Domingu 6: A mangianu una barca a vela cun bandera tedesca at arrèschidu in sa sica de is salinas. Is 4 chi fiant a in sa barca, chi est longa 21 metros e lada 6, si nche sunt ghetados a s’àcua e anadende si nde sunt torrados a terra. Invècias a merie su tempus malu – ma fortzis, cunsiderende su sciutori mannu, est mellus a nàrrere tempus bonu – at unu pagu guastadu “sapori d’Autunno” sa manifestazione fata in su centru de Sant’Antiogu. A dònnimanera, mancari fatu fatu proessit, s’est bista bastante gente passillende in mesu de is istand de prodotus enogastronòmicus e bisitende is museos e is monumentos de “Sa ‘Idda”.
Lunis 7: aumentu clamorosu pro is tassas a pitzus de is assiguratziones de is veìculos in su Sulcis-Iglesiente. Dd’at denuntziadu Giorgio Bullegas, diregente nazionale de s’assòtziu de is agentes de assiguratzione. Su 27 de su mese passadu, s’amministradore istraordinàriu de sa provìncia de su Sud Sardigna, Giorgio Sanna, at dispostu s’aumentu de sa tassa RCA pro totus is residentes in su Sulcis-Iglesiente, portende-dda a su màssimu possìbile. Duncas at a crèscere de su 32% e comente conseguèntzia ant a aumentare puru su costu de s’assiguratzione de is veturas pro famìlias, siendas e professionistas.
Martis 8: Sunt giai 5200 is bulletas de s’àcua (relativas a su periodu chi partit dae mese de argiolas a mese de ladàmine passados) chi Abbanoa est mandende a Sant’Antiogu. Is bulletas tenent s’ importu mèdiu de 81,29 èuros. Abbanoa at previstu dilatziones e tarifas agevoladas pro is bulletas prus artas de 100 èuros e servìtzios internet pro su pagamentu e pro sa segnalatzione de errores.
Su ministru pro s’isvilupu econòmicu Carlo Calenda at decraradu chi su Guvernu est acanta de agatare un’acòrdiu cun s’Alcoa pro chi sa multinatzionale americana lassit is impiantos de Portovesme sena de sciusciare. Invitalia, s’agentzia natzionale pro s’isvilupu de is investimentos e de is impresas, s’at a pònnere a circare calincuna dita manna chi comporit is impiantos e ddos torrit a pònnere in produtzione.
Mèrcuris 9: in Igrèsias is Carabineris ant fatu unu blitz antidroga in d-unu istitudu professionale. Su cane antidroga de su repartu de is Cassadores de Sardigna at sinnialadu a 10 piciocos chi sunt istados percuisidos. A unu de custus dd’ant agatadu unas cantu doses mìnimas de haschish pro impreu personale. Est iscatada sa segnalatzione a su prefetu chi at a leare is provedimentos de su casu.
Giòbia 10 Sa RSU de s’Euroallumina at fatu su de 27 presìdios de ocannu (su de 12 in is ùrtimas 8 cidas) de fronte a su SAVI in arburada Trieste in Casteddu. Sa chistione est sempre sa pròpiu: sa RSU de s’Euroallumina bollet sighire e tènnere arta s’atentzione in contu de is valutatziones de impatu ambientale de su pianu de investimentos de 200 miliones presentadu dae sa RUSAL pro fàere torrare a partire sa fàbbrica de Portovesme. Su SAVI depet acabare sa procedura su 29 de custu mese.
Cenàbara 11 In Santu Giuanni Suèrgiu su sìndigu Elvira Usai at presentadu su libru de s’ex presidente de sa Regione Pietrino Soddu “L’ultima Spagna”. Sunt intervènnidos s’ex diretore de s’Unione Sarda Anthony Muroni, su professore Giocamo Mameli, su deputadu de su PD Franceso Sanna e puru s’autore de s’opera chi contat s’istòria de Sardigna in su periodu ispagnolu. S’ocasione est istada bona pro resonare de su passadu e puru de su benidore de sa Sardigna. Sigundu Soddu, chi mancari tengat 87 annos at faeddadu pro una bona mesora contende is esperièntzias suas, sa giunta regionale de imoe non tenet nisciuna idea pro su benidore mentras candu nche fiat issu s’idea generale fiat cussa de cùrrere pro sorigare is regiones prus isvilupadas de s’Itàlia. Sigundu Mameli puru non che sunt prospetivas bonas, invècias a parridade de Francesco Sanna, siguramente is cosas non sunt andene bene e depent andare mellus, ma in Sardigna puru nche sunt ecellèntzias e progetos bonos a bortas portados a innantis dae siendas multinatzionales. Muroni invècias at sinnialadu unu fatu nou acuntèssidu in Casteddu a mangianu: 270 sìndigos sunt andados in Consìliu Regionale pro dimandare agiudu a sa RAS pro ispendere a lestru su dinari de is Comunos, ma su presidente Pìgliaru no s’est presentadu a ddos ascurtare. Custa ausèntzia at lassadu ispantados unu pagu a totus, e gente meda si dimandat proita su Presidente non si siat presentadu.
Sàbudu 12: S’amministradore ùnicu de Abbanoa Alessandro Ramacciotti at firmadu sa detèrmina in ue s’aciungint 14 miliones de èuros a is 26 chi giai nci fiant pro s’acuedotu chi partit dae sa diga de Bau Prèssiu e portat s’àcua in totu su Sulcis. Custu interventu iat a dèpere risòlvere su problema de sa cualidade de s’àcua in sa zona de Carbònia e Portescusi, e in su Sulcis de Bàsciu s’iat a dèpere a rennescere a non tènnere prus restritziones ìdricas in s’istade: defatis s’ant addopiare is vascas de acùmulu de su potabilizadore de Bau Prèssiu garantende prus àcua disponìbile pro cussa sa zona. In totu s’ant a fàere traballos in 20 km de conduturas.
a cura di R. Pinna
