In Igrèsias acanta de s’istitu magistrale e su litzeu scentìficu depent fàere unu palàtziu de s’isport nou. Su progetu balet 3miliones e 600mila èuros chi arribant dae is finantziamentos regionales dedicados a s’isport e a is periferias. S’òpera multifuntzionale, pentzada cun is tecnologias prus modernas, at a tènnere impatu energèticu bàsciu meda (e duncas is costos de gestione ant a èssere prus lèbios pro is assòtzios) e at a èssere adata fintzas pro is personas prus fràgiles e at pòder ospitare eventos e manifestatziones de livellu regionale.
In S. A. Arresi, massimamente in sa zona de Porto Pino, ant passadu una cida de trumentu pro more de s’emergèntzia ìdrica. Infatis sa condota printzipale, fata a ciumentu-amiantu e chi tenet prus de 60 annos, s’est segada 5 bortas de sighiu e craramente in bidda si-nd’est pesada polèmica manna meda. A pitzus de sa chistione est intervènnidu su sìndigu Paolo Luigi Dessì chi s’est iscusadu cun is residentes e cun is turistas pro s’istrobbu mannu torrendi-ddis gràtzias pro sa passièntzia e at abantadu is operàios chi no ant firmadu nudda de traballare pro resòlvere su problema. In prus Dessì at nadu ca sa polèmica istrumentale no agiudat a nemus proita ca su chi est acuntèssidu non si podiat prevèdere in nisciuna manera e ca sa configuratzione de sa retza ìdrica custringhet a iscarrigare s’àcua in is coras candu ddoe at guastu. Su sìndigu at acraradu ca est bènnidu male fintzas a corbare autobotes pro assigurare a totus una furnidura mìnima de àcua e ca, a dònnia manera, s’ Amministratzione est traballende pro torrare a fàere de bellu e nou totu sa retza e chi est sèmper disponìbile a si cunfrontare cun totus a pitzus de calisisiat problema.
Est arribada sa nova bona chi is domus de janas, is tumbas chi is antenados nostros faiant stuvionende s’arroca modde cunforma a is domos aundi biviant 6mila annos a coa, sunt intradas in su patrimòniu de s’UNESCO. In sa lista ddoi at 17 sitos, giai totus in s’oru de susu de Sardigna, ma at tentu ruolu mannu meda sa necròpoli de Montessu, in territòriu de Villaperùciu, unu de is pagos a tènnere una gestione istruturada e chi si caraterizat pro sa continuidade de s’impreu in is sèculos, pro sa genia diferente de tumbas e pro su bellu panorama. S’ispera de is amministradores baroniesos e chi custu reconnoscimentu mannu torrit in pubblitzidade pro su territòriu a manera chi s’archeologia si trasformit de diaderus in unu volanu de isvilupu econòmicu in su mentres chi si potzant avallorare fintzas is tumbas chi si agatant in Monte Crobu (Carbònia), in Is Loccis Santus (S.G. Suèrgiu), Cungiau Tutui (Piscinas) sena de iscarèssere is chi giai sunt connotas in s’àrea archeològica de Pani-Lòriga (Santadi).
Custa cida passada at fatu unu pagheddu de friscura cun is temperaduras màssimas chi sunt abarradas a giru de 30 grados gràtzias a su maestrale chi at suladu unu pagheddu ma chi at donadu s’oportunidade a is sòlitos male intragnados pònnere fogos. Infatis sàbudu a meigama nd’est partidu de sa zona de s’ispidale in Carbònia cun is pampas chi ant curtu fintzas a su rifornidore chi abarrat acanta de su collegamentu cun sa SP2 e nche fiat perìgulu mannu meda chi no iscopiessit totu: sunt intervènnidos in fortza manna pompieris, forestale, is iscuadras de volontàrios e tres elicòteros. Paris a custu fogu nd’ant atacadu un’àteru acanta a Su de is Ùrigus (in comunu de S. G. Suèrgiu) e in custu casu puru sunt depìdos intervènnere is elicòteros cun is residentes chi ant agiudadu is volontàrios a istudare is pampas chi ant fatu iscònciu a siendas agrìcolas. A mericeddu ant atacadu fogu fintzas a in Terresoi (fratzione de Santadi) aundi sunt aproliadas totus is iscuadras de volontàrios de su Sulcis de Bàsciu e ant dèpidu evacuare 60 personas sende chi su fogu fiat intrende is cortiles de is domos.
Roberto Pinna
