In su mentris chi creschet sa polèmica polìtica a intrus e a foras de su Consìliu Regionale in Casteddu, cun bona parte de sa magiorantza chi cuntestat sa proposta de su presidente Solinas de fraigare 4 istruturas noas (e a cantu parit sunt giai prontos is incàrrigos pro is istùdios de fatibilidade), est arribada una proposta pro s’ispidale ùnicu de su Sulcis. S’assessora a is polìticas sotziales de Igrèsias, Angela Scarpa, at avantzadu s’idea de imperare s’ex ricòveru Casa Serena. Però su sìndigu deSant’Antiogu, Nàssiu Locci, at fatu presente ca no est iscritu in perunu logu chi depat èssere su “territòriu” a istabilire aundi s’at a fàere s’istrutura noa e duncas, si diaderus non boleus sunfrire detzisiones, mancai dannàrgias, leadas in àteros logos benit a marolla chi totus is rapresentantes de su logu nostru, dae is amministradores a is partes sotziales, si pongant de acòrdiu.
S’Amministratzione Comunale de Carbònia at annuntziadu 11 garas de apaltu pro su valore de unos 20 miliones de èuros de fundos chi arribant dae su PNRR. Prus de sa metade sunt cuntzentrados in s’àrea de sa Grande Miniera de Serbariu pro dda torrare a funtzionalidades noas, su restu sunt traballos in is iscolas tzitadinas e in òperas de viabilidade urbana.
Mèrcuris sunt torrados a arribare algerinos in su Sulcis. Cust’orta is Carabineris de Teulada ant firmadu 21 personas a pagu tretu dae sa pràgia de Porto Pino. Comente semper, a pustis de is bisitas mèigas, nche-ddos ant lòmpidos a su tzentru de collidura de Muristenis pro incarrerare is protzeduras de identificadura e de espulsione.
In Perdaxus ant incumentzadu a isgavare in s’àrea de su cumplessu de su nuraghe Camboni, chi abarrat a pagu tretu de su tzentru de sa bidda. Su diretore de is traballos – chi s’ant cuntzetrare a giru de sa zona de su putzu sacru – est s’archeologu Nicola Dessì chi est persona connota e istimada dae is amantiosos de s’archeologia sende chi at iscritu libros e partetzipadu a medas trasmissiones televisivas e radiofònicas.
In Portescusi ant aprovadu su bilànciu de previsione 2023. Su documentu balit 23 miliones de èuros e s’amminstratzione comunale est resèssida a no aumentare is tributos locales. Calincunu si chesciat ca est trigadiu meda pro s’aprovatzione de su bilànciu de previsione sende ca ormai prus de metade de annu est giai passada e benit male a programmare praticamente calisisiat interventu, e s’opositzione – chi at votadu contras – at fatu presente ca ammancat su dinai de is tassas de unas cantu siendas de su polo industriale e ca est firmadu dae unu dirigente chi tenet siat s’àrea tècnica siat s’àera contàbile.
In Igrèsias incumentzant, in bia isperimentale pro 5 meses, is bisitas ghiadas a pagamentu in d-unas cantu crèsias de su tzentru istòricu. Est prevèdidu chi is turistas, acumpangiados dae is ghias de Iglesiasturismo chi sunt istadas formadas in sa facultade de Teologia de Casteddu, potzant intrare a bìere Sa Seu, sa Purissima, Nostra Sennora de is Gràtzias, Santu Franciscu e Santu Dòmini, e in prus ant poder ammirare is espositziones de su Museu Diocesanu. Su tour ghiadu su si podet prenotare on line o inderetura a s’ufìtziu comunale de su turismu, e s’acòrdiu intr’e Comunu e Diocesi prevedit ispartzire is intradas a mesu a pari (su costu est de 10 èuros a persona).
In Piscinas puru est incumentzadu (su primu de mese de argiolas) su programma de is eventos istadiales. Sunt prevèdidos ispetàculos de cabaret e cuntzertos cun artistas de livellu natzionale, manifestatziones enogastonòmicas e presentadas de libros cun tanti de isponsorizatzione is retzas sotziales. In medas in sa zona de su Sulcis de Bàsciu ant osservadu a comente su contributu de sa RAS – nd’estus chistionau in custa rubrica etotu in su mese de friàrgiu – siat istadu fundamentale pro cuncordare unu programma chi est mannu de diaderus pro una bidda chi non arribat a 900 residentes e chi de siguru no est connota pro èssere logu “turìsitcu”.
a cura di Roberto Pinna
