Sa cida sulcitana in curtzu. Dae su 5 a s’11 de freàrgiu
Domingu 5: S’amministratzione comunale de Sa Baronia-Villaperùciu, in sa pàgina Facebook sua, at annuntziadu chi a lestru ant a cumentzare is traballos pro acabare de modernare sa pratza de s’asilu (s’at a aberrere un’àtera intrada pro mellus siguresa de is pipios) e chi, a comente ant a lòmpere is autorizatziones, ant a cumentzare is traballos (200.000 èuros finantziados cun fundos comunitàrios e de su bilànciu comunale) pro torrare a fàere un’arruga de su centru istòricu.
Lunis 6: Is Carabineris de s’istatzione de Sant’Antiogu cun s’agiudu de cussos de sa cumpangìa de Carbònia, de s’iscuadrone eliportadu de is Cassadores de Sardigna e finas de is unidades cinòfilas lòmpidas dae Casteddu, ant arrestandu a duas personas de Caleseda e a duas de Sant’Antiogu. Is chi ant arrestadu sunt imputados de minetzas, de aere atacadu fogos in su sartu e de aere mòdificadu armas. De custos unu dd’ant postu a is arrestos domiciliares, is àteros 3 nche ddos lòmpidos a su presone de Uda.
Martis 7: Luegus in Sant’Antiogu at a abèrrere sa de tres potecarias. Sa potecaria noa dd’iant a dèpere abèrrere in s’arruga Mateotti, in d-una zona chi finas a imoi at tentu pagos servìtzios. Is potecarias previstas fiant 4, ma in su in su 2014, candu sa Regione aiat fatu is assegnatziones, mancaiant 181 residentes pro pòdere abèrrere un’àtera puru e duncas, sende chi lege prevedit chi in dònnia comunu nche-nde siat una dònnia 3850 residentes, s’amministratzione comunale at revisionadu sa pianta orgànica lassende-nde sceti 3.
Mèrcuris 8: Sa cunferèntzia de servìtzios at cunsideradu non vinculante sa parridade negativa donada dae su MIBACT pro chistiones de tutela de su paesàgiu e duncas at donadu su via lìbera a su progetu de 200 miliones de èuros de sa RUSAL pro torrare a produsere in s’istabilimentu de s’Eurallumina de Portovesme.
Pro otènnere su eja definitivu ammancat is integratziones de sa sienda (chi ddas at a donare in intro de 60 dies) e sa delìbera de sa Giunta Regionale. Soddisfatzione e grandu prexu de is operaios chi ant ismobilitadu su presìdiu cuncordadu in sa sala riuniones de su palàssiu de sa regione in Arburada Trento.
Giòbia 10: Giuseppe Casti, s’ex sìndigu de Carbònia, in sa pàgina Facebook cosa sua at atacadu s’amministratzione comunale a 5 Isteddas. A parridade de Casti is servìtzios chi s’amministratzione at tancadu s’istadi passada (ludoteca, colònia marina, informagiovani, e s’asilu-nido) ant a abarrare serrados ocannu puru proitè chi in su bilànciu no ant postu dinari e sichei is pipios e is famìlias insoro nd’ant a pagare is conseguèntzias. Dd’at arrispùndiu cun d-una intervista radiofònica s’assessora is servìtzios sociales Loredana La Barbera, narende chi su chi at decraradu Casti est fàulas e chi no est giustu a nche pònnere is pipios in mesu pro iscopos polìticos.
Cenàbara 10: in Casteddu si sunt atobiados is sìndigos de is comunos de su Geoparcu cun is rapresentates sindacales, s’assessore a is Entes Locales Cristiano Erriu e su capugrupu de su PD in consìliu regionale Pietro Cocco, pro circare de agatare una solutzione a su problema de is 500 traballadores de s’ATI-IFRAS chi dae su primu de gennàrgiu sunt sena de cuntratu e sunt pighende de is ammortizadores sociales. Cocco e Erriu ant ispiegadu is possibilidades de su bandu emìtidu dae sa RAS (iscadit su 18 de custu mese) pro torrare a regòllere custus traballadores. Dae una parte est necèssariu a “sistemare” (massimamente pro sa RAS) in calincuna manera custos traballadores chi tenent professionalidade manna (medas de custos ant fato pro annos in cantieris de forestatzione e archeològicos), dae s’àtera is comunos tenent sa necessidade de personale cualificadu. Duncas su giogu paret bellu e fatu ma, a dolu mannu, is cosas non sunt aici fàciles. Defatis unas cantu sìndigos ant fatu presente chi nche sunt vìnculos de bilànciu de rispetare e chi medas problematicas depiant èssere afrontadas cun prus atentzione in is tempos giustos.
Sàbudu 11: est incumentzada in Giba e in Masainas sa de duas editziones de “Walyaan, Cinema Migrante” sa rassegna cinematogràfica organizada dae s’assòtziu Sunugaal cun su contributu de sa RAS. Ocannu nc’ant a èssere 15 proietziones (cun film de su Senegal, Mali, Burkina Faso) in 12 sedes diferentes. Pro sa gente est un ocasione de importu mannu: defatis nc’est s’oportunidade de biere, a in donu, film de cualidade e massimamente de castiare a sa situatzione de s’Àfrica sub sahariana cun is ogros de registas africanos sena de àteros “filtros”. Òspite de sa rassegna est su regista senegalesu Moussa Sene Absa chi at bintu medas prèmios in is circuitos de cìnema internatzionales.
