Sa cida in curtzu. Dae s’ 11 a su 17 de cabudanni

Lunis 11: Ignazio Locci, sìndigu de Sant'Antiogu, s’est dimìtidu dae su Consìliu Regionale e duncas at resòlvidu sa situatzione de incompatibilidade. Sunt soddisfados is grupos de opositzione in consìliu comunale chi ant decraradu chi sunt prontas a collaborare cun su sìndigu dònnia borta chi at a fàghere s’interessu de “Sa Idda”. In Consìliu Regionale torrat Paolo Dessì, s’ex sìndigu de Sant’Anna Arresi.

Martis 12:Un’operàiu rumenu de 39 annos est mortu in s’istabilimentu de sa Portovesme srl. A cantu parit s’òmine fiat dirigende su trasportu de una cisterna, interventu chi aiat giai fatu àteras bortas, e est abarradu istrecadu dae sa cisterna etotu chi nche-dd’at iscutu contras a unu càmbiu. Su Procuradore de sa Repùbblica at ordinadu de scercuestare totus is mezos e at ordinadu s’autopsia pro cumprendere a comente est sutzèdida custa disgràtzia.

Mèrcuris 13: Sunt 17 is operàios, giai totus de s’Alcoa, chi arriscant su processu pro su baddarocu fatu in su 13 de donniassanti 2012, candu in sa Grande Miniera de Serbariu, fiant bènnidos is ministros de su guvernu Monti pro firmare su “Piano Sulcis” e ddis fiat tocados a si-nde andare de presse cun s’elicòteru.

Giòbia 14: Su consilieri regionale Gigi Rubiu at presentadu un’interrogatzione a s’Assessore a s’Agricoltura dimandende ispiegatziones in contu de s’esclusione de su Comunu de Sa Baronia-Villaperùciu (amìtidos invecis Santadi, Narcau e Bidda Matzraxa) dae sa rifata (est a nàrrere su risarcimentu) de is dannos a is agricoltores pro sa gelighia chi at ghetadu su 20 e su 21 de abrile passados.

Cenàbara 15: Ignazio Locci at dimandadu a is àteros sìndigos de su territòriu una riunione de sa cunferèntzia socio-sanitària pro protestare contras sa riforma de sa retza de is uspidales de sa Sardigna aprovada dae sa Giunta Regionale e chi a lestru at a èssere votada dae su Consìliu Regionale. Locci narat chi sa ASLL de Carbònia est amministrada dae personas chi non conoschent su territòriu e nc’est sa timoria chi tochit a andare a Casteddu dònnia borta chi serbint curas ispecialìsticas.

Sabudu 16: manifestatzione de protesta de totus is sìndigos de s’Unione de is Comunus de su Sulcis chi ant fatu unu giru a bicicleta in is istradas provinciales 77,78, 79 e in sa SS 293. Sunt partidos dae Tratalias e arribados a Giba cun prus de 100 ciclistas avatu. Is sìndigos ant sinnialadu totus is perìgulos de cussas istradas: a candu ammancant totus is sinniales orizontales e verticales, a candu su fundu est totu tzacadu cun fossos fungudos, a candu ddoe at tretos istrintos meda. Calincunu sìndigu at fatu presente ca de 30 miliones de èuros previstos in su Piano Sulcis pro is istradas de sa zona nde sunt abarrados sceti 16 (14 ddos ant postos pro fàghere àteras cosas), àteros ant nadu chi s’ùnica zona aundi sa Provìncia de su Sud Sardigna no at previstu interventos in is istradas est pròpiu cussa de su Sulcis de Bàsciu, àteros at fatu presente chi is istradas bene tentas sunt fundamentales pro s’isvilupu turìsticu. S’ispera est chi custa initziativa, bene cuncordada diaderus, nde scidint is vèrtices de s’ANAS e de sa Provìncia.

Domingu 17: est incumentzada dae Sant’Antiogu sa “Traversata col Sorriso” s’impresa de Marina Scibilia chi in 7 tapas at a fàghere 200 km finas a Tonara a pee pro agatare dinari pro pagare is curas de Giorgia una picioca santantioghesa chi est malàdia e dda tocat a abarrare sètzia in d-una cadira a rodas. Marina est partida a is 11 in ocasione de sa “Festa del Disabile” dae su Palasport e est lòmpida in Tratalias aundi ant fatu unu pràngiu de beneficèntzia. A merie est arribada in Narcau aundi dd’ant arritzida “Le Cocinelle” unu grupu de piciocas chi fiat faghende animatzione pro is pipios. Sa de Marina Scibilia est una diaderus una initziativa bella e chi andit in bon’ora!