Sa cida in curtzu. Dae su 12 a su 18 de martzu
Domingu 12: at tentu unu resurtadu bonu sa mostra “Bistimentas Antigas” (prus de 300 bisitadores), su primu eventu pùbblicu apariciadu dae is piciocos de s’assòtziu “Antica Città di Sulky”, in sa sala de is Sufeti in su palàssiu de su Capìtulu de Sant’Antiogu.
Is rapresentantes de Visit Sulcis, sa retza de impresas privadas chi traballant is su setore de su tursimu (prus de 100 is afiliados) e amministratziones locales (15 comunos de s’ex provìncia de Carbònia-Igrèsias), fiant in sa fiera de su turismu de Berlinu aundi ant incumentzadu a pigare cuntatos cun is operadores tedescos. A parridade de Visit Sulcis is prospetivas pro su benidore sunt bonas proite chi sa zona nostra est connota pagu e nudda dae is tedescos e in prus fiat s’ùnica zona de Sardigna rapresentada in manera unitària e duncas at donadu s’idea de unione e collaboratzione a intrus de su territòriu.
Lunis 13: In su situ web de s’AIAS de Casteddu est aparèssidu unu communicadu cun su cale sa sienda s’est chesciada ca medas amministratziones comunales de s’ex provìncia de Carbònia-Igrèsias ddi depent dinari meda. Sigundu is datos donados dae s’AIAS is comunos sulcitanos depent in totu prus de 888mila èuros summende sa cuota sociale non versada (periodu 2014-2016), ispesas de trasportu non pagadas (1985-2016), e is ispesas de atendèntzia (1990-2016),
Martis 14: Is sìndigos sulcitanos no ant agradèscidu su comunicadu de s’ AIAS cun su cale sa dita at imputadu is amministratziones comunales de tènnere dèpidos. Is sìndigos ant verificadu cun is ufìtzios e su chi est essidu a pillu non torrat cun is datos donados de s’AIAS ma antzis asserit ca est pròpiu s’ AIAS a tènnere dèpidu cun is amministratziones locales. Su sìndigu de Carbònia Paola Massidda at decraradu chi est istudiende sa situatzione cun s’ufìtziu legale de su Comunu prò cumprèndere si est su casu de duntziare s’AIAS pro difamatzione. De sicuru faghet ispantu mannu chi sa sienda si pongat a circare a is comunos dèpidu bèciu de 20 e prus annos.
Mèrcuris 15: Su tempus de is eletziones amministrativas est incurtzende e sunt incumentzende a essire is nùmenes de is chi si candidant a sìndigu in is 4 comunos sulcitanos chi ant a votare beranu chi benit. Est craru chi is candidados ant a èssere siguros sceti candu s’ant a presentare is listas ma pro imoi in Sant’Antiogu, aundi sa campagna eletorale est giai incumentzada dae unas cantu cidas, si osservant sceti is manifestos de Alberto Fois (Genti Noa) e Massimo Melis (Sant’Antioco Attiva); non si scit nudda de su grupu chi est magiorantza in consìliu comunale e sustennit Mario Corongiu (chi assumancus pro sìndigu non si podet torrare a candidare) e nemancu Ignazio Locci, consilieri regionale de Forza Italia, at detzìdidu si si candidat. In Portescusi e in Carloforte s’iant a dèpere torrare a candidade is sìndigos chi nche sunt imoe: Giorgio Alimonda e Marco Simeone. In Nuxis pro imoi est essida a craru sceti sa lista chi sustenit s’abogau Andrea Pubusa.
Giòbia 16: a sa una de note est iscopiada una bomba in sa màchina de su sìndigu de Domus Noas Massimiliano Ventura chi fiat parchegiada a pagu tretu de domu sua. Su sìndigu at nadu ca non scit ispiegare custu fatu a pustis de 9 meses de mandadu e chi at arrìtzidu medas lìteras e messàgios anònimos (sa primu lìtira a 10 dies de su votu) ma ca at a sighire a andare a innantis cun s’atzione amministrativa sua. Is Carabineris de sa cumpangia de Igrèsias sunt indaghende.
Cenàbara 17: a pagu tretu de Cussòrgia in comunu de Caleseda est partidu su primu fogu de ocannu. Ant pigau fogu duos ètaros de terrenu. Is iscuadras de volontàrios de sa “Protezione Civile Assossulcis”, de is pompieris de Carbònia e de is guàrdias forestales nc’ant postu duas oras pro nde-ddu istudare e pro bonificare sa zona.
Est essidu su calendàriu de sa Primavera Sulcitana. Sa manifestatzione, lòmpida a sa de 3 editziones, incumentzat su 6 de maju in Igrèsias e acabat su 28 de làmpadas in Carloforte. Ocannu is comunos chi partecipant sunt 6 sceti (a is 2 giai arremonados tocat a aciùngere S.A. Arresi, Narcau, Teulada e Caleseda). In su mentris si movint totus is amministratziones de s’ex provìncia de Carbònia-Igrèsias: is comunos de s’unione Metalla e il Mare sunt aprontende sa primu editzione de “Sulcis Iglesiente in Fiore”; unas cantu comunos de su Sulcis de Bàsciu sunt arrexonende in pari pro abèrrere una retza de infopoint assumancus pro s’istade; in Sant’Antiogu torrant a fàere, a pustis de un’annu de polèmicas, sa fiera nàutica “Laguna Espone” in su lungomare.
Sàbadu 19: Su guardiacoste Paolini de su grupu arenovale de sa Guàrdia de Finantza at intercetadu unu barca cun 15 algerinos (ddoe fiat puru una fèmina) a pagu tretu de sa costa de Sant’Antiogu. Is finantzieris ant iscortadu sa barca a su portu-canale de Casteddu. Inias ant isbarcadu is algerinos e a pustis de is operatziones de identificadura nche ddos ant lòmpidos a unu centru de collidura.
