Sa cida in curtzu. Dae su 18 a su 22 de abrile
Martis 18: In Carbònia ant presentadu su calendàriu de is manifestatziones apariciadas pro custu beranu e s’istadi chi benit. Su programma finas a imoi prevedit: “Carbonia in Fiore” su 29 e su 30 de abrile; “Primavera Sulcitana” paris a “Monumenti Aperti” su 13 e su 14 de maju; su 25 de làmpadas s’at a fàere “Sulcis Iglesiente Espone”; Notteggiando at a incumentzare in mese de argiolas e iat a dèpere andare a innantis finas a metade de cabudanni. Su programma abarrat abertu pro totus is àteras initziativas chi is assòtzios chi ant a bòllere presentare.
Mèrcuris 19: Mauro Frongia, 36 annos de Carbònia chef de su ristorante Tanit, est mortu in s’istrada provinciale 83 acanta de sa miniera de Acquaresi. Frongia viat viagende a motu e paret chi apat pèrdu su controllu de su mezu e apat istumbadu a is arrocas. Su corpu chi at pigadu fiat forte meda e candu su 118 est arribadu s’òmine fiat mortu giai. Su chi lassat ispantados est is parentes de su mortu ant scìpidu de sa disgràtzia dae Facebook in antis chi ddos essint avisados is Carabineris.
Giòbia 20: Su FAI – Sardegna (Fondo Ambiente Italiano) at pigadu positzione contras sa ripresa de sa produtzione de s’istabilimentu de s’Eurallumina e sa crèschida de su bacinu de si fangos rùbios. Is motivos de sa contrariedade sunt is pròpios inditados in sa relatzione de s’architetu Fausto Marino chi est su sopraintendente de a is benes paesagìsticos (su progetu cuntrastat cun su Pianu Paesagìstigu Regionale e andat a impeuare una situtzione ambiantale giae perigulosa) e in prus is de su FAI cuntestant su fatu ca in su territòriu si sighint a portare a innantis istrategias industriales chi finas a imoi sunt istadas fallimentares.
Cenàbara 21: S’Amministratzione Comunale de Bidda Massàrgia at detzìdidu de aderire a sa clàusola de salvaguàrdia de su Ministeru de s’Internu pro chi a su Comunu no ddi bengat a marolla a regòllere unu nùmeru indefinidu de migrantes istràngios in su territòriu. Duncas s’est fatu su progetu “Tutti giù per terra” cun su cale si circant famìlias disponìbiles a ospitare in totu 17 minores non acumpangiados cun s’agiudu de espertos postos dae su Comunu e cun d-unu contributu econòmicu mensile. Inùtile a iscriere ca sa polèmica est incumentzada sùbitu e pro ispiegare mellus custa initziativa est cunvocada un’assemblea pùbblica pro su 26 de abrile.
Sàbudu 22: in Santadi, s’archeòlogu Giovanni Ugas in pari a Nicola Sanna chi est su diretore de su Museo Archeològicu at presentadu s’ùrtimu traballu suo: “Shardana e Sardegna”. In s’òpera sua, giai 1100 pàginas chi regollet unu traballu longu 10 annos, su professore casteddaiu at dimostradu cunfrontende datos antropomètricos, iscobertas archeològicas e fontes de sa literadura antiga, ca is Shardana, is pòpulos de su mare alleados de is faraones egìtzios contras a is Ititas e is Miceneos, fiant gherreris chi beniant dae sa Sardigna nuraghesa.
