativare sa protzedura propedèutica pro is ammortizadores sotziales pro unos 600 traballadores de is lìneas chi arrichedint prus energia. Davide Garofalo, chi est s’amministradore delegadu at nadu chi isperat chi in calincuna manera si abascit su prètziu de s’energia, e is sindacados ant otentu dae sa sienda de anticipare is traballos de manutentzione chi fiant prevèdidos a manera chi custa situatzione cumplessa no dda paghint de su totu is traballadores.
Is primus dies de cida passada ant acabadu de insediare is consìlios de is comunos sulcitanos elìgidos su 10 e s’11 de custu mese. Setziadas trancuilllas in Bugerru, Gonnesa e Domunosa, calincuna iscòria de campagna eletorale in Santu Giuanni Suèrgiu, in Perdaxus s’opositzione at cuntestadu sa legitimidade s’eletzione de unu membru de sa magiorantza proite chi, a parre insoru, candu at atzetadu sa candidadura fiat giai consilieri in d-un’àteru comunu e non s’est dimìtidu in tempus.
In Carbònia dae chi sunt passadas 3 cidas dae su trionfu suo, Pietro Morittu no at ancora presentadu sa giunta: no est ancora arrinnèschidu a agatare s’acòrdiu cun is rapresentates de totus is 6 listas chi dd’ant sustènnnidu: is postos in giunta sunt 6 prus sa presidèntzia de su consìliu comunale e sa de sa SO.MI.CA, ma is rechestas e aspiratziones de is grupos e sa “cuota rosa” (depent intrare in giunta assumancus 3 fèmminas) faent sa tratativa difìcile.
Giòbia in s’ispidale Sirai ant torradu a manifestare is nefropàticos de s’assòtziu APENT e unas cantu ant rinuntziadu a fàere sa dialisi. Impari a is malàdios (90 in totu chi ant fatu sit in foras de su repartu) ddoi fiant puru is consilieris regionales elìgidos in su Sulcis e unas cantu sìndigos e amministradores de su territòriu. Is rapresentantes de s’ APENT ant fueddadu cun su commissàriu istraordinàriu de sa ASSL de Carbonia G. Casu e sa diretora de is presìdios sulcitanos sa dotora G. Gregu. Sa chistione est sa sòlita: non bastat su personale (ammancant 8 unidades e sunt aumentados is patzientes) e cust’orta is malàdios bolent rispostas pretzisas pro is esigèntzias insoru – sende ca sa diàlisi est terapia sarva-vida e su repartu de Carbònia est un’ecellèntzia natzionale – o su nùmene de chini depet torrare custas scedas.
At fatu ispantu mannu sa morte violenta de Alessio Madeddu, su mere de s’ititurismu Sabor’e Mari de su Portu Bèciu de Teulada. Madeddu aiat pigadu nomenada manna candu aiat partecipadu a sa trasmissione de Alessandro Borghese “4 ristoranti” ma s’annu passadu aiat tentu problemas mannos cun sa giustìtzia: dd’aiant cundennadu a 8 annos de presone proite chi aiat tentadu de bochire 2 carabineris a ruspa pustis chi custos nde-dd’aiant pigadu sa patente ca fiat guidende imbriagu. Madeddu fiat iscontende sa pena a is arrestos domiciliares in d-una domu chi abarrat acanta de su ristorante etotu e dd’ant agatadu isderrigadu in terra giòbia a mangianu chitzi. A primu note is Carabineris, dae chi ant controlladu is filmados de is telecàmeras de siguresa, ant arrestadu un’òmine residente in S.A. Arresi chi at cunfessadu su delitu: a su chi paret custu non podiat baliare su fatu chi sa mulleri, chi traballada in su ristorante, essit inghitzadu una relatzione cun Madeddu etotu.
