In Sant’Anna Arresi, Abbanoa SpA at postu in funtzione su primu tretu de retza ìdrica noa (750 metros) chi nche lompet s’àcua a sa burgada de Porto Pino. Fintzas a su 30 de su mese passadu s’amministratzione arresina gestiat su servìtziu ìdricu in autonomia e duncas su gestore regionale est intervènnidu a lestru meda pro chircare de risòlvere unu problema mannu pro sa localidade turìstica. S’interventu balet 100mila èuros e prevedit de sighire a istèrrere tubos in ghisa sferoidale de 150mm fintzas in su medau de Is Cinus (300metros nous) e s’ativatzione de vàlvulas de isfiatu chi ant a permìtere de regulare sa pressione pro ismenguare is arriscos de guastos in is tretos bècios.
A su comunu de Santu Giuanni Suèrgiu est arribada sa comunicatzione ca una sienda bolet fàere una discàrriga “pro arrefudos ispetziales non perigulosos” (su volumu est de giai 325mila metros cubos) a pagu tretu de is impiantos isportivos de fratzione de Is Ùrigus pròpiu aundi ddoi at una gava isbandonada dae annos. Elvira Usai, sìndigu de Santu Giuanni Suèrgiu, at fatu apellu a totu is assòtzios locales e tzitadinois residentes pro chi, a intrus de su 25 de austu chi benit, presintint a s’Assessoradu Regionale de sa Defensa de s’Ambiente osservatziones e documentos chi siant de agiudu pro firmare s’iter autorizativu regionale. Usai at arregordadu chi s’amministratzione santuannesa in is annos colados si fiat decrara contrària a sa crèschida de sa gava etotu e chi non bolent, de nisciuna manera, discàrrigas chi potzant pònnere in perìgulu s’ambiente e sa salude de is tzitadinos.
In Carbònia ant incumentzadu is traballos (40mila èuros) chi iant a deper acabare su mese de cabudanni chi benni in v. Cannas pro rimediare a una situatzione de degradu chi andat a innantis de 30 annos. Infatis in su primu tretu de s’arruga, aundi passat fintzas su Camminu de Santa Bràbara, ant incumentzadu a nde sciusciare unu piatzale pro fàere unu parchègiu ant a donare una bella aderetzare is iscaleris chi collegant cun v.le Arsia e a is marciapiedis chi fiant mesu isderrocados e totus prenos de àliga.
Sa RAS at postu 13 miliones de èuros pro s’avaloramentu de is territòrios aundi passat su Camminu Mineràriu de Santa Bràbara. A parre de s’assessore regionale a sa programmatzione G. Meloni su progetu at criare unu modellu de turismu sustenìbile e esperientziale cun raighinas culturales fungudas e bene ispratas chi sunt rapresentadas dae su Camminu etotu chi, in custa manera, si podet trasformare in unu volanu de isvilupu integradu de su territòriu. Is atziones prevèdidas, chi s’ant isvilupare in 4 annos, andant dae sa ricualificatziones de is percursos a s’avalloramentu de immòbilis pùbblicos cun impatu ambientale bàsciu passende pro su potentziamentu de s’ospitalidade, sa promotzione digitale e sa formatzione de is operadores locales.
Sighint is manifestatziones de s’istadiale e comente dònnia annu at tentu unu sutzessu mannu meda su Narcao Blues chi est arribadu a sa de 35 editziones: sa bidda pro 4 dies (dae su 23 a su 26) s’est prena de apassionados lòmpidos dae dònnia oru de Sardigna e non fiant pagos is turistas chi ant aprofitadu de s’ocasione pro ascurtare mùsica de livellu artu meda in Pratza Europa. Sunt andados bene meda puru is cuntzertos (Ivana Spagna, Nek e Marco Masini) Disco Italia Live chi a primu cida ant prenu de gente pratza Sella. In su mentris in Santadi is piciocos de sa Pro Loco sunt acabende de aprontare totu pro su 3 de austu candu in Pratza Marconi ant a tzelebrare sa de 57 editziones de Coja Meurreddina (ocannu is isposos sunt de Santu Perdu de Pula) chi prevedit fintzas unos cantu eventos collaterales.
Sa cida sulcitana in curtzu, in Limba Sarda Comuna
Roberto Pinna
