Novas in limba. Is primas 10 dies de cabudanni in curtzu A pustis de su pàsiu de austu est torrada a cumentzare sa polèmica polìtica in Sant’Antiogu. Su grupu de Genti Noa at cuntestadu a su sìndigu Ignazio Locci su fatu chi at nomenare unu capu de gabinetu chi at a scioberare issu etotu. A parridade de su grupu chi est lòmpidu segundu a is ùrtimas eletziones comunales iat a èssere mellus a oberare su dinari de is tzitadinos pro pònnere gente pro traballare in àteros ufìtzios chi tenet prus abisòngiu de personale.
E sempre in Sant’Antiogu domingu a note ant atacadu unu fogu chi at abruxadu giai 130 ètaros de terrenu ponende in perìgulu domos e personas. Su fogu est partidu dae sa zona de Su Sennori dae s’istrada provinciale e su maestrale forte nche-dd’at impunnadu conca a Maladroxa e a Canai. Sunt intervènnidos is volontàrios de sa Protetzione Civile, sa Forestale, is Pompieris e sa cumpangia de is barracellos chi ant traballadu finas a ora de orbrèschere pro nde istudare su fogu.
Un incidente in sa SS 293 (sena de dannu pro is personas) in su ponte chi passat a pitzus s’arriu de Santadi su 7 de cabudanni at torradu a faere partire is polèmicas in contu de sa siguresa de s’istradone chi collegat su Sulcis de Bàsciu cun Casteddu e su Campidanu. Pro sàbudu chi benit is amministradores locales de sa zona sunt aprontende un’essida a bicicleta cun is tzitadinos pro protestare contras a custa situatzione.
Is algerinos sighint (o assumancus nche provant) a lòmpere in sa costa sulcitana: cenàbara 8, a de note, unu patugliadore at sinnialadu sa presèntzia de una barca a pagu tretu de sa costa de Sant’Antiogu. Est intervènnida sa Guàrdia de Finantza chi at intercetadu sa barca e nche dd’at lòmpida a su Porto Canale de Casteddu. Is algerinos isbarcados ocannu sunt giai 880. Su 4 de cabudanni su Ministru de s’Internu Marco Minniti at annuntziadu chi chi su guvernu algerinu at a collaborare cun cussu italianu pro circare de firmare cust’unda de gente chi paret non bollat firmare prus.
Su giornale “Repubblica”, su 9 de cabudanni, at pubblicadu sa nova ca sa sienda multinatzionale isvìtzera Sider Alloys est pronta a comporare dae s’Alcoa s’istabilimentu de Portovesme. A cantu iscriet “Repubblica” s’investimentu est de unus centu miliones de èuro, su 30% est dinai de sa sienda, su restu sunt mùtuos agevolados e una parti pitica meda sunt investimentos pùbblicos a “fondo perduto”. Duncas torrat a crèschere s’ispera chi sa fàbbrica torrit a produsere e chi unos milla operàios torrint a traballare.
Domingu 10, a pustis de ses meses, at torradu a pròere pro totu sa die. De siguru no abastat, ma assumancus at arrinfriscadu unu pagu su logu e s’ispera est chi sighit a pròere sena de fàghere iscònciu. In Sant’Anna Arresi est acabada cun d-unu sucessu mannu de crìtica e de pùbblicu sa de XXXII editziones de “Ai confini tra Sardegna e Jazz” chi fiat incumentzada su primu de su mese.
