Sa Cida Sulcitana in Curtzu, Dae su 18 a su 24 de cabudanni
Lunis 18: sunt incumentzados in V. Giordano is traballos pro modernare sa retza de sa lughe pùbblica in su centru istòricu de Igrèsias. S’ant a cambiare totus is lampadinas cun LED e una parte de is cavos, in prus s’at a fàghere sa revisione de totus is cuadros. In totu s’investimentu est de unos 325mila èuros.
Martis 19: s’Amministratzione Comunale de Carbònia at circadu a is sòtzios novos de su “Carbonia Calcio” su dèpidu chi s’asòtziu isporivu tenet cun su comunu etotu. A cantu si narat su dèpidu est de unos 150mila èuros. Is dirigentes novos no ant tentu agradèscida custa atzione; unu grupu bastante mannu de tifosos e tzitadinos est andadu a merie in pratza Roma a manifestare. Is meres novos de sa sotziedade sunt andados a comunu e ant fueddadu cun is amministradores e a cantu paret ant agatadu una solutzione pro custu su problema.
Mèrcuris 21: faci a is 10 de note ant pigadu fogu 4 mezos de su caseifìciu de Santadi. Unu dannu mannu meda pro su caseifìciu chi at pèrdidu 2 furgones pro trasportare su casu e 2 màchinas chi arrigollent su late dae is allevadores. Ancora non si scit si calincunu apat atacadu su fogu apostadamente o si est partidu a solu dae unu de is mezos e apoi nd’apat pigadu is àteros puru. Su perìgulu fiat mannu meda: a pagu tretu ddoe at unas cantu domos, sa cantina e sa tzentrale de distributzione de s’Enel. Su fogu nde-dd’ant istudadu is pompieris de Carbònia.
Giòbia 21: torrant a incumentzare is presìdios de is operàios de s’Eurallumina de fronte a s’Assessoradu a s’Ambiente in Casteddu. Su mese chi intrat iat a dèpere acabare sa valutatzione de is documentos presentados dae sa Rusal e si no nc’ant a èssere àteras arrociallas burocràticas in antis chi acabit s’annu ant a èssere prontas is delìberas regionales in contu de sa valutatzione de s’impatu ambientale.
Cenàbara 22: Fulvio Moirano, su manager de sa ATS (s’Azienda pro sa Tutela da sa Salude), est bènnidu in Carbònia e est intervènnidu in d-una debata a pitzus de sa reforma sanitària. Medas is sìndigos e is amministradores locales presentes chi ant cuntestadu su fatu chi cun sa riforma nc’at a èssere tancaduras de servìtzios e non tenet is cunsideru is situatziones locales. Moirano at arrispùndidu a totus is crìticas chistionende de “manager”: partende dae datos numèricos “grezos” at sinnialadu is criticidades (pruscatotu “dopiones” in is uspidales de sa zona nostra) e at ispiegadu chi issu faghet su traballu chi dd’ant intregadu e duncas is critìcas sunt de fàghere no a issu ma a is istutziones polìticas chi sunt pro aprovare sa lege noa (est a nàrrere sa Giunta Regionale e sa magiorantzia de centru-manca chi dda sustenit in consìliu regionale) chi iant a dèpere rispùndere a is tzitadinos.
Sàbudu 23: Pietro Cocco, consilieri regionale de su PD, at arrispùndidu a Gigi Rubiu (UDC) in contu de sa situatzione de is traballadores de s’ATI IFRAS (sunt prus de 500 is chi traballaiant in su Geoparco e sunt abarrados chena de fàere nudda e tenent sceti sa NASPI, sa chi una borta si naraiat “indennidade de disocupatzione”). A parridade de Pietro Cocco sunt incumentzende a si abèrrere prospetivas cuncretas pro custos traballadores: 118 ant partecipadu a su bandu IGEA e 8 sunt giai intrados a traballare 54 ant a incumentzare su mese chi intrat; 123 depiant intrare in is Comunos ma no ddos pòtzidos regòllere pro chistiones de lìmites a is’ ispesas de personale e duncas s’est torrada a abèrrere sa protzedura pro permìtere a su Geoparco o àteros entes de manifestare s’interessu a ddos pigare; àteros 140 ant incumentzadu sa protzedura de s’èsodo prevista dae sa Lege Fornero.
A pustis de is polèmicas de su mese de austu, su consilieri regionale de “Articolo Uno – SDP” Luca Pizzuto at decraradu in d-una nota ca puru is tretos sulcitanos de is pistas ciclabiles chi giai nche esistint e is chi s’ant a fàghere (Carbònia-Santuanni; S.A. Arresi-Porto Pino, Santuanni-Sant’Antiogu e Santuanni-Tratalias) ant a intrare in sa retza de sa ciclovia regionale.
Domingu 24: Mattia Melis, de chi sàbudu a merie est istadu ordinadu predi in sa Seu de Igrèsias, at tzelabradu sa prima missa in sa pratza de Gonnesa. Don Mattia in antis de incumentzare su camminu religiosu s’est lauredu in fìsica. Nche fiat gente meda in pratza, pruscatotu gonnesinos, chi ant testimongiadu s’istima de totu sa comunidade.
a cura di Roberto Pinna
