Sa nova bona de custa cida est chi custus martis passadu at torradu a fàere àcua. At pròpidu bene pro una bella pariga de oras e a logos at ghetadu a istrossu causende allagamentos in Carbònia e Sant’Antiogu. Est craru chi àcua nde serbit ancora meda: is digas de is logus nostrus ormai sunt isbòidas totu (in su lagu de Monte Pranu sunt torrados a essire a pillus is nuraghes e is tumbas de is gigantes) e in su mentris is padentes de is montes nostros sunt sighende a sunfrire: a tretos ampros is matas si sunt sicadas a unu puntu chi parit ddoe siat passada una corria de fogu.
E semper martis in Masainas est acabada sa festa dedicada a Nostra Sennora de sa Salude. Aici sunt acabadas totus is festas de “piatza” e de “campagna” chi funt incumentzadas in su mesi de abrili cun sa festa manna dedicada a Sant’Antiogu. Totus e is 5 dies de festa tzivile ant tentu unu bonu resurtadu de pùbblicu, cun is arrugas de su boddeu chi fiant prenas de gente pro is prutzessiones chi ant fatu domìnigu e lunis a merie, fatu chi testimongiat s’istima de is sulcitanus pro custa Santa.
Mèrcuris est acabadu Sulcis Explora, un eventu finantziadu dae su Geoparcu e organizadu dae sa retza de impresas Visit Sulcis cun sa collaboratzione de 7 comunos de su Sulcis de Bàsciu. Sun bènnidos 8 giornalistas e influencers internatzionales chi ant bisitadu is bellesas archeològicas e naturalìsticas de sa zona e ant tastadu is sabores prus sintzillos de su territòriu e imoi, doniunu isfrutende sa ispetzializatziones sua, ant a prodùsere materiale diferente pro fàere pubblitzidade a unu territòriu chi tenet abisòngiu de esser promòvidu in manera unitària pro chi su turismu s'isvilupit de diaderus.
Giòbia in sa sala de su consìliu comunale de S.A. Arresi prena a intipu de gente Alberto Minissi at presentadu sa circa stòrica a pitzus de Henry Piercy, grandu impresàriu britànnicu e amantiosu de su mare, chi in su 1902 iat comporadu totus is terras in sa zona de Porto Pino, incarrerendi is òperas de bonifica de sa zona e fraighende s’istradone chi collegat sa localidade balneare cun su popolau de Arresi e pesendindi una villa in istili inglesu in mesu de propriedade. De chi Piercy si fiat mortu in su 1929 in unu incidente aèreu sa mulleri aiat bèndidu totu e aici totu sa sienda, dae chi aiat cambiadu meres unas cantu bortas e dd’iant ismenguada pro mori de 2 espròprios istatales, fiat intrada in possessu de sa famìlia Corridori chi aiat incumentzadu a fàere investimentos in su setore de su turismu e ancora oe allogat un’archìviu prenu documentos pretziados pro totu s’istòria de su territòriu.
Cenàbara Alessandro Garau e Natascia Muscas in sa sala consialiari de Masainas ant presentadu s’òpera insoru “Unu pipiu malu e àterus contus”, una regorta de contos orrorosos iscrita totu in sardu campidanesu. Is contos, bene cuncordados de diaderus, movende dae sa realidade de dònnia die cassant su letore chi no ddos at a iscapare bàsciu chi at lìgidu s’ùrtima riga. S’òpera est interessante meda proita ca est sa primu de su genere horror iscrita in sardu e si lighet cun fatzilidade gràtzias a una sintassi lèbia chi est isprigu de sa dinàmica lestra de is atziones. In prus is autores cumbidant su letore a arresonare a pitzus de sa chistione, lassendi-dda aberta, de aundi passat sa làcana, non semper crara, intrus de su chi est bene e de su chi est male.
At tentu unu sutzessu mannu meda sa de 30 editziones de “Puliamo il mondo” in Carbònia: infatis intr’e istudentes, assòtzios e lìberos tzitadinos prus de 2.000 personas ant pigau parte s’initziativa promòvida dae Legambiente in totu su territòriu comunale. Sunt cuntentos meda de su resurtadu is amministradores chi fiant punnende a sensibilizare su mundu de is giòvunos a su rispetu e a s’amparu de s’ambiente a manera de donare esèmpiu cuncretu de sensu tzìvicu e istima pro sa tzitade.
Roberto Pinna
