Sa cida sulcitana in curtzu. Dae su 5 a s’11 de martzu

Sa cida sulcitana in curtzu. Dae su 5 a s’11 de martzu

Domingu 5: s’amministrazione comunale de Masainas at cuncordadu de fronte a su campu isportivu una filera de trastos pro fàere ginnàstica. Is masainesos ant apretziadu s’idea e est andada puru gente dae is biddas lacanantis a ddos provare. Su chi lassat ispantados est su resurtadu clamorosu chi at otentu su post in Facebook: in 24 oras dd’ant cumpartzidu 150 personas e dd’ant castiadu prus de 20.000 personas. De siguru una manera interessante, s’iat a pòdere nàrrere “unu casu de istùdiu”, de prommovere s’atividade de s’Amministratzione Comunale e su nùmene de sa bidda.

Lunis 6: Sunt incumentzados is traballos in su cantieri de forestatzione in s’àrea de su parcu archeològicu de Montessu in Comunu de sa Baronia-Villaperùciu. Su cantieri, finantziadu cun 70mila èuros dae sa RAS, at a donare traballu a 9 residentes disocupados pro unas cantu meses.

Su sìndigu de Carbònia Paola Massidda at firmadu in Palàssiu Chigi sa cunventzione cun su Guvernu pro su bandu natzionale de is periferias de is àreas urbanas. De is 120 progetos presentados cussu de s’amministratzione carboniesa est lòmpidu a su de 42 postos. Luegus in is càscias comunales at a lòmpere unu finantziamentu de 8 miliones e 260mila èuros.

martis 7: In Casteddu ant incingiadu sa sede operativa noa de sa Provìncia de su Sud Sardigna chi regollet 107 comunos de is ex provìncias de su Campidanu de Mesu, Carbònia-Igrèsias e totus is comunos de sa provìncia de Casteddu chi non sunt intrados in sa Citade Metropolìtana de Casteddu. Ma su prexu pro custa nova in su Sulcis-Iglesiente est pagu. Gianfranco Trullu, presidente de s’Unione de is Comunos de su Sulcis, at decraradu ca imoi Carbònia arriscat de abarrare sceti comente “cascita de sa posta” e at sinnialadu s’isproportzione manna de personale cunfronta a su territòriu e a is residentes chi esistit intr’e sa citade metropolitana e sa provìncia noa. Cristiano Erriu, s’assessore regionale a is Entes Locales at decraradu chi Carbònia pro imoi at a abarrare sede de su Consìliu (s’at a votare a pustis de is eletziones amministrativas imbenientes) e chi fiat necessària un’àtera sede perifèrica prus centrale cunfronta a Carbònia.

mèrcuris 8: in Sant’Antiogu est incumentzada sa rassegna “Cinema Sociale” organizada dae s’assessoradu a si servìtzios sociales de Sant’Antiogu e sa Società Umanitaria cun su contributu de sa RAS. Sa rassegna bollet èssere unu percursu in 6 tapas pro istimolare s’arrexonamentu de su pùbblicu in contu de tematicas importantes comente sa violèntzia a pitzus de is fèmminas, su de tènnere fillos, su bullismu, s’autismu, s’afidu familiare e sa sustenibilidade ambientale. Totus is proietziones s’ant a fàere in sa sala de su Consìliu Comunale (15 - 22 - 29 de martzue e 12 e 19 de abrile) e pro s’intrada non si pagat nudda.

Giòbia 9: s’assòtziu culturale Lee Van Cleef chi organizat su festival rock “Summer is Mine Festival” at annuntziadu chi ocannu sa de 5 editziones s’at a fàere sceti in sa miniera de Monteponi de Igrèsias su 28 e su 29 de mese de argiolas. Sa cosa curiosa est chi is organizadores de s’eventu ant cambiadu idea 3 bortas cun 3 comunicados diversos: in su primu ant annuntziadu sceti Igrèsias; apoi ca faghiant 2 tapas puru in Carbònia in su primu fin’e cida de austu;in s' ùrtimu ant torradu a decrarare chi s’at fàere sceti in Igrèsias ma ca sighint a abarrare in cuntatu cun s’amministratzione comunale de Carbònia.

Cenàbara 10: sunt incumentzados in sa plàgia de Su Paris, in comunu de Masainas, is trabalos pro fraigare su portixeddu. Su finantziamentu (500mila èuros de s’ex provìncia de Carbònia-Igrèsias) previdit chi si fatzant pontiles de linna chi apoxant in blocos de ciumentu. S’istrutura in totu at a mesurare 280 metros e at a tènnere logu pro prus de 100 barcas. Est previstu puru chi nche lòmpat sa currente elètrica e sa rete de s’àcua.

Sàbudu 11: in d-unu bar in Carbònia unu grupu de citadinos at fatu unu comitadu pro regòllere firmas pro una proposta de lege pòpulare pro istituire una provìncia noa in su Sulcis-Iglesiente e pro dimandare su decentramentu de is ufìtzios pùbblicos regionales e istatales. A parridade de chini iscriet custa initziativa est bastante curiosa. Defatis in su 2012 eus votadu unu referendum consultivu pro nche bogare is provìncias noas e mancai apat votadu sceti su 35% de is sardos su resurtadu (aiat bintu su eja) fiat vàlidu. Sichei sa RAS at cummissariadu is totus is 8 provìncias e at fatu una lege de riforma de is entes locales (L.R. 2/2016) istituende is Uniones de is Comunos. Su pòpulu at nadu ca no a sa lege de riforma costitutzionale de su 2016 in ue fiat previstu puru de eliminare is provìncias a livellu natzionale (in su Sulcis su no at bintu cun su 75%) e imoi calincunu dimandat de torrare a istituire una provìncia prus pitica. Fortzis s’ùnicu est tènnere a is provìncias aici a comente sunt disegnadas dae sa lege regionale noa,torrende a ecuilibrare s’isproportzione de personale chi s’est creada cun sa Citade Metropolitana, lassende sceti cumpetèntzias in contu de edilìtzia iscolàstica e istradas e de donare dinari e personale a is Uniones de is Comunos pro chi potzant funtzionare diaderus.