Sa cida sulcitana. Dae su 9 a su 17 de abrile
Domingu 9: Nche fiant puru 4 sìndigos sulcitanos (Bidda Massàrgia, Santadi, Giba e Masainas) in mesu de is 120mila fideles chi ant ascurtadu sa Missa de su Domingu de Prama chi at tzelebradu su Paba in pratza de Santu Perdu. Is sìndigos, acumpangiados dae s’assessore regionale a is entes locales Cristiano Erriu, fiant in rapresentantza de s’ “Associazione Nazionale Città dell’Olio” chi dònnia annu si impegnat a donare is olias pro sa tzelebratzione chi pretzedit Pasca Manna.
Lunis 10: in Igrèsias is migrantes ospitados dae sa comunidade Casa Emmaus ant a incumentzadu a donare cura a su birde pùbblicu. Pro istransire istumentalizatziones ant a traballare a in donu e s’ant pònnere una maglieta cun s’iscrita: “Sono un volontario”.
Martis 11: Su Consìliu Regionale at incumentzadu a resonare de sa chistione de s’AIAS chi no est paghende s’istipèndiu dae 9 meses a is traballadores suos. Est passadu, cun 26 votos a favore e 17 contras, un òrdine de is traballos propostu dae Pietro Cocco (PD) chi impegnat sa Giunta Regionale: a circare a s’AIAS sa tzertificatzione de is bilàntzos pro averguare si est berus chi nci siant amministratziones chi tenent dèpidu cun s’azienda e pro chi si prevedat chi in is cuntratos intru de s’AIAS e operadores privados nche siant claùsolas de salvaguàrdia pro is istipèndios de is traballadores chi si non sunt rispetadas podent èssere càusa de revoca de s’acreditamentu. In prus sa Giunta depet adotare un atu de indiritzu sigundu su cale su pagamentu de is istipèndios arretrados si fatzat sighende s’ex artìculu 1676 de su còdighe tzivile. Duncas su Consìliu Regionale, mancai magiorantza e opositzione non fessint de acòrdiu, at pigadu una positzione crara in favore de is traballadores chi sunt protestende.
Mèrcuris 12: custa cida in 5 isbarcos diferentes sunt lòmpidos 64 algerinos in sa costa sulcitana. Sa novidade est chi in 11 (8 òmines, 2 fèmminas e 1 pipia) sunt arribados in sa plàgia de Mari de Bàsciu in Comunu de Masainas. Comente semper nde-ddos ant pinnigados is Caribineris chi, a pustis de is bìsitas mèdicas, nche-ddos ant lòmpidos a unu tzentru de identificadura pro ddos rimpatriare.
Giòbia 13: S’est scìpiu ca Roberta Porru, sa fèmmina de 39 annos morta in s’uspidale Brotzu de Casteddu de chi at parturidu duas gemellas in su CTO de Igrèsis, s’est ispaciada pro mori de una emorragia a su ciorbeddu. Sunt in cursu tres inchiestas (una interna, una de sa Procura de sa Repùbblica e una de is ispetores de su Ministeru de sa Salude) pro circare de cumprèndere si nche siant responsabilidades de is dotores o si no at funtzionadu calincuna cosa a livellu organizativu. De siguru custu disgràtzia ghetat àteras umbras in su sistema sanitàriu sulcitanu.
Cenàbara 14: in Narcau ant presentadu su programma de totu is manifestatziones chi ant aprontadu is assòtzios locale chi s’ant a fàere dae su 25 de abrile finas a s’acabu de s’annu. Su programma est ricu meda e prevedit in totu de 35 giorronadas de eventos mùsicales (comente su Narcao Blues in mesi de argiolas), isportivos (su Bai e Torra in austu) e gastronòmicos (sa Sagra de su fasollu de Terreseu in mese de ladàmine) e no ant a amancare puru a is initziativas a iscopu sotziale e de solidariedade.
Sàbudu 15: Pasca Manna fortunada in sa ricevitoria de su lotu “Su Stangu” de Sant’Antiogu. Is meris in d-unu cartellu aiant cuntzilladu de giogare is nùmeros 30-33-90 (segundu sa càbala sunt is nùmeros de Pasca Manna) in sa roda de Palermu. Custos nùmeros sunt essidos in s’estratzione de cenàbara e in totu, is chi ant postu mente a su “cuntzillu”, ant bintu prus de 41mila èuros.
Domingu 16 e lunis 17: cun trancuillidade e sena de incidentes nche sunt passadas is festas de Pasca Manna. In totu sa zona nostra nche fiat gente meda girende: massimamente fiant sardos ma no ammancaiant turistas “continenteles” e s’est bistu puru calincunu istràngiu, pruscatotu de su Nord Europa. Is ristorantes e is sitos de interessu turìstiu fiant prenos in dònnia logu. Nùmeros mannos in Santadi: in prus de 750 sunt calados in sa Gruta de Su de Is Tzuddas (cosa chi non si bidiant dae parìcios annos) e in 200 sunt andados a bisitare su situ pùnicu de Pani-Loriga, unu resurtadu bonu meda si si pigat a cunsideru chi cussu situ dd’ant abertu s’istadi passada e duncas est ancora connotu pagu e nudda. Custos datos lassant isperare bene pro custa istadi chi benit.
R.Pinna
