Sa cida sulcitana in curtzu: Dae su 18 a su 24 de mese de idas
Domingu 18: Sucessu mannu pro Su mercau de is arregordus chi s’est fatu in sa Pratza de su Capìtolu a incuru de s’assòtziu “Sant’Antioco Abbraccia il mare”. Fiat una rievocatzione de tipu istòricu de su mercadu chi si faghiat una borta dònnia chida finas a is primos annos de su 1900. Oberende fotografias istòricas e calincuna testimònia orale arregotas in is annos passados, is de s’assòtziu “Sant’Antioco abbraccia il mare” annt torradu a concurdare is paradas de linna pro fàere su mercadu prodotos agropastorales locales ma est siguru chi aproliaiàt puru gente foresa pro bèndere mercantzias diferentes. Sa cosa prus curiosa fiat ca is bendidores non si faghiant cuncorrèntzia: in dònnia parada si bendiat unu prodotu diferente. De siguru is paradas aundi si podiat agatare is cosas prus pretziadas fiant is “capitulinas” chi fiant de propriedade de su Cleru in ue bendiant prendas e ogetus religiosus comente santinus e candelas beneditas (apuntu is “arregordus”). De siguru custu mercadu depiat atirare gente finas de su Sulcis de Bàsciu, sende chi Sant’Antiogu fiat su centru prus mannu e in ue si podiant agatare puru ainas e trastos de ferru e istrexu de arràmine chi in cussu tempus non fiat fàcile a corbare.
Lunis 19: S’ Allerta meteo arrùbia in totu sa Sardigna de bàsciu fata essire domingu a merie at cuntzilladu is sìndigos a serrare is iscolas. A s’acabada, assumancus in su Sulcis-Iglesiente, àiri serrada e bentu bastente forte ma de àcua pagu e nudda. Is sìndigos ant postu mente a su dìciu chi narat ca <<a timi est mellus che a provai>>. Fatu istat ca, a parridade de chini iscriet custa rubrica, est totu inùtile a mandare is allertas – giai su fatu chi siant de tres colores diferentes (groga, a colore de aràngiu a rùbia) lassat sa gente dubitosa – candu is comunos, massimamente is prus piticos, non tenent personale e mezos pro eventuales emergèntzias. S’impressione est chi a livellos amministrativos artos, a pustis de is tragèdias de is ùrtimos annos (Genova, Olbia – Terranoa), fatzant de pancoddu (in italianu lo scaricabarile): est a nàrrere chi iscarrigant asuba de is sìndigos sa responsabilidade. Paret chi siant narende: t’avisu de avisare ca nc’at perìgulu, apoi si nci arrinescis arrangia-tì cun su tenes. Custa cosa non portat sètiu si, is sìndigos non sunt postos in cunditzione de pòdere intervènnere a lestru in casu de perìgulu. E in prus tocat a arregordare ca in sa primu perra de su mese de ladàmine in su Sulcis de Bàsciu at ghetadu àcua a istrossu chi at fatu iscònciu in su sartu e allagadu domos e arrugas in is biddas ma de allertas no nd’ant ghetadu.
Mèrcuris 21: in Carbònia in Turre Cìvica s’est fata una riunione cunvocada dae s’assessore a is servìtzios sociales de Carbònia La Barbera. Fiant cumbirados a partecipare is sìndigos de su distretu socio-sanitàriu, su commissàriu de sa Provìncia de su Sud Sardigna e su Commissàriu de sa ASL, pro resonare de sa situatzione de sanidade sulcitana e de is progetos pro su benidore. At a èssere chi su cumbidu a partecipare sa “Conferenza dei Servizi” est partidu cenàbara passadu e fortzis ddoe fiat pagu tempus pro si organizare, o mancai in sa lìtera ddoe fiat iscritu ca s’òrdine de is traballos cun is argumentos de arresonare si depiant fàere a connòscere su prus a lestru possìbile, opuru mancari is sìndigos no ant’ai tentu agradèsciu su fatu chi sa riunione no dd’apat cunvocara su presidente de sa cunferèntzia o unu responsàbile de servìtziu, ma fatu istat ca si sunt presentados sceti in 5 de 23 .
