Lunis est arribada finas a sa televisione e a is òrganos de imprenta natzionale su contu de Paolo Nocco (74) e Regina Pinna (71), ambaduos de Perdaxus, chi fiant isposos a piciocheddos piticos e chi si sunt torrados a atobiare a pustis de 55 e ant detzìdidu de si cojatr in su municìpiu de sa bidda insoro. Narant ca su primu amore non si iscaresset mai e issos ant cunfirmadu ca est berus… Augùrios bellos e chi tengat prexu e salude a comente disigiant!
Martis is sìndigos de su Sulcis ant atobiadu, a chini in presèntzia a chini in collegamentu vìdeu, s’assessore regionale a sa sanidade Carlo Doria. Custu atòbiu s’est fatu a pustis de sa lìtera de is primàrios de is ispidales sulcitanos chi domandaiant de tancare unas cantu repartos de su CTO pro assigurare is servìtzios de anestesia e rianimatzione sende chi amancat su 30% de su personale e benit male meda a acarrargiare totus is turnos. Parit chi ormai sa solutzione a totus is problemas siat s'ispidale ùnicu e duncas s’assessore at dimandadu a is sìndigos si pònnere de acòrdiu a pitzus de su logu aundi s’at a fraigare s’istrutura nou e duncas sa chistione est totu in is manos de is primos tzitadinos de su logu nostru ma est craru ca est difìcile meda chi si agatit una solutzione cumpartzida. Infatis Bidda Massàrgia s’est giai fatu a innantis unas cantu annos a coa – gràtzias a sa positzione “istratègica” at permìtere de fàere lòmpere gente puru dae su Campidanu ma custa idea non praghet a is chi bivint in su Sulcis de Bàsciu e nemancu a is carboniesos e carlofortinos – e siguramente Igrèsias no at a bòllere rinuntziare a unu presìdiu istitutzionale chi at tentu dae semper. In su mentris creschet sa chèscia de sa gente comuna chi narat ca su problema no est de “istruturas”, ca incapas nd’at fintzas tropu, ma de personale chi sighit a mancare. Siguramente si is sìndigos, chi s’ iant a deper atobiare luegus, no agatant unidade a pitzus de una chistione fundamentale sa detzisione at a èssere leada in Casteddu.
In su mentris chi in S.A. Arresi sighint is polèmicas pro sa pràgia de Porto Pino bruta (comente chi sa pala marina firma non siat cosa chi eus connotu semper in cussu tretu de litorale) e pro su prètziu artu meda de su parchègiu, s’Amministratzione Comunale at cumbidadu totus is assòtzios locales a fàere propostas pro aprontare unu calendàriu de eventos chi ant s’ant finantziare segundu sa disponibilidade econòmica. Invècias in Masainas ant presentadu su programma insoru, chi pro èsser fatu in d-una bidda de pagu prus de 1300 residentes est mannu de diaderus: sunt prevèdidos in totu, a cumentzare dae s’1 de mese de argiolas e fintzas a su 2 de cabudanni, sa bellesa de 30 eventos: si partit dae is rassignas gastonòmicas e si arribat a is presentadas de libros cun is tapas , passende pro is giogos pro is pipios, is ballos sardos in pratza e sa mùsica jazz in s’oru de mari.
Est arribada s’istade, e a pustis unas cantu dies de basca manna meda e bent’e sole a cumentzu de cida, parit chi sa temperadura si siat istabilizada a giru de 30 grados. E paris cun s’arribu de s’istade is sòlitos male intragnados incumentzant a si ispàssiare atachende fogos. E infatis domìnigu a meigama in sa zona de s’istatzione de Carbònia sunt dèpidas intervènnere is iscuadras de sa Protetzione Civile de Carbònia, sa Forestale e is Pompieris chi cun s’agiude de s’elicòteru de Marganai nd’ant istudadu sa pampa e nc’ant passadu totu su merie a bonificare sa zona.
At tentu unu bellu sutzessu de pùbblicu sa de 25 editziones de sa Rassigna artìstica e artisanale chi depiant fàere su mese passadu ma chi ant rinviadu pro mori de su tempus male. Infatis fiant giai 100 is artisanos e is siendas chi ant cuncordadu parada e s’est bistu unu bellu pillu de gente (locales ma si sunt bistos puru foresos e istràngios meda), passillende de bonu merì, in is arrugas de Sa Costera.
GIORNALE
a cura di Roberto Pinna
