Sa cida sulcitana in curtzu Dae s’8 a su 15 de abrile
Lunis 8: dòminiga is carabineris de Giba ant arrestadu a un’òmine de 34 annos proite chi fiat guidende imbriagu. Dd’ant firmadu pro unu controllu e candu ant telefonadu a is collegas de Carbònia pro ddu fàghere s’etilòmetru custu est torradu a sètzere in sa vetura sua e at istumbadu sa màchina de is Carabineris e at provadu a si-nce fùere ma dd’ant torradu a firmare a pagu tretu. A custu dd’ant processadu pro diretissima e arritiradu sa patente.
Martis 9: Nc’at polèmica meda in Igrèsias pro s’arredu urbanu chi s’amministratzione comunale at comperadu pro su centru istòricu. A gente meda non sunt pràghidas is pancas noas chi sunt fatas de ciumentu e fintzas is fiorieras ca nanca pariant discos volantes. Fatu istat ca pro imoi e tanti is chi ant postu nde-ddas torradas a bogare e ddas ant “parchegiadas” in su giardinu de Casa Serena. S’opositzione in consìliu comunale at presentadu interrogatziones e s’assessore cumpetente Ubaldo Scanu at difèndidu su scioberu fatu. Nc’at polèmicas fintzas in Bidda Massàrgia pro is palos de sa lughe postos in mesu de sa rotonda noa. Gente meda, totus ingegneris istudiados in is iscolas mannas, pentzaìat chi essint serbidos pro fàghere unu slalom ma dae su Comunu ant ispiegadu ca serbint pro donare lughe a sa pista ciclàbile noa e, de chi at a èssere acabada s’òpera (mancant sceti pagu dies e duncas ant trigadu unu pagheddu pro mori de su tempus malu), is chi andant a pee ant a pòdere sartare s’istradone in siguresa cumpleta e duncas s’ant à pòdere torrare a fàghere puru is interros a pee a comente si fadiat una borta.
Mèrcuris 10: sa diocesi nostra e sa comunidade de Carbònia ant pèrdidu un’àteru òmine de gabbale: s’est ispaciadu a 83 annos Don Giampiero Garau chi fiat predi in sa parròchia de Santa Bràbara de Bacu Abis e aiat fatu su ministèriu suu puru in Nuxis, Portescusi, Sant’Antiogu e in sa parròchia de Santu Pontzianu in Carbònia. Pro annos meda don Garau at fatu su diretore de s’Ufìtziu de is Benes Culturales e de s’Arte Sacra de sa Diocesi e asuta de sa ghia de issu aiant arrestauradu sa Seu e abertu su museu diocesanu.
Giòbia 11: Su comunu de Villaperùciu dae s’acabu de su mese de gennàrgiu at mandadu sa rechesta a s’ex ufìtziu de collocamentu de Carbònia pro otènnere una graduatòria de disocupados locales pro ddos fàghere traballare in is cantieris de forestatzione. Su problema est ca finas a imoi no ant ancora torradu sa graduatòria proite chi su personale est impegandu meda in àteras atividades e no acurit a ismaltire totus is rechestas chi arribant dae is comunos. Su perìgulu mannu est chi si sa protzedura no incumentzat a intrus de su 30 de custu mese su comunu de su Sulcis de Bàsciu podet pèrdere su finantziamentu regionale e custu bolit nàrrere a non fàghere traballar pro unas cantu meses 18 personas.
Cenàbara 12: In Sant’Antiogu dae ocannu est proibidu de su totu a fumare in is pràgias. Aici at detzìdidu s’amministratzione comunale pro duos motivos: su primu est pro assigurare a is chi non fumant de si gosare sceti s’ària de su mare e su segundu motivu est una chistione de su rispetu de s’ambiete: si bolet in custa manera circare de cuntrastare is maleducados chi lassant is tzicas iscavuadas in mesu de s’arena. Chini no arrispetat su pregone arriscat una multa de 500 èuros.
Sàbudu 13: At tentu unu bonu resurtadu de pùbblicu sa primu puntada de Linea Blu chi est sa trasmissione de RAI 1 chi chistionat de su mare e de is costas italianas. Sa puntada dd’ant girada giai totu in sa costa de Teulada, aundi sa troupe ghiada dae Donatella Bianchi at ammostradu sa bellesa istravanada de su logu e at fueddadu de su sistema de is dunas de Porto Pino, de tzerachias militares e de su nùmeru artu meda de piscadores chi pigant is indennizos chi si cuncentrant in d-unu “spàtziu” bastante istrintu. An fatu bìere puru unas cantu minutos de immagines giradas in sa gruta de Santa Bràbara chi pro chistiones burocràticas est serrada dae un’annu pro is turistas.
Dòminiga 14: est passada un’àtera cida e ancora sa Giunta Regionale noa no est pronta e custu bollet nàrrere chi is partidos de su centru-dereta chi ant bintu is eletziones ormai dae duos meses no ant ancora agatadu un’acòrdiu. De siguru custu no est sinniale de unu incumentzu bonu de sa legisladura e s’ispera est chi, de chi nci passat Pasca Manna, sa Giunta siat operativa e si pongat a traballare pro su bene de sa Sardigna.
Cida chi benit est Pasca Manna e chini iscriet custa rubrica faghet is augùrios a is ligidores de Tentazionidellepenna.com de nche passare custas dies de festa in serenidade e in paghe e donat s’apuntamentu a su 29 de abrile cun d-una sìntesi custas de custas cidas chi benint.
Roberto Pinna