Giòbia 22: in Masainas is piciocos chi ant partecipadu a “Promemoria Auschwitz – il treno della memoria” ant contadu s’esperièntzia insoro. Fiat unu viàgiu de formatzione organizadu a livellu natzionale dae S’ARCI in pari a s’assòtziu torinesu Deina, chi prevediàt de andare in trenu a bisitare is logos prus sìmbòlicos (su campu de Auschwitz e su ghetu de Cracòvia) chi ant bistu miliones de personas umans èssere ispèrdidas dae su machìmine nazista.
Biende su vìdeo riassuntivu de su viàgiu e ascurtende is faeddos, de siguru est istàda un’esperièntzia chi at tocadu in manera funguda s’ànimu de is piciocos. Custa initziativa est portada a innantis sighende su percursu aprontadu dae sa Facultade de Scèntzias de sa Formatzione de s’Universidade de Torino chi prevedit una seletzione de tipu motivatzionale de giòvanos dae is 18 a is 25 annos de edade, una preparatzione di tipu istòricu, e su viàgiu in trenu chi durat 6 dies cun àteros piciocos e piciocas chi non si connoscent a pari e a pustis depent torrare s’esperièntzia e is arresonos chi ant fatu totus in pari in contu de su chi ant bistu.
S’iscopu principale de s’initziativa est de formare citadinos abistos e cun d-una cuscèntzia forte in contu de su chi dònnia die acuntesset in su mundu de oe e de ddis imparare a castiare is cosas puru dae su puntu de vista de is àteros.
Cun s’agiudu de una corantina de comunos sardos – chi ant postu dinari dae su bìlanciu pro finantziare su viàgiu pro is residentes – ant a cumentzare is seletziones pro partecipare a su viàgiu de ocannu chi benit. Sigundu su vicesìndigu de Masainas, Ilària Portas, custas initziativas ballent cantu e prus de is òperas pùbblicas proite ca serbint a formare sa conca de is citadinos de su benidore.
Cenàbara 23: in Igrèsias at pigau fogu una palàssiu abui ddoe biviant tres famìlias. Is Carabineris sunt intervènnidos a lestru e ant fatu essire a foras is personas chi fiant dormidas e non si-nde sunt acatadas chi sa domu insoro fiat pighende fogu. Provisòriu is famìlias (e ddoe sunt puru tres minorennes), chi biviant in su palàssiu chi fiat s’ex billetèria de sa ferrovia, sunt andadas in sa Casa Serena in Igrèsias etotu. De chi nc’ant a passare is festas s’Amministratzione Comunale ddis at a circare un’àteru logu pro bìvire.
In Sa Baronia-Villaperùciu s'annu chi benit cumentzant is traballos pro acabare de adeguare s’asilu a is normas in vigèntzia. traballos s’ant a fàere a parte de foras: s’ant a aderetzare sa pratza e is intradas. Su dinari est cussu postu dae sa RAS cun su progetu Iscol@.
Sàbudu 24: In Carbònia ant interradu su pintore Mauro Scarteddu. S’artista carboniesu fiat connotu non solu in su Sulcis ma in totu sa Sardigna e puru in Terramanna. Scarteddu, nàscidu in su 1943, aiat cumentzadu sa carriera de artista a 16 annos. In su 1965 cun àteros artistas aiat fundadu s’ “Associazione sulcitana di arte contemporanea” chi pro 20 annos aiat animadu sa scena artìstica meurredina. A s’acabu de is annos 60 aiat cumpletadu sa formatzione sua in s’ Academia Albertina de Torino e in is primos 70 fiat andadu in Sud America. In is annos 80 e 90 at fatu medas espositziones personales e in is ùrtimos annos traballaiat pro 11 meses e in mese de idas ammostraiat is òperas suas in su Conad de Carbònia. Est fàcile chi imoi ca no nc’est prus gente meda at a apretziare incora de prus s’arte sua.
Chini iscriet custa rubrica faghet a totus is ligidores de www.tentazionidellapenna.com is augùrios pro una bona Paschixedda e si donat apuntamentu pro sa sìntesi de s’ùrtima cida de s’annu a sàbudu chi benit.
Roberto Pinna.
