Sa cida sulcitana. Dae su 23 a su 29 de abrile
Domingu 23: Est andada bene meda sa de 14 Sagras de sa Canciofa in Masainas. In 4 dies de festa sa Pro Loco locale at serbidu a mesa prus de 1500 personas. In prus de papare a baratu pastos totu a base de canciofa, is chi sunt andados in sa bidda de Sulcis de Bàsciu ant pòtzidu ascurtare cunvènnios interessantes a pitzus de s’agricoltura, presentadas de libros e chini at bòfidu at partetzipadu a is escrusiones a pee, a bicicleta e a treninu turìsticu in su territòriu.
Lunis 21: no at ghetadu làndire comente in su nord de sa Sàrdigna, ma nc’at pentzadu su gelu caladu innantis de Pasca Manna a fàere iscònciu mannu in is bìngias. Aundi at calladu sa gelighia, in is territòrios de de Narcau, de Sa Baronia-Villaperùciu e Masainas, at abruxadu totu su sarmentu chi fiat boghende. Is Comunos interessados ant incarreradu sa protzedura pro dimandare is dannos a sa RAS e pro imoi si chistionat de assumancus coranta ètaros de bìngia fertos. Pro cumprèndere cantu est mannu su dannu bastit a pentzare chi, in mèdia, dònnia ètaru postu a bìngia produsit unu valore de assumancu 8mila èuros chi ant a amancare pro 2 annos e in prus tocat a aciungere is giorronadas chi ant a serbire pro traballare is fundos pro ddos fàere torrare a prodùsere. Su chi at fatu ispantu est chi gelighia s’est callada a sapus: in sa pròpiu bìngia si podent osservare òrdines cun su pàmpinu e is pèrtias sicadas e àteros sanos. Finas is prus antzianos non tenent regordu de una situatzione sìmile.
Martis 25: Fiat sa Festa de sa Liberatzione dae su nazifascismu. In Domus Noas ant donadu una targa a 5 òmines chi ant cumbàtidu in se segundu gherra mondiale, in Bidda Massàrgia in d-una tzerimònia pùbblica is amministradores ant arresonadu a pitzus de sa libertade. In is social network s’est bista gente meda chi at criticadu s’Istadu a bortas oberende puru paràulas “fortes”, narende in sustàntzia chi libertade no nde tenemus prus e chi s’Istadu faghet ischifu. Lassende a una parte is chistiones ideològicas e su revisionismu istòricu, a chini iscriet custa rubrica ddi paret ca est giustu a regordare a is chi ant criticadu s’Istadu, chi si ddu podent fàere est pròpiu proite chi semus in d-unu istadu democràticu fraigadu cun su sànguine de gente meda chi at donadu sa vida sua pro sa libertade. Is chi ant criticadu siguramente tenent una parte de arrexone: non semus bene postos e sa situatzione generale depet melliorare, ma in logu de abarrere iscriende chèscias e a non fàere nudda, iat a èssere mellus a si pònnere, doniunu pro su chi podet fàere e pro su chi ddu pertocat, a traballare pro circare de risòlvere problemas.
Mèrcuris 26: Est andada bene meda puru sa de duas editziones de sa Fiera de su Libru de Igrèsias cuncordada dae s’assòtziu ArgoNautilus. Sunt istadas 4 dies prenas de presentadas de libros, de debatas, de mostras e ispetàculos musicales apariciados in su tzentru istòricu. Sa temàtica de ocannu fiat sa Terra e su raportu de is òmines cun sa natura e su territòriu.
Giòbia 27: unu tataresu de 38 annos at furadu una màchina in Caleseda e pustis at cuntatadu su mere e dd’at circadu 200 èuros pro ddi torrare is craes de sa vetura sua etotu. Fatu istat ca su mere de sa vetura, unu piscadore de 40 annos, at fatu denùntzia e s’est presentadu a s’apuntamentu acumpangiadu dae is Carabineris chi ant arrestadu su furuncu e nche dd’ant lòmpidu a su presone de Uda a pustis de s’òrdine de su PM de turnu.
Cenàbara 28: in Sant’Antiogu cun s’abertura de s’infopoint turìsticu in sa ”ex Casa del Mutilato” e sa presentatzione in s’aula consiliare de is Annali di Archeologia, ocannu dedicados a sa Torrada de s’Arceri, sunt incumentzadas is manifestatziones pro sa de 658 Sagras de Sant’Antiogu.
Sàbudu 29: est incumentzada sa de XXI editziones de “Monumenti Aperti”, sa manifestatzione organizada pro fàere connòscere a su pùbblicu sitos naturalìsticos e monumentos de totu sa Sardigna chi costumant a èssere serrados. In su Sulcis at incumentzadu Portescusi chi at partetzipadu pro sa de 5 bortas. Est aproliada gente meda a bisitare is crèsias de sa Santa Maria de Ìtria e de Santu Antoni, sa tonnara, su turre ispagnola, sa Villa de su Marchesu e sa laguna de Bau Cerbus in Paringianu.
