Sa cida in curtzu Dae su 27 a su 31 de mesi de Ideas
Martis 27: In Sant’Anna Arresi si sunt atobiados is sìndigos de s’Unione de is Comunos de su Sulcis chi ant arresonadu de sa programmatzione noa de is fundos de su Piano Sulcis e ant chistionadu puru de s’istabilimentu de sa Polar in Piscinas. Is sìndigos sunt acimbellados pro sa sorte de is dipendentes: de is 13 chi fiant abarrados, 1 dd’ant licentziadu e àteros 5 ddos ant trasferidos in s’istabilimentu de Gènova. Is sìndigos duncas ant detzìdidu de interpellare is consilieris regionales e is parlamentares sulcitanos e de dimandare unu atòbiu de fàere a lestru cun su Prefetu de Casteddu, su presidente de sa regione Pigliaru e sa dirigèntzia de sa Polar pro circare de cumprèndere sa situatzione e cale ideas tenegant is dirigentes de sa Polar pro su benidore de s’istabilimentu sulcitanu.
Mèrcuris 28: S’indagine chi is Carabineris sunt faende in contu de is firmas arregotas in Carbònia pro sa presentatzione de is listas pro is ùrtimas eletziones comunales est arribada finas a is telegiornales regionales e a giornales natzionales. Cun tìtulos mannos si chistionant de firmas farsas. Pro imoi si scit ca nche sunt 21 personas indagadas. De custas 15 ant firmadu prus de una lista, 5 ex consilieris comunales sunt imputados de falsu ideològicu e una persona est impudata de àere postu puru sa firma de su babbu. Duncas pro imoi e tanti est prus giustu a chistionare de una firma farsa e de àteras personas (chi sunt operaios, disocupados e fèmminas meres de domu) chi sunt arrischende una multa e si depet incora cumprèndere cale est sa positzione de is ex consilieris comunales chi autenticadu is firmas.
Giòbia 29: In is grutas de Su de Is Tzuddas s’est fata, comente est traditzione dae 25 annos, sa missa in gruta. De fronte a 120 personas Don Silvano Cani, su capellanu de su CTO de Igrèsias in pari a don Giampiero Maròngiu chi est su predi de Santadi, at celebradu sa funtzione. Don Cani in s’omelia at nadu ca sa missa in gruta est unu momentu de fide chi permitit de si torrare a pònnere mere de su valori mannu de is traditziones e de su traballu de is chi ant crètiu chi is grutas fessint una oportunidade manna de isvilupu econòmicu.
A pustis at fueddadu su sìndigu de Santadi Elio Sundas chi at abantadu su traballu mannu fatu dae is sòtzios de sa cooperativa Monte Meana chi, mancai apant passadu momentos difìciles, ant sighidu a crèdere in sa potentzialidade de sa gruta e a pustis de annos de crisi manna su nùmeru de is bisitadores est torrende a crèscere. Sundas at puru arregordadu Antonello Sulas, su presidente istòricu de sa cooperativa Monte Meana, un’òmine de gabbale chi teniat ideas bonas e at fatu cosa meda pro sa bidda e at arregordadu puru s’artista santantighesu Gianni Salidu chi est s’autore de is istàtuas de su presèpiu istravanadu cuncordadu in sa sala de s’òrganu.
De chi est acabada sa missa Sundas, in pari a su sìndigu de Carbònia Paola Massidda e a su presidente de s’assòtziu Pozzo Sella Gimapiero Pinna ant incingiau su mullone de su Camminu mineràriu de Santa Bràbara. Defatis pròpiu in Is Tzuddas acabat sa tapa santadesa de su camminu e cumentzat cussa chi lòmpet finas a su mare de Masainas. Sa presèntzia de is deputados Cani e Sanna, e de is cunsilieris regionales elìgidos in su territòriu, est unu sinniale bonu de una sinergia noa de totu su territòriu. Don Maròngiu at benedìxidu su mullone e at arregordadu a totus su camminu chi doniunu de nosu faet in custa vida e, mancai fatu-fatu nos tochit a andare punta a susu e est cosa traballosa, tocat a non si firmare ma a sighire a andare a innantis e persighire su bene comunu.
Cenàbara 30: in Nuxis is sòtzios de su SpeleoClub locale, ghiados dae su professore Roberto Curreli, sunt acabende de aprontare su museu ispeleològicu in is locales de s’ex miniera de Sa Marchesa. In su museu s’ant a pòdere osservare una bella sequèntzia de minerales e de arrocas de totus is eras e periodos geològicos regortas in su Sulcis, riprodutziones de is repertos archeològicos agatados in su territòriu de Nuxis e ainas pro sa geognostica e s’isploratzione de is grutas. Duncas luegus su territòriu at a tènnere un’àtera prenda de ammostrare a is turistas.
In Narcau su sìndigu Danilo Serra at mandadu unu messàgiu a is citadinos. Nd’at aprofitadu pro ddis fàere is augùrios de annu nou e ddis at cumbirados a oberare guetos, petardos e fogos de artifìtziu cun responsabilidade. Siat proite sunt perigulosos pro is chi ddos iscopiant e siat proite chi provocant stress – est a nàrrere chi faghent atzicare - antzianos, pipios e puru is animales sena de cunsiderare s’istrobu chi podent donare a is personas malàdias. Duncas su sìndigu narcaresu est cunvintu chi non serbant ordinàntzias pro ddos limitare e pro ddos oberare cun cuscèntzia ma abastat sceti su sensu cìvicu e sa responsabilidade chi is comunidades de Narcau, Arriu Murtas e Terreseu ant sempre dimostradu de tènnere in dònnia ocasione.
Sàbudu 3:1 Sende chi nche fiat Paschixedda e Suntu Istèvani e chi oe est s’ùrtima die de s’annu, custa cida est curtza de diaderus. Duncas chini iscriet custa rubrica bos augurat una bona fine e unu mellus cumentzu de annu e, si nde tenides praghere, a mi tòrrare a lìghere a s’8 de gennàrgiu chi benit!
A ùrtimu, bollo torrare gràtzias a su diretore de www.tentatzionidellapenna.com Tito Siddi pro s’oportunidade manna chi m’at donadu: cussa de tratare su sardu che una lìngua normale. Duncas mi donat sa libertade de oberare sa Lìngua Sarda non pro fàere folklore ma pro iscriere novas e su chi acuntessit dònnia cida in su territròriu nostru. E iscriere in d-una lìngua diferente dae cussa “dominante” bortas meda bollet nàrrere a biere is cosas in manera diferente. In custos tempos chi sunt, a parridade de totus bastante lègios, su chi Tito Siddi est faende no est cosa de pagu contu!
