Sa cida sulcitana in curtzu. Dae su 22 a su 28 de gennàrgiu
Domingu 22 e Lunis 23 In dònnia bidda ant incumentzadu a contare s’iscònciu fatu dae is travessuras de bentu de sàbudu passadu: barcas aciuvadas in is portos de Sant’Antiogu e de Teulada (cun plàgias isperèssidas); matas iscosciadas e naes iscavuadas in mesu de is moris in Sa Baronia, in Santadi e in Masainas; muros bècios sciusciados in Narcau. Sa pròpiu cosa in sa zona de su Cixerri cun crobeturas de domos privadas e fàbbricos pùbblicos imboladas (in Bidda Matzraxia e in Domus Noas), in Musei sciusciadu unu faru de su campu isportivu. Situatzione bastante difìcile in Nuxis, abundi sa gente non tenent regordu de una temporada sìmbile, cun sa currente elètrica chi est torrada in is domos a pustis de duas dies.
Martis 24: Sa RSU de s’ Eurallumina s’est atobiada cun is rapresentantes de entes e de agentzias chi sunt coinvòlgidas in sa cunferèntzia de servìtzios chi s’at a fàere su 30 e su 31 de custu mese. Ant chistionadu cun Cristiano Erriu chi est s’assessore a is Entes Locales, cun su diretore generale de s’ARGEA in s’assessoradu a s’Agricoltura, e sa segreteria de s’assessore a sa sanidade Arru. In prus ant protocolladu a su Comunu de Casteddu, in sa Cuestura is rechestas pro is autorizatziones pro is manifestatziones de 30 e de su 31 chi benint.
Mèrcuris 25: in Santu Giuanni Suèrgiu s’est fatu unu cunvegnu a pitzus de su turismu religiosu in Sardigna. Su sìndigu Elvira Usai at coordinadu is traballos, est intervènnidu Pierpaolo Pisu chi est su diretore de su servìtziu de promotzione de s’Assessoradu Regionale a su Turismu chi at ispiegadu s’istrategia de sa RAS in contu de turismu religiosu e totus is normas e is proceduras burocràticas necessàrias pro incarrerare una initziativa de custu tipu. A pustis at faeddadu Giampiero Pinna, su presidente de s’assòtziu Pozzo Sella chi, at contadu totu su traballu fatu pro traciare su Camminu de Santa Bràbara e in prus at ispiegadu is caraterìsticas de sa tapa chi passat in su sartu de Santuanni. At serradu is traballos s’assessora a su turismu de Santuanni Camilla Melis chi at presentadu is manifestatziones e is ideas de s’Amministratzione in contu de su turismu pro su benidore.
Giòbia 28: In sa pàgina facebook cosa sua su consilieri regionale de Forza Italia Ignazio Locci atacat a s’assessore regionale a is trasportos Paolo Manichedda. Locci at decraradu chi su finantziamentu de 9 miliones de èuros pro is òperas portuales in Sant’Antiogu est isparèssidu e chi invècias sunt abarrados 2 miliones sceti pro is portos de Caleseda e Carloforte. Mario Corongiu, su sìndigu de Sant’Antiogu, no est de acòrdiu cun custa positzione e semper via Facebook faghet scire ca su finantziamentu pro su portu de Sant’Antiogu est passadu dae 9 a 12,5 miliones de èuros.
Cenàbara 27: S’est celebrada puru in su Sulcis sa Giorronada de sa memòria. In Igrèsias in sa biblioteca comunale ant abertu sa mostra fotogràfica chi at abarrare aberta finas a su 4 de friàrgiu: “Shoah… per non dimenticare”. A mangianu in sa sala de su Consìliu Comunale de Santu Giuanni Suèrgiu is iscolanos ant ascurtadu ligiduras e bistu secuèntzias de immagines, a merie su giornalista Giampaolo Cirronis at contadu s’esperièntzia de Modesto Melis in su campu de cuncentramentu de Mathausen. Su SBIS (su Sistema Bibliotecàriu Interurbanu de su Sulcis) at curadu laboratòrios pro is piciocheddos de is iscolas mèdias de Santadi, Sant’Antiogu e Bidda Matzràxa. In su Cineteatru de Carbònia ant proietadu su film-documentàriu “Un viaggio dentro la memoria” chi contat s’esperièntzia de is piciocos sardos chi sunt andados a Cracovia, gràtzias a s’initziativa “Promemoria Auschiwitz” incarrerada dae s’ARCI e s’assòtziu Deina.
Cunsiderende is tempos chi seus connoscende, custu tipu de manifestatziones, chi faghent a connòscere a is prus giòvanos su chi est acuntèssidu in s’Europa, chi incora oe est cunsiderada su coru de sa tziviltade in su mundu otzidentale, sunt semper prus importantes. Is forros e nemancu is salas abundi bociant sa gente a gas no nche sunt prus, ma sa prepotèntzia e is angarias sighint dònnia die. Duncas est giustu chi is giòvanos cumprendant cale est sa parte giusta pro chi is identidades e is ideas diferentes bengant semper rispetadas.
Sàbudu 28:Beranu chi benit in Sant’Antiogu si votat prois eletziones amministrativas e sunt essende a craru is chi si candidant a sìndigu. Su grupu de Genti Noa at fatu scire chi su candidadu est Alberto Fois. Invècias su grupu “Sant'Antioco Attiva“ proponit s’ex vicesìndigu Massimo Melis. Marco Fontana, chi fiat presidente de su Consìliu Comunale in sa primu legisladura de Mario Corongiu, at nadu chi s’at a presentare finas su “Partito dei Sardi”. Invècias non si scit nudda de sa lista chi at a provare a sighire su traballu fatu dae sa magiorantza chi imoe est guvernende in Sa Idda: paret chi siant ancora circhende unu candidadu o mancai una candidada forte. Su pròpiu ballet pro Ignazio Locci, consilieri regionale de Forza Italia. Gente meda narat chi est una persona sèria e de gabbale e chi si candidat bincit de siguru ma pro imoi Locci non at torradu sceda ancora.
Roberto Pinna
