Apustis de sa mareta nàschida pro is eletziones regionales de su mese de friàrgiu passadu, in sa magiorantza de tzentru manca de Igrèsias est torrada sa paghe. Infatis innantis de su pàsusu pro is festas is consilieris ant elìgidu a Matteo Demartis a presidente de su consìliu comunale chi anadat a si sètzere in sa cadira chi fiat de Alessandro Pilurzu (intradu consilieri regionale e dimìtidu). Demartis at otentu in totu 23 votos (fiant in 2 is ausentes), pighendi-nde 3 fintzas dae s’opositzione e paris at espressadu sa delusione sua s’ex candidadu a sìndigu de FdI Luigi Biggio ca s’est chesciadu pro su fatu chi ormai a fàere opositzione e a propònnere alternativas pro sa tzitade sunt abarrados sceti in duos.
Dae su 23 de mese de idas ant torradu a abèrrere sa SP 2, chi collegat sa zona su Sulcis cun su Campidanu de Bàsciu e Casteddu. S’istrossa de àcua de su 27 de mese de ladàmine passadu nd’iat pigadu unu pontinu e fiat bènnidu a marolla a tancare s’istradone dae su casteddu de Àcuafrida (aundi ingruxat cun sa SS 293) e duncas a totus is chi beniat dae Carbònia/Bidda Massàrgia e dae su Sulcis de Bàsciu ddis beniat a marolla a passare dae sa SS 130. Podeus nàrrere chi cust’orta sa Provìntzia de su Sud Sardigna at traballadu bene e a lestru e aici is chi andant e torrant dae Casteddu arrisparmiant 10 km de tretu e, a segunda de s’oràriu, fintzas 20 minutos de ora.
In is dies a giru de Paschixedda at fatu at fatu s’ierru, pretzisu a su chi coscestus fintzas a pagos annos a coa: custu at guastadu is ispetàculos, dedicados massimamente a is prus minoreddos, chi teniant cuncordados in dònnia comunu. Fatu istat ca su tempus s’est torradu a cuncordare pro s’acabbu de s’annu e duncas at tentu sutzessu mannu meda at tentu s’ispetàculu de su DJ Gabry Ponte chi at fatu a manera chi, mancai fessit una note frida meda, in su campu isportivu de Bidda Massàrgia si pinighessint giai 10mila personas, medas lòmpidas gràtzias a is trenos ispetziales aprontados dae Trenitalia. Cunsiderende chi in totu s’Ìsula fiat prenu de eventos cun artistas mannos, est andadu bastante bene su cuntzertu de Le Vibrazioni e Il Pagante (pratza Sella prena a metade) chi at organizadu su comunu de Igrèsias cun su contributu de sa RAS.
In is ùrtimas dies de s’annu sa crisi de su Polo industriale de Portovesme est artziada a is crònacas de is tg natzionales: sunt calados is ministros Urso e Calderone (Indùstria e Traballu) chi ant criticadu sa detzisione de sa sienda de tancare in antìcipu sa lìnnia de su zingu, mancai pargiat chi nche siant operadores econòmicos prontos a intrare e a sighire sa produtzione. Totus is rapresentantes de sa polìtica, de is sindacados e is amministradores locales ant criticadu su scioberu de is meres isvìtzeros de sa Glencore chi, cosa chi si narat dae annos meda, at arritzidu unu muntone de dinari pùbblicu e si nche andat lassende in su disisperu unu muntone de operàios e is famìlias insoru ma assigurat ca su progetu pro sa produtzione de lìtiu at a andare a innatis. In su mentres, mancai sa fàbrica de allumìniu primàrgiu firma dae su 2012 e comporada dae Sider Alloys in su 2018, trigat a torrare a partire: s’investimentu totale est de 150 miliones de èuros (cun bona parte de dinari pùbblicu) ma a su chi parit nc’at problemas cun sa su protzessu de eletròlisi e fortzis serbit àteru dinari. Pro s’acabbu de custu mese ant cunvocadu àteras riuniones in Roma intr’e RAS, Guvernu e sienda cun is sindacados chi sunt prontos a torrare a fàere partire sa mobilitatzione de is operàios.
Acabbadas is festas cun s’Epifania, o sa Pasca de is Tres Gurreis in is sardu, chi ant bistu sa Befana donende ispàssiu a mannos e minores in biddas medas, in custas ùrtimas dies at torradu a fàere unu pagheddu de àcua. Mancai su livellu de is digas apat crèschidu sa situatzione abarrat drammàtica: is indicadores de istadu in totu sa Sardigna narant ca seus acanta de intrare in fase de emergèntzia duncas est craru ca si non proet bene in custos meses de ierru at a bènnere a marolla a serrare s’àcua pro dda risparmiare e custu at a causare problemàticas pro s’agricoltura e pro su turismu.
Roberto Pinna
