Sa Cida in curtzu. Dae su 19 a su 25 de martzu
Domingu 19: Nc’est istètiu un’àteru isbarcu de algerinos in sa costa de sulcitana. Cust’orta is Carabineris de Cumpangia de Carbònia ant agatadu a 9 algerinos in sa zona de su polìgonu de Capo Teulada. Comente semper nde-ddos ant arrigotos e lòmpidos a Casteddu pro is operatziones de identificadura e is bìsitas mèdicas.
Lunis 20: Alberto Satannino, chi est su diretore de su servìtziu ispetivu de is Guàrdias Forestales de Igrèsias, at donadu unu pagu de nùmeros in contu de operatziones de controllu fatas custu ierru passadu in is montes e in su sartu de su Sulcis de Bàsciu. Is Forestales ant denuntziadu a 12 personas, nd’ant bogadu 100 retzas e 350 tràpulas pro cassare pillone de tàcula, 120 crobos de atzàrgiu parados pro cassare a sirbone. Satannino at ispiegadu chi su de andare a s’orbetu e de parare tràpulas pro gente meda est una manera alternativa da guadàngiare unu pagu de dinari.
Martis 21: S’est fatu in Igrèsias su cungressu territoriale de sa CISL chi at riunidu 82 delegados de totus is categorias. S’assembea at cunfirmadu Fabio Enne segretàriu e cun issu intrant in segreteria puru Laura Puddu e Roberto Fallo. Enne in sa relata sua at donadu is nùmeros de sa situatzione drammàtica de su Sulcis-Iglesiente chi est dònnia annu peus: mancai siat operativu giai dae annos su Piano Sulcis, sunt abarrados sceti 130mila residentes, de custos 38mila sunt disocupados e nc’at gente meda chi ormai traballu mancu nde circat prus proite est iscrètida. Enne at regordadu puru chi sena de indùstria su territòriu non podet andare a innantis e finas totus is àteros setores comente s’artigianau, su turismu e s’agricoltura no arrinnescint a fàere tretu. Pro custa situatzione at ghetadu is curpas a sa polìtica, massimanete cussa regionale, chi est tropu indiferente a is problèmaticas sulcitanas.
Mèrcuris 22: su ministru Carlo Calenda at cunvocadu is organizatziones sindacales de sa Fim, Fiom e Uilm pro relatzionare in contu de sa vertèntzia Alcoa. Defatis sa Sider Alloys, sa sienda isvitzera chi est interessada a comporare s’istabilimentu ALCOA de Portovesme, at mandadu su Business Plan a su Guvernu e a Invitalia (chi est sa sotziedade incarrigada dae su MISE de sighire sa tratativa). Totus, massimamente is traballadores, sunt abetende novas bonas.
Giòbia 23: is Carabineris ant cassadu a is 2 piciocos (toteduos pregiudicados) chi sunt intrados a furare sigaretas e su dinari de is slot-machines in s’Aladyn Cafè de Sant’Antiogu cenàbara a note passada. Custos giòvanos pro non si fàere a connòscere si fiant postos tutas e cuguddos biancos tanti chi pariant is personàgios de su film “Ghostbusters”. Mèrcuris unu de custos fiat guidende unu scooter chi fiat malipigadu e aici is Carabineris ant tentu un’iscusa bona pro ddu firmare. Apoi sunt andados a su domicìliu suu e ddoe ant agatadu 150 pachetus de sigaretas (chi ant torradu a su mere de su locale), is tutas chi ant oberadu pro si mascherare e puru su strexu aundi nche ruent su dinari ghetadu in is machinetas papa-dinari.
Cenàbara 24: Is comunos de Caleseda, Carbònia, Santu Giuanni Suergiu, Sant’Antiogu e Carloforte ant abertu su servìtziu “ C.I. S.I.A.M.O.” chi at a èssere incarreradu cun sa collaboratzione de su centru EURODESK de Sant’Antiogu. Su servìtziu est destinadu a is giòvanos dae is 14 a is 30 annos e tenet pro iscopu cussu de incentivare is cumpetèntzias de istùdiu e de traballu. Sunt previstas atividades de orientamentu e cunsulèntzia individuale e de grupu siat pro is istudentes de is iscolas superiores e siat pro is piciocos prus mannos de edade.
Sàbudu 25: In Sant’Antiogu sunt essidas a craru àteras 2 listas chi s’ant a presentare a is eletziones amministrativas. Si scidiat giai dae unus cantu meses chi si depiant canddidare Massimo Melis (cun Sant’Antioco Attiva) e Alberto Fois (Genti Noa). Marco Massa, chi imoi est vicesìndigu at a ghiare su PD locale cun su chi abarrat de sa magiorantza in consìliu comunale, at decraradu chi a lestru ant a annuntziare s’iscuadra e ant a presentare su sìmbulu. Invècias Ignazio Locci at a fàere comìtziu su primu de abrile in Pratza Itàlia aundi at a presentare progetos e obbietivos pro sa bidda. In Nuxis at annuntziadu sa candidadura sua puru su giometra Andrea Deias cun d-unu bellu grupu de giòvanus (s’abogau Pubusa dd’iat fatu giai cida passada cun d-unu atòbiu a su centru sociale).
Roberto Pinna
