Sa cida sulcitana in curtzu, in Limba Sarda Comuna Dae su 24 de friàrgiu a su 2 de Martzu
Lunis Su Consìliu Comunale de Igrèsias at aprovadu una variatzione de bilànciu de importu mannu meda. In totu sunt prevèdidas intrados noas (e ispesas cunsighentes) pro 20 miliones de èuros chi arribant dae sa RAS, PNRR e dae su dinari comunitàriu de su Just Transition Found. Custu dinari at a serbire pro modernare unas cantu istruturas isportivas, ammelliorare sa viabilidade in sa ex ZIR, fàere bonìficas in zonas diferentes de su territòriu e fintzas pro cuncordare su museu archeològicu. In custa manera su bilànciu de su Comunu de Igrèsias arribat a tènnere unu volore de pagu prus de 114 miliones de èuros.
Est totu prontu pro sa de tres editziones de su Rally del Sulcis Iglesiente, s’eventu isportivu dedicadu a is amantiosos de is motores organizadu dae s’iscuderia Mistral Racing de Igrèsias cun su sustegnu de sa RAS, de sa Fondazione Sardegna, AC Cagliari, ACI Sport Delegazione Sardegna e sa Cantina Santadi. Comente is annos passados sa gara incumentzat e acabat in Pratza Sella cun su parcu atèntdèntzia cuncordadu in Carbònia. Su percursu mesurat 407 km (e tocat 9 comunos) e nde prevedit 73 de provas cronometradas (de ripìtere 2 bortas). Si torrant a propònnere is ispetziales ormai bene collaudadas de Perdaxus e Nuxis-Santadi e nc’ant a èssere is novidades de Is Arruastras (Igrèsias) e Bacu Abis (sa prima die) e de Maladroxa cun su controllu a timbru in Santu Giuanni Suèrgiu e su riordìnu in Villaperùciu. Is iscritziones iscadint su 12 de martzu pro su rally modernu e su 17 pro su rally istòricu cun sa gara chi s’at a fàere su 22 e su 23.
Chissai chi non siat sa borta bona chi arrinnesciant a acabare de arrangiare se crèsia de Santa Luxia in su sartu de Villaperùciu. Is traballos fiant incumentzados 5 annos a coa e si fiant firmados prima pro mori de su covid, pustis pro mori de su tempus malu, in su mentrs fiat arrutu un’àteru arrogu de muru e duncas a marolla iant mudau su progetu ma custu progetu non praghiat e duncas dd’ant torradu a assetiare (cun totus is protzeduras burocràticas chi serbint in ufìtzios vàrios), in su mentres s’inflatzione manna de is ùrtimos annos at fatu aumentare su costu de su materiale e a marolla ant dèpidu torrare a fàere is contos e agatare dinari dae su bilànciu comunale sende chi si 200mila postos dae sa CEI e dae sa RAS non abastaiant prus… Duncas isperende chi totus is arrociallas burocràticas siant passadas, sa determinatzione est firma dae giòbia in s’Unione de is Comunos de su Sulcis, est capassu chi – si totu andat bene – in su 13 de mese de idas chi benit is baroniesos, afetzionados meda a Santa Luxia, dda potzant torrare a afestare a in su logu suu: in una crèsia simpli meda,chena de ondraduras ma cun d-una bella artari tridentina manna, aundi si podit ascurtare in paghe is sonos de su sartu.
Su 27 de friàrgiu est aparèssida in Facebook sa pàgina de sa Provincia del Sulcis Iglesiente. Chini gestit sa pàgina cun d-unu post faet ischire chi ant aprovadu s’istatudu – cosa chi siguramente at dèpidu fàere su commissàriu V. Bàsciu – chi est s’atu fundamentale chi donat istrutura, obbietivos e e modalidades de funtziamentu e cumbidant tzitadinos, impresas, entes e amministradores locales a partecipare a su progetu pro chi siat de diaderus una ocasione de crèschida e innovatzione. Duncas totus is entes abolidos in su 2016 (e pro su chi si pertocat postos impari in sa Provìntzia de su Sud Sardigna) e gestidos dae commissàrios sunt torrende de diaderus sende ca sa L.R. 7/2021 est essende operativa. Nc’at de elìgere su presidente e su consìliu provintziale e iat a deper èssere una eletzione de segundu gradu – est a nàrrere chi ant a poder votare sceti is consilieris comunales cun votu ponderadu a segundu de sa mannària de su comunu – ma ancora non si ischiet candu s’ant a fàere.
Roberto Pinna
