Est sighende a fàere basca manna cun is temperaduras custa cida passada ant incurtziadu a 40 grados. Craramente custa grandu caloria e su bentu forte donant una manu de agiudu a is sòlitos male intragnados chi nde aprofintant pro atacare fogos. Mèrcuris est istadu unu meigama de timoria manna in Is Urigus (fratzione Santu Giuanni Suèrgiu): is pampas ant sartadu su monte e fiant impunnende, lestras meda, conca a su popolau chi s’est prenu de fumu e pro siguresa ant fatu evacuare unas cantu domos. Sunt intervènnidos duos elicòteros de su servìtziu regionale e duos aereos chi dae s’àiri ant agiudadu is iscuadras de is pompieris de Igrèsias e Carbònia e de is volontàrios arribadas dae su territòriu. In su mentres sa base de Igrèsias, chi dae su 15 de maju ant mòvidu dae Marganai e s’ex ostellu de sa gioventude in Ceramica, est chena de elicòteru: su bandu regionale est andadu desertu e duncas sa gestione iat a poder passare dereta a sa centrale de commitèntzia de sa Guàrdia Forestale chi iat a poder incarrerare una protzedura negotziada pro assigurare su servìtziu. s’Amministratzione Comunale igresiente est impegnende-sì pro chi si agatit una solutzione a custu problema chi est de importu mannu pro totu su territòriu.
A pustis de 28 annos, giòbia passadu su ricòveru istòricu de Igrèsias “Margherita di Savoia” at torradu a abèrrere. Fiant presentes totus is istitutziones tzitadinas cun su sìndigu Mauro Usai chi fiat cuntentu meda de su resurtadu ma at arregordadu totus is arrociallas burocràticas chi sunt essidas a pillu in is annos e isperat chi no acuntessant prus casos sìmbiles. Duncas s’istrutura, annoada de su totu e gestida dae sa cooperativa Medihospes, dd’ant trasformada in comunidade integrada e tenet 60 postos-letu, ispartzidos in duos mòdulos, chi ant a assigurare atendèntzia cualificada e continuativa gràtzias a un’iscuadra fata de infermieris, fisioterapistas, psicòlogos e operadores sòtzio-sanitàrios.
In su CTO de Igrèsias est nàschidu unu servìtziu nou a intrus de s’atendèntzia oncològica: nc’at un’iscuadra de ispetzialistas de brancas mèigas diversas chi ant a traballare totus impari pro assigurare unu percursu de cura dedicadu a dònnia malàdiu chi partit dae sa diagnosi e arribat fintzas a sa riabilitatzione. Duncas duas bortas a su mese s’iscuadra de dotores at a fàere riunione in videocunferèntzia pro analizare is casos sìngulos e istabilire cale est sa mellus istrategia pro dònnia persona. Su progetu tenit fintzas valèntzia formativa: infatis dotores e infermieri podent pigare parte a unu protzessu de formatzione contìnua e siguramente rapresentat un’investimentu conca a unu modellu de cura prus lestru e eficaci.
Su sìndigu de Perdaxus, Gigi Loru, at firmadu unu protocollu de intesa cun sa coop. Casa Emmaus e duncas brintat su comunu de su Sulcis de Bàsciu, brintat in su Progetu Talità Kum chi est nàschidu in Igrèsias pro donare atendèntzia a is fàscias de popolatzione prus dèbiles. Loru at ispiegadu ca in custa manera fintzas is perdaxinos chi si agatant in dificultade – is rechestas ddas at a mediare su servìtziu sotziale comunale – podent andare a in donu a is ambulatòrios de Igrèsias pro otènnere una risposta lestra a is netzessidades de bisitas ispetzialìsticas. In prus gràtzias a una cooperativa locale si ponet a disponimentu de is utentes unu taxi sotziale: unu mezu at a andare nde leare su malàdiu a domu sua e nche-dd’at a lòmpere a is ambulatòrios e a pustis nche-ddu torrat a domu sua etotu.
Fiant prus de 500 is personas chi cenàbara passada is chi ant pigadu parte a sa manifestatzione chi cenàbara ant fatu in Igrèsias pro ammostrare solidariedade a su pòpulu palestinesu. Su corteu, burdelleri meda, at mòvidu dae sa pratza de sa Seu e est lòmpidu a pratza Sella. E fintzas su Consìliu Comunale de Igrèsias at votadu un’apellu in favore de sa defensa de is deretos umanos fundamentales in Palestina e pro suspèndere is acòrdios cummertziales cun Israele.
Robertp Pinna
