Sa cida in curtzu Dae su 29 de gennàrgiu a su 4 de freàrgiu
domingu 29: is rapresentantes de VisitSulcis, sa retza chi regollet, impresas privadas (is afiliados sunt giai 100) chi traballant in su setore de su turismu e de amministratziones locales (15 comunos de s’ex provìncia de Carbònia-Igrèsias), sunt andados a sa fiera de su turismu de Zurigo e ant ammonstradu is bellesas de su Sulcis-Iglesiente a is tour operators isvitzeros. Si si pigat a cunsideru su fatu chi su Sulcis-Iglesiente fiat s’ùnica zona de sa Sardigna rapresentada a manera unitària su territòriu nostru at donadu un sinniale de unidade bellu meda chi lassat isperare bene pro su benidore. Is prospetivas pro s’isvilupu de su setore turìsticu sunt bonas: est berus chi su Sulcis aciapat sceti su 2,5% de is presèntzias turìsticas de totu sa Sardigna, ma est berus puru chi su Sulcis-Iglesiente a s’èsteru e finas in Itàlia est connotu ancora pagu o nudda, duncas is potentzialidades de atratzione sunt mannas meda. Su mese chi intrat Visit Sulcis at a andare a sa fiera de su turismu de Berlinu pro propònnere sa zona nostra a is operadores tedescos.
Lunis 30, Martis 31, Mèrcuris 1: Is traballos de sa cunferèntzia de servìtzios chi depiat detzìdere su benidore de s’istabilimentu de s’Eurallumina de Portovesme sunt istados agiornados a s’8 de friàrgiu. Nche fiant is rapresentantes de 23 entes chi depiant analizare sa proposta de sa RUSAL pro torrare a abèrrere s’istabilimentu. Is funtzionàrios de su Ministeru de is Benes e Atividades Culturales e de su Turismu (MIBACT) ant donadu parridade negativa su pianu de 200milione de sa RUSAL pro chistiones de tutela de su paesàgiu.
A pustis de custa nova mala pro medas esponentes polìticos ant criticiadu a sa positzione espressada dae su MIBACT. A parridade de Cristiano Erriu, chi est assessore a is Entes Locales de sa Regione, is rapresentantes de su Guvernu fiant ischitzofrènicos: dae una parte su Ministeru pro s’Isvilupu Econòmicu e sa Presidèntzia de su Consìliu ant donadu parridare positiva, dae s’àtera su MIBACT at interpretadu a manera unilaterale su pianu paesagìsticu regionale candu is ufìtzios de sa tutela de su paesàgiu de sa Regione aiant giai donadu su via lìbera. Erriu at aciuntu chi non si podent tutelare benes chi no esistint prus e chi non si podet lassare su polu industriale comente un’area pro una simpli “ri-naturalizatzione”.
Is senadores sardos de su PD (Lai, angioni e Cucca) ant iscritu a su ministru de s’Ambiente donende arresone a s’assessore Erriu, cumbidende su Guvernu a faeddare cun d-una boghe sceti. Crìticos puru is consilieris regionales Gigi Rubiu (UDC) e Ignazio Locci (FI). Petantis unu grupu de operàios pro protestare contras a custu rinviu a sa procedura autorizativa chi est durende dae 923 dies at acupadu sa sala de is riuniones de su palàssiu de sa Regione in arburada Trento.
Giòbia 2: In Carbònia s’est dimìtidu s’assessore a s’urbanìstica Ricardo Cireddu e si aberrit una fase de arresonamentos in su M5S carboniesu. S’essida dae s’àula de sa magiorantza in s’ùrtima setziada de consìliu comunale pròpiu candu su vicesìndigu fiat ispieghende sa proposta de deliberatzione pro s’urbanizatzione in Campu Frassolis (s’assessore Cireddu non fiat presente) at lassadu ispantada s’opositzione chi at dimandadu is dimissiones de totu sa giunta comunale. Custa atzione, chi est una de is formas de protesta prus mannas chi si podent fàere in is assembleas, est unu sinniale forte meda de problemas in intro de su grupu chi est amministrende sa tzitade.
Canàbara 4: Beranu chi benit puru in Nuxis s’at a votare pro su sìndigu e pro rennoare su consìliu comunale. Pro imoi e tanti candidados a manera ufitziale no nde sunt essidos ancora, ma a comente est normale, is boghes sunt cumentzende a cùrrere. Paret siguru chi su sìndigu Roberto Lallai no at a circare su de tres mandados a is eletores e fortzis at a agiudare una lista in ue ddoe ant a èssere una parte de su chi abarrat de magiorantza sua cun d-una parte de is chi sunt a s’opositzione. Is bene informados narant chi s’ex vicesìndigu Mariano Nonnis, chi a pustis de ses meses de mandadu s’est dimìtidu e est passadu a s’opositzione, siat traballende a una lista sua giai de diora cun su restu de s’opositzione e àteras personas chi finas a imoi no at fatu mai polìtica. Paret puru chi unu grupu de giòvanos siat provende a apariciare sa de tres listas pro faere sa brulla a is “bècios” de sa polìtica locale.
Sabudu 4: Su ministru de s’isvilupu econòmicu Calenda at cunvocadu in Roma is rapresentantes de sa RUSAL e s’assessore a s’indùstria de sa RAS pro circare de risòlvere sa chistione. Dd’at anuntziadu sa RSU de s’Eurallumina chi est sighende a acupare sa sala riuniones de su palàssiu de sa Regione in arburada Trento.
In s’aula consiliare de Santu Giuanni Suèrgiu sa Pro Loco in pari a su sìndigu Elvira Usai at prese
