Novas in sardu. Austu in curtzu
Polèmicas polìticas in primas duas cidas de su mese. In Sant’Antiogu su grupu de Genti Noa at fatu pònnere a is votos sa proposta decadèntzia de su sìndigu Ignazio Locci chi no est passada (sa magiorantza at votadu contras). Sa minorantza narat ca su sìndigu no est arrispetende sa promissa de lassare s’incàrrigu de consilieri regionale (sa lege regionale narat ca s’incàrrigu de sìndigu de unu comunu cun prus de 3mila abitantes est incompàtibile cun cussu de consilieri regionale) e finas sa giunta pro is eletziones de su Consìliu Regionale at dimandadu a Locci a resòlvere a lestru sa chistione (iat a dèpere intrare Paolo Dessì, s’ex sìndigu de Sant’Anna Arresi). Locci arrispundit chi issu est giai faghende su sìndigu a tempus prenu e chi tocat a sa Regione a nàrrere cale est sa protzedura pretzisa pro lassare s’incàrrigu, ma custa protzedura no esistit (nc’at sceti calincuna ipotesi “de iscola”).
Àtera polèmica ant fatu amministradores e consilieris regionales sulcitanos in contu de sa firma chi at postu su presidente de RAS Francesco Pigliaru cun su ministru de is trasportos Del Rio in s’acòrdiu pro sa ciclovia natzionale. Infatis su territòriu de su Sulcis est abarradu a foras de is 1250 km de su tretu chi passat in Sardigna. Sa RAS cun d-una nota at respùndidu chi in sa zona de su Sulcis sunt giai previstos 5 miliones e 700mils de èuros pro cumpletare is pistas ciclàbiles e chi at a traballare pro integrare is percursos sulcitanos in sa ciclovia natzionale.
Sunt duos is fatos de crònaca prus eclatantes de su mese de austu. S’11 is Carabineris ant’arrestadu a 2 corrieres de sa droga olandesos. Custos fiant firmos cun duas veturas in sa zona de Sant’Anna Arresi e una patùglia s’est firmada e ddis at pregontados aundi depiant andare, custos ant nadu chi si fiant pèrdidos pro mori de su navigadore e ca no isciant nemancu cun aundi depiant andare e cun chini si depiant atobiare. Duncas nche-ddos ant lòmpidos cun is veturas insoru a sa caserma de Carbònia e a intrus de una de is màchinas chi fiant controllende ant agatadu 11 kilos de cocaina pura, chi tenet su valore de 2 miliones de èuros. Su 12 in sa pineta de Monte Leone ant agatau su corpus de s’operàiu de 39 annos chi fiat isparèssidu dae Carbònia su mese passadu. Fortzis s’òmine s’est mortu de manu sua etotu ma in custu momentu sunt abertas àteras ipotesis puru e duncas su magistradu at ordinadu s’autopsia (is resurtados s’ant a ischire in 90 dies). Pariat chi si fessit firmada sa tontesa de atacare fogos in su sartu ma su 25 de austu, a de note, est partidu unu fogu in sa zona chi abarrat a bàsciu de Pani-Lòriga (Santadi): su fogu at curtu arriu-arriu e at abruxadu unus 10 ètaros de terrenu. Is volontarios de sa Protetzione Civile, sa Guàrdia Forestale e is Vigiles de su Fogu de Carbònia ant traballadu totu sa note pro nde-ddu istudare.Is isbarcos de algerinos non sunt una nova: a pustis de is 46 isbarcados su 5 de austu, in is ùrtimas dies de su mese nde sunt lòmpidos 84 in 5 isbarcos (su 28, su 29 e su 31 de austu) in is territòrios de is Comunos de Sant’Anna Arresi, Teulada e Domus de Maria. Comente semper nde-ddas ant pinnigados is Carabineris e lòmpidas a Assèmini pro nche-ddas incarrerare a su logu insoru.
De siguru custu mese at a èssere regordadu pro sa basca manna, massimamente in sa primu metade (cun temperaduras màssimas de 40 e prus grados pro una 10 dies de sighiu), a pustis unu pagu de friscura pro mori de su maestrali (ma sa beridade est chi fiant temperaduras prus normales de 32-34 grados), e torra basca meda faci a s’acabu de su mese (37-38 grados). Sighit a non pròere: sa diga de Montepranu est giai totu sciuta e nde sunt essidos a pillu unas cantu nuraghes; sunt sunfrende meda is siendas agrìcolas in sa zona de su Cixerri e su territòriu de Igrèsias.
Assumancus pro su chi pertocat su turismu est istadu unu mese bonu meda. Manifestatziones bene organizadas in dònnia logu (sempre prenu in Igrèsias e in Sant’Antiogu, prus pagu gente in Carbònia), pruscatotu enogastronòmicas (sutzessu mannu in Santuanni pro sa primu editzione de su International Street Food), cuncertus, festas de is biddas e mostras (interessante meda fiat cussa de “is càscias” chi s’est fata in Nuxis pro sa “Festa de su Addeu”). Dònnia fine de cida is parchègios de Porto Pino fiant giai serrados dae is 11 cun d-una filera de màchinas longa 3km. Aumentu de bisitadores puru is sitos turìsticos internos chi abarrant atesu de mare: Is grutas de Is Tzuddas e su tèmpiu de Antas ant fatu su 16% in prus cunfronta a s’annu passadu mancai no apat fatu mancu una die de tempu malu. Custos datos positivos lassant isperare bene pro su mese de cabudanni.
