Domìgu 13 ant acabbadu de abèrrere is crèsias giubilares de sa diocesi nostra. Infatis s’amministradore apostòlicu su card. Arrigo Miglio at “obertu” in manera simbòlica fintzas sa genna de crèsia de Santu Pontzianu de Carbònia chi fiat prena de pellegrinos. S’annu giubilare est incumentzadu su 24 de mese idas passadu in sa basìlica de Santu Perdu in Roma e pro sa voluntade espressada de su cardinale Miglio, in prus de Santu Pontzianu, ant a èsser crèsias giubilares non solu is basìlicas diocesanas (sa Seu de Igrèsias, Maria Munserrada in Tratalias e sa basìlica de Sant’Antiogu) ma fintzas sa crèsia de Maria de Ìtria in Portescusi e sa crèsia de Valverde in Igrèsias.
Martis a mengianu in sa caserma Trieste de Igrèsias is 463 scientes de su de 143 cursos formativu pro Carabineris efetivos ant fatu giuramentu de fronte a is cumandantes insoru, a is autoridades tziviles e religiosas e a is parentes insoru. A s’acabu de sa tzerimònia, a comente bolet sa traditzione, is babbos e is mamas an postu is mustrinas a is divisas de is fillos insoru.
Giòbia is 23 sìndigos sulcitanos in sala polifuntzionale de pratza Roma in Carbònia ant atobiatu s’assessore regionale a sa programmatzione Giuseppe Meloni e s’assessore a s’indùstria Emanuele Cani. S’iscopu de s’atòbiu fiat de acrare sa situatzione chi pertocat is fundos destinados a su territòriu chi si agatant in su Piano Sulcis (chi fatu-fatu torrat a essire a pillu), in su Just Transition Fund e in sa programmatzione regionale. S’assessore Meloni ant nadu ca ormai non si podet prus rimandare su protzessu de isvilupu locale e chi, a comente ant fatu in àteras zonas de Sardigna, su protzessu depet mòvere dae is comunidades locales in manera chi si programmas tengant sustenibilidade econòmica e temporale pro chi ammelliorint de diaderus sa cualidade de sa vida. A s’atòbiu fiant presentes puru is consilieris regionales de su territòriu, su diretore de s’assessoradu a s’indùstria e is tècnicos de su tzentru de rpogrammatzione regionale.
Cenàbara in su Mimit de Roma su ministru de s’indùstria Adolfo Urso impari a sa sutasegretària de stadu a is crisis de s’impresa Fausta Bergamoto at otonbiadu a s’assessore regionale a s’indùstria Emanuele Cani cun is istruturas tècnicas de su ministeru e de sa RAS. Duncas a su màssimu livellu polìticu, ancora una borta, ant esaminadu is chistiones chi pertocant sa Portovesme SRL, s’ Euroalluminia e sa Sider Alloys cun su ministru chi at ispiegadu ita ant fatu in custas cidas passada e at annuntziadu chi in secuèntzia ant cunvocare riuniones cun is sindacados su 20 e su 30 de gennàrgiu (Eurallumina e Sider Alloys) e su 5 de friàrgiu (Portovesme srl).
Un’agiornamentu a pitzus de is campionados de fùbalu.
In su girone ùnicu de eccellèntzia regionale, a pustis de de 18 giorronadas sa classìfica ormai parit assetiada: s’Iglesias Calcio est trancuillu cun 27 puntos a mesu clàssifica, est gherrendesidda su Carbonia chi cun 17 puntos depet sighire a provare non pèrdere pro istransire su playout. Est a sa de 19 giorronadas su campionadu de Promotzione e sunt andende male is iscuadras sulcitanas: est ormai cundennadu a retrotzèdere su Villamassargia chi at fatu sceti 7 puntos, siguramente tenet calincunu ispera in prus s’Atletico Masainas chi tenet 14 puntos e podet ancora aguantare su playout. In su girone B de prima categoria su Perdaxius est a su de duos postos cun 32 puntos e podet isperare in sa promotzione dereta, sunt a mesu a classìfica sa Verde Isola e s’Antiochense Calasetta toteduas cun 25 puntos, circat de istransire su playout su Cortoghiana (17), paret depat a torrare in segunda categoria su Santadi chi tenit 9 puntos sceti.
Roberto Pinna
