NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
27
Thu, Feb
35 Nuovi articoli

Sa cida sulcitana in curtzu. Dae s’11 a su 17 de onniassantu

Novas in Sardu (LSC)
Aspetto
Condividi

Sa cida sulcitana in curtzu. Dae s’11 a su 17 de onniassantu

Lunis 11: is protestas chi ant fatu is ambientalistas e unas cantu amministratziones comunales – in zona nostra Carloforte, Caleseda, Portescusi e Sant’Antiogu (cun bona parte de su territròiu marinu chi ruet in àrea SIC) – ant fatu a manera chi RAS apat cambiadu is arrègulas permitende sceti a is piscadores professionistas de pigare is arritzones de mare fintzas a su 15 de abrile de s’annu chi benit. Duncas puru in sa zona de su Sulcis dònnia piscadore at a pòdere leare non prus de 100 arritzones e chini no arrispetat sa prescritzione arriscat una multa cara meda.
Martis 12: su dotore casteddaju Ferdinando Angelantoni est su diretore nou de s’Area sotziosanitària de Carbònia e leat su postu chi fiat de Maddalena Giua chi est andada in pensione. De siguru s’incarrigu de Angelantoni no at a èssere fatzile: at incumentzadu cun d-una protesta fata mèrcuris cuncordada dae “I Briganti” (grupu de tifosos de su Carbonia Calcio) de fronte a sa sede amministrativa de arruga Dalmazia e sàbudu in sa sala consiliare de Carbònia si sunt atobiados ancora is amministradores locales e is rapresentantes de is professiones mèdicas. Ormai is chistiones sunt craras: listas de atesas tropu longas, mancàntzia de manutentzione in is istrutura, pagu personale. Parit chi ormai s’ùnicu leader polìticu de su territòriu, capassu de portare a innantis is rechestas chi arribant dae prus partes, siat su consilieri de su PSdAz Fabio Usai chi at ispiegadu ca sa riforma noa de is entes locales e de sa sanidade sunt acapiadas a pari e duncas serbit unu sfortzu de totus pro torrare a otènnere siat sa provìntiza siat una ASSL chi scipiant donare is rispostas chi serbint a is utentes.
Mèrcuris 13: S’amministradore ùnicu de sa Carbosulcis at comunicadu ca ant prorogadu fintzas a s’acabu de s’annu s’acòrdiu cun s’ENEL pro s’arritiru e s’istocàgiu de su cinus prodùsidu in sa centrale de de Portovesme. Custa genia de arrefudu est cunsideradu spetziale ma non perigulosu e de chi dd’ant a tratare nche-dd’ant a interrare in galleria a 500 metros asuta de terra. Pro mori de sa proròga de s’acòrdiu pro sa primu borta sa Carbosulcis s’acostat a su parègiu de bilànciu.
Giòbia 14: fiat sa die mondiale de sa diabeta e custa cida e s’ “Associazione Diabete Iglesias-Carbonia” at fatu initziativas de importu mannu pro sa sensibilizatzione in contu de custe male. Infatis sunt prus de 110mila is sardos chi nde sunfrint (a dolu mannu nostru teneus s’incidèntzia prus arta in Itàlia) e duncas in is istitutos superiores Ferraris e Asproni is espertos de s’assòtziu ant atobiadu is istudentes prò fàghere preventzione e pro ispigare is tècnicas prus modernas de cura chi permitint de ammelliorare sa vida de is malàdios. Invècias domìniga a mangianu cun sa Consulta de is Antzianos ant fatu sa passilada de sa salude in mesu de centru istòricu e in s’ocasione ant fatu a indonu su test de sa glicemia.
Cenàbara 15: cun s’abertura a is bisitadores de sa miniera de Serucci est incumentzada sa presentada de is primos resurtados de su progetu ARIA chi previdit sa cunversione de s’ùrtima miniera de crabone italiana in centru de circa scentìfica. S’eventu est andadu innantis sàbudu a mangianu in sàula magna de s’Universidade de Casteddu cun s’interventu de is scientziados chi ant ispiegadu s’impreu pràticu de is risurtados de sa circa insoru (produtzione de isòtopos puros pro sa meighina e is bòlidos ispatziales) a pustis is rapresentantes de is istitutzionese ant chistionadu de is prospetivas de isvilupu econòmicu chi su progetu podet donare a totu su territòriu.
Sàbudu 16: in su salone parrochiale de Narcau ant premiadu is bincidores de sa de 4 editziones de su cuncursu de poesia “Parole su pietra”. S’iscopu de s’initziativa organizada dae s’assòtziu de giòvanos “Nulacadu” est cussu cuncordare in is muros de su centru istòricu is poesias iscritas in blocos de perda in manera chi, a bellu a bellu, si trasformint in d-una atratzione turìstica. Su tema de is poesias fiat a pitzus de is efetos de sa mùsica in s’ànimu umanu. Ocannu is blocos de perda cun is poesias binchidoras ddas ant pònnere in pratza Europa chi est su logu aundi dae 29 annos si faghet su festival Narcao Blues.
Domìniga 17: in Masainas est acabadu “Dalla Terra e dalle Mani” chi est un’apuntamentu clàssicu de s’atòngiu sulcitanu. In s’editzione de ocannu (chi est sa de 19), cuncurcodadu dae s’amministratzione comunale in pari a su Centru de Isperimentatzione de autosvilupu de Igrèsias e s’agentzia LAORE, is espertos presentes ant arresonadu in manera funguda in contu de is cambiamentos climàticos e de sa netzessidade chi totus si pongant a traballare, mancai cun atziones piticas, pro cuntrastare is mudamentos chi sunt semper prus perigulosos. Ant fatu puru sa festa a is matas e unu laboratòriu de riciclu dedicadu a is prus minoreddos e a is famìlias inosru.

Roberto Pinna