Pagu innantis de su pàsiu de Pasca Manna su Consìliu Regionale, cun 4 meses de ritardu, at provadu sa finatziària pro su 2025 e imoi chi ant pubblicadu totus is documentos si podet provare a biere ita resorsas at prevèdidu in s’àula de bia Roma pro su logu nostru. Siguramente at a èssere de importu su rilànciu de s’universidade in su Sulcis: infatis ant postu dinari pro master chi ant a tratare de sa rigeneratzione e s’avaloramentu de is àreas postindrustriale e mineràrias (in Igrèsias) e de cìnema e audiovisivos (in Carbònia). Est cunfirmadu su finantziamentu pro Sulcis Iglesiente Espone (30mila a su Consòrtziu e 70mila a su Comunu de Carbònia) e pro su funtzionamentu de sa gruta de Santu Giuanni in Domunosa (150mila èruos pro 2 annos); leat in totu 400mila èuros su Comunu de Igrèsias, fintzas a tìtulu de rimborsu, pro organizare manifestatziones de promotzione territoriale. A dònnia manera non paret de bìere una bisura istratègica de su territòriu: a parte calincunu finantziamentu pro òperas de interessu pùbblicu (po esèmpiu 120mila èuros a Villapeùciu pro acabare sa retza de sa lughe pùbblica), si ligit unu muntone de interventos “una tantum”: 80mila èuros andant a is assòtzios de Carbònia pro su rimborsu de su pagamentu de sa TARI, 50mila èuros ant a serbire a su Comunu de Nuxis pro fàere manifestatziones culturales, 70mila èuros ddos pigat s’Antiochense Calasetta (iscuadra de fuba chi giogat in prima categoria) pro is ispesas de gestione e aici sighende.
In Igrèsias nc’at assessori nou a sa a cultura: Carlotta Scema chi fiat giai assessore in sa consiliadura pretzedente, at leadu sa cadira de Claudia Sanna chi a pustis de 7 annos (is primos 5 fiat fintzas vicesìndigu) lassat s’amministrazione comunale pro intrare su staff de su consilieri regionale Alessandro Pilurzu.
Sabùdu a merie in sa Sala Spiga de sa Domu Baronale de Teulada chi fiat prena a intipu Salvatore Loi, istòricu locale chi abantat collaboratziones cun s’universidade de Tàtari e televisiones internatzionales, at presentadu s’ùrtima faina sua: “Le strade parlanti” aundi at arrigotu is fatos, bellos e malos, acuntèssidos in su tzentru istòricu de Teulada dae si primos annos de s’800 fintzas a su 1950. S’òpera est sa sìntesi de una regorta de 50 annos de circas de archìviu e de contos intèndios dae is antzianos de bidda. S’òpera est interessante meda proita ca est s’isprigu de una comunidade forte meda chi est resèssida a espressare personalidades chi, in is ùrtimos duos sèculos, ant tentu unu ruolu de importu a livellu regionale e natzionale. S’autore at nadu, ca de acòrdiu cun s’Amministratzione Comunale, su progetu at a sighire: in totus is arrugas ant giai postu una targa chi arregordat s’acuntèssidu e a lestru at nàschere una aplicatzione pro is telefoneddos chi at permìtere a is turistas de ascurtare, in forma ismenguada, su contu in tres lìnguas: italianu, inglesu e sardu. Duncas totu s’òpera bolet èssere una manera diferente pro avalorare ancora de prus su tzentru istòricu chi est giai prenu de elementos architetònicos interessantes meda.
Abbanoa SpA at fatu ischire chi pro unu mese, duncas fintzas a su 25 de làmpadas chi benit, at a serrare s’àcua a su note (dae is 22:00 a is 6:00) in totus is comunos chi sunt serbidos dae s’acuedotu de su Sulcis (Carbònia, Portescusi, Narcau, Carbonia, Gonnesa, Giba, Masainas,Perdaxus, Piscinas, Villaperùciu, Santadi, Tratalias e Arresi). Infatis in is ùrtimos meses at aumentadu su livellu de sa diga de Bau Prèssiu ma pro impreare cusa àcua pretziada est netzessàriu a fàere traballos de manutentzione is vascas de potabilizatzione e pro circare causare su prus pagu istrobu a is utèntzias benit a marolla a firmare s’erogatzione a su note.
Est pretzisu a sinnialare su resurtadu mannu de sa Scuola Basket Carbonia chi s’est assigurada, a pustis de 13 annos, sa promotzione in serie C regionale binchende 2 a 0 se sèrie de semifinale contras a Selargius. S’apuntamentu est pro chida chi benit pro sa finalissima contras a s’Aurea de Tàtari ma siguramente nc’at isperas bonas pro s’iscuadra carboniesa sende chi sa formatzione fiat prena de piciocheddos chi formados in su setore giovanile.
Roberto Pinna
