Sa cida sulcitana Dae s’8 a su 14 de gennàrgiu 2017
Domingu 8: S’Amminstratzione Comunale de Masainas at mandadu una nota istampa in contu de is insultos chi su sìndigu at arricidu in Facebook pro sa chistione de su cane sena de mere chi ant agatadu mortu in sartu. In pagos faeddos gente meda ant ghetadu is curpas a sìndigu, a bortas cun isultos graves puru, pro sa morte de su cane. S’Amministratzione at denuntziare is chi ant insultadu pro duas resones. Sa primu est chi s’insultu est unu reatu, sa de duas est chi is amministradores fiant impegnende-sì pro agatare un’arricoveru pro su cane chi no essit costadu tropu pro is cassas de su comunu. In s’interis dd’aiant cuncordadu unu serru abundi est su garàgiu de is mezos comunales e ddi donaiant a papare dònnia die ma su cane s’est fuidu e nc’est atapadu in d-unu latzu postu pro cassare a is sirbones chi dae monte calanta in su sartu a circare cosa de papare. Est fàcile chi chini at paradu su latzu dd’apat tiradu una iscupetada pro dd’acabare.
A parridade de chini iscriet, totu custa cosa non portat sètiu e est unu sinniale de is tempos macos chi seus bivende. Premìtidu ca su de bocire un’animale sena de peruna resone est cosa isballiada, e chi est giustu e persighire a chini dd’at fatu, ma non est giustu a imputare a s’Amministratzione Comunale sa responsabilidade de sa morte de su cane. Comente chi siant istètiu is amministradores a bocire su cane e non fessint impegnende-sì pro agatare una solutzione pro s’animale puru, candu a traballu arrinnèscint a atèndere is cristianos.
Lunis 9: Carbònia, su Sulcis e totu sa Sardigna ant pèrdidu unu testimòngiu importante de su sèculu passadu. S’est ispaciadu a 97 annos Modesto Melis, chi a su tempus de sa segundu gherra mondiale pro un annu fiat presoneri in su campu de cuncentramentu de Mathausen. Melis pro annos meda no at contadu pubblicamente s’esperièntzia sua proite ca no ddu crediàt nemus. Sceti in is ùrtimos annos, in ocasione de sa giorronada de sa memòria, aiat cumentzadu a atobiare istudentes e donare intervistas in ue contaiat su dramma chi aiat bìvidu. 3 annos a coa fiat torradu a bisitare is logos in ue fiat presoneri e lassadu sa testimonia sua in medas documentàrios e in d-unu bellu libru, L’animo degli offesi, iscritu dae Giuseppe Mura.
Martis 10: De chi in su 2016 nd’ant fatu 37, sa RSU de s’Euroallumina at fatu sa primu manifestatzione de su 2017 in Casteddu de fronte a s’Assessoradu a s’Ambiente in Arburada Triesta. S’iscopu est cussu de solletzitare sa cunvocatzione de sa cunferèntzia de servìtzios – chi s’assessora a s'ambiente at promìtidu in intro de custu mese – pro acabare totu s’iter autorizativu pro is investimentos de sa RUSAL in s’istabilimentu de Portovesme.
Mèrcuris 11: Su comunu de Masainas cun d-una delìbera de giunta comunale at incarreradu is protzeduras pro ativare su REIS, su Rèdditu de Inclusione Sociale, aprovadu dae su Consìliu Regionale. Su de Masainas est un’ atu de inditu, chi regollet cantu iscritu in is delìberas de sa Giunta Regionale aprovadas su mese passadu, pro mèdiu su cale si ordinat a is ufìtzios de cumentzare a aprontare su bandu pùbblicu e sa modulìstica necessària pro regòllere is dimandas. S’idea de s’Amministratzione masainesa est cussa de donare unu agiudu cuncretu, coordinende is resorsas comunales, regionales e istatales, pro nche fàere essire is personas prus pòberas dae s’istadu de abisòngiu.
Giòbia 12: A comente aiat promìtidu s’Assessora a s’Ambiente de sa RAS, su Servìtziu de Valutatziones Ambiantales de s’Assessoradu a s’Ambiente at cunvocadu sa cunferèntzia de is servìtzios pro su progetu de s’Eurallumina. A pustis de duos annos e mesu – fiat su 10 de mese de argiolas 2014 candu sa Rusal aiat presentadu a sa RAS su progetu – iat a dèpere acabare su protzedura pro autorizare s’Eurallumina a torrare a produsere in s’istabilimentu de Portovesme. In totu ant a èssere 23 is sugetos (istitutziones, entes e agèntzias) chi ant a detzidere su benidore de sa fàbrica e de is traballadores.
Cenàbara 13: Su Movimento 5 Stelle de Carbònia, in sa pàgina facebook cosa sua at atacadu s’Amministratzione Comunale de Masainas. Cummentende su comunicadu s’istampa in ue is comunos de su distretu socio-sanitàriu de Carbònia ant decraradu chi ant dimandare informatziones e inditos a sa RAS pro s’atuatzione de su REIS (su Rèdditu de inclusione sociale) su M5S carboniesu at iscritu chi su sìndigu e su vicesìndigu de Masainas sunt creende illusiones in sa conca de sa gente e ant nadu puru chi in d-una riunione chi s’est fata a mangianu in Carbonia, is assessores a is servìtzios sociales de is comunos de su PLUS de Carbònia ddos certados pro custu fatu.
Is òrganos de istampa ant creadu meda entusiasmu e finas unu pagu de confusione in contu de s’atu de inditu de su Comunu de Masainas (càstia cantu iscritu in mèruris 12) e custu fatu at postu in “imbaratzu” unas cantu amministratziones sulcitanas. Duncas is rapresentantes de custas amministratziones dd'ant fatu presente a su vicesìndigu Portas e dd’ant nada puru chi fiat istadu prus giustu a avisare is àteras amministratziones de custa initziativa pro chi essint istètias prontas a rèspundere a is citadinos chi ddis essint pregontados informatziones. Su vicesìndigu Portas at nadu de èssere in bona fide e at cumpartzidu cun totus is informatziones chi teniat.
Perou custa essida no est pràghida a medas assessores e sìndigos de su Sulcis de Bàsciu, proite a parridade de un'assessore custu tipu de comunicatzione, est a nàrrere su de atacare a manera dereta is personas, no agiudat sa collaboratzione intro de is amministratziones locales.
Sàbudu 14: Is Carabineris sighint is averguaduras pro is indennizos a is piscadores. Cust’orta ant denuntziadu a 10 personas de Teulada: 6 piscadores, 1 armadore e 3 vìgiles urbanos. Is piscadores chi sunt de una cooperativa locale ant incassadu, pro is annos 2014 e 2015, 160mila èuros de indennizu sena de nde tènnere deretu. Pro otènnere su 70% de indennizu in prus, is barcas depent tènnere s’atracu permente in comunu de Teulada o de Sant’Anna Arresi. Is vìgiles ant tzertificadu chi sa barca fiat atracada in Porto Budello ma is Carabineris ant istabilidu chi in cussu periodu sa barca s’agataiat in su mollu “Il lido” in comunu de Sant’Antiogu.
