Is sìndigos de s’Unione de is Comunos de su Sulcis ant torradu a protestare pro sa situatzione de sa SP2, s’istradone chi est connotu cun su nùmene de Pedemontana chi ponnet in collegamentu su Sulcis de Bàsciu cun sa SS130. Is sìndigos sulcitanos dae chi ant arregordadu s’importu chi tenet s’istradone pro s’economia de sa zona e chi is interventos fatos custu ierru passadu a pagu cosa sunt serbidos, ancora una borta ant iscritu a unu muntone de entes (Provìntzia Sud Sardigna, assessoradu regionale a is Traballos Tùbblicos, Tzitade metropolitana de Casteddu, Presidèntzia de sa Regione, Prefetu) dimandende unu pianu istraordinàriu de manutentzione totale de s’asfartu, su potentziamentu de sa segnalètica e unu cronoprogramma craru de totus is traballos chi prevèdidos.
Su 16 de maju Sergio Murgia chi est s’amministradore istraordinàriu de sa Provìntzia de Sulcis-Iglesiente in una lìtera dereta a is tzitadinos sulcitanos at annuntziadu unu momentu istòricu: infatis sa Presidendete de sa Regione at firmadu su decretu chi partzit is benes mòbiles e immòbiles cun is resorsas umanas e finantziàrias de Provìntzia de su Sud Sardigna e duncas, de manera ufitziale, naschent is provìntzia noas. A parre de Murgia s’ente intermèdiu nou no est sceti una càmbia amministrativa ma est un’oportunidade chi at ponnere a disponimentu totus is ainas pro programmare interventos chi punnint a fraigare unu benidore chi isfrutit totus is potentzialidades de unu territòriu chi est afrontende una crisi industriale funguda meda. Ancora una borta si ligint fueddos chi ammostrant bideas bonas e nosu abarraus cun s’ispera chi arribit a lestru una ghia polìtica e responsàbile pro custu ente nou chi, pro imoi e tanti, paret uguale a su bèciu.
In Igrèsias nc’at assessore a is traballos pùbblicos nou: est Nicola Concas chi at leadu sa cadira de fiat de Alberto Cacciarru pustis chi mèrcuris su sìndigu Mauro Usai ndi dd’at revocadu s’incàrrigu. Cacciarru, chi aiat torradu ca no a sa rechesta de dimissiones fata dae su sìndigu etotu, at cuntestadu custa decisione imputende a su sìndigu tropu decisionismu e de favorèssere “amighixeddus”. Su sìndigu at arrispùndidu narende chi su sciuoberu est su resurtadu de una anàlisi chi tenit in cunsideru sa situatzione polìtica noa e ca, a dònnia manera, bolet donare logu a is generatziones prus giòvunas. Pro su chi pertocat àteras boghes de un’àtera càmbia imminente in giunta Usai dd’at segada in curtzu: dònnia detzisione at a essere fata ischire a is interessados candu at a arribare s’ora giusta.
Cenàbara in sa biblioteca de Santadi, de fronte a unu pùbblicu atentu meda Simonetta Uccheddu at presentadu su libru suo: “Io, la bottiglia e la vita”, aundi contat chena de filtros s’esperièntzia dolorosa e drammàtica de s’alcolismu, incumentzada de candu fiat piciochedda e sighida fintzas a chi fiat giai mama e a comente, gràtzias a s’agiudu de su maridu e de su dotore G. Madeddu, est arrinnèscida prima a bìnchere sa dipendèntzia sua e a pustis s’est posta agiudare a totus is chi fiant e sunt in calisisiat dificultade gràtzias a s’assòtziu “Amici della vita”, chi dae annus meda traballat, bortas meda a sa muda, in totus is comunos sulcitanos. In prus Uccheddu at annuntziadu chi a lestru at a essire un’àteru traballu chi regollet 50 testimònias de personas chi gràtzias a s’agiudu de isssa e de Gli Amici della Vita sunt resèssidos a bìnchere sa dipendèntzia insoru.
Sàbudu a meigama, in Nuxis, si nd’est andadu a 41 annos sceti su vicesìndigu Dario Melis. Melis fiat andende a motu in sa SS 293 candu dae s’ingruxada in mesu de su popolau nd’est essida una vetura ghiada dae una turista chi a cantu paret no at rispetadu a su stop. Duncas sa motu ndi dd’at boddida in prenu e Melis s’est mortu in s’istante. Custa nova mala at prenu de tristura totu sa comunidade nuxaia e fintzas is collegas amministradores de su Sulcis de Bàsciu chi arregordant a Dario Melis che persona de ànimu bonu, atenta e semper pronta a donare una manu de agiudu. Il Sindaco Pietro Morittu e l’intera Amministrazione Comunale di Carbonia hanno espresso il più sincero cordoglio per la tragica scomparsa del vicesindaco di Nuxis Dario Melis, deceduto in un incidente stradale. "Una perdita enorme per la comunità di Nuxis e per il territorio. Dario era un amministratore stimato, capace e benvoluto, la cui prematura scomparsa lascia un vuoto profondo. Alla famiglia, al Sindaco Romeo Ghilleri e all’intera comunità di Nuxis giungano le più sentite condoglianze e un forte abbraccio da parte del Sindaco Pietro Morittu, in rappresentanza della città di Carbonia".
A cura di Roberto Pinna
