NOTA! Questo sito utilizza i cookie e tecnologie simili.

Se non si modificano le impostazioni del browser, l'utente accetta.

Approvo
25
Thu, Feb
45 Nuovi articoli

Sa cida sulcitana in curtzu. Dae su 15 a su 21 de friàrgiu

Novas in Sardu (LSC)
Aspetto
Condividi

sa cida sulcitana in curtzu. Dae su 15 a su 21 de friàrgiu

A pustis de annos de chèscias e de protestas sa provìntzia de su Sud Sardigna at incumentzadu is traballos in is stradones de su Sulcis de Bàsciu chi sunt malipigados de diaderus: prenos de fossos, sena de sinniales verticales e orizontales cun su fundu chi a tretos est aciuvende. Duncas est craru chi custas istradas, massimamente pro is chi no ddas connoscint, sunt perigulosas meda. Dae lunis 15 ant tancadu pro duos meses (si isperat chi acabint prima) sa bretella de Santu Leonardu in sa SP 79 chi est s’istradoni chi ponit in collegamentu Perdaxius cun Tratalias. Sunt previstos puru àteros interventos in is istradones provintziales chi ponint in collegamentu Tratalias cun Giba e Bidda Arriu e finas a s’ingruxada cun sa SS 126 aundi s’ANAS at incumentzadu traballos de manutentzione chi iant a deper acabare in su mese de maju.

Nc’at cimbella manna in Carbònia pro s’ùrtima undada de furas fatas o tentadas in mesu de sa tzitadi. Custa cida passada sunt intrados in sa Upim de via Roma e nd’ant pigadu bistimentas, ant sciundadu una vetrina in via Gramsci a vetura e nd’ant leadu unas cantu partafòllios, e fatu puru duas rapina a rivoltella in su tzentru Tim de viale Arsia (cun is telecàmeras de siguresa chi ant filmadu totu sa scena) e in d-unu market in sa zona de Su de is Meis. Sa timoria est manna meda e non sunt pagos is chi serrant s’atividadi a s’ora de scurigare. In medas ghetant sa curpa a sa droga e totus dimandant prus controllus e prus presèntzia de is Fortzas de s’Òrdine chi in su mentris ant giai arrestadu unas cantu personas.

Torra isbarcos de algerinos in su Sulcis. Mèrcuris a note sunt arribadas in totu 44 personas in is pràgias de Porto Pino e in Cabu Teulada. In mesu de custas nci fiant puru una fèmmina cun duos pipios de 4 e 5 annos chi is Carabineris nc’ant lòmpidu a s’ispidale pro ddos bisitare. Totus is àteros comente nche-ddos ant lòmpidos a su tzentru de collidura de Muristenis pro incarrerare is protzeduras de identificadura e espulsione

Domìniga 21 s’est giogada sa de 18 giorronadas de su campionadu de sèrie D. Su Carbonia Calcio at pèrdidu 4 a 1 in Tàtari contras a sa Torres ma sighit a abarrare su de 5 postos in prena zona play-off in su girone G. Est berus chi nc’at iscuadras chi tenint fintzas 4 partidas de recuperare – su Carbònia ddas at giogadas totus – e chi sa classìfica est ancora curtza meda ma a metade de su campionadu, est andende bene meda e totus ispereus chi sighit de aici.

Est acabadu carnovali, ma ocannu pro mori de s’apretu sanitàriu nudda isfiladas e festas. Pròpiu s’annu passadu, in custu tempus, fiant incumentzende a arribare is primas novas de su covid e si ispainaiat sa timoria de sa maladia. Fatu istat chi domìniga a mericeddu in Igrèsias, a Norfieddu dd’ant postu fogu a su pròpiu in manera simbòlica in sa pratza de s’ex matatòiu. Custa initziativa dd’at cuncordada su Gruppo Folkloristico Città di Iglesias, cun s’iscopu de fàere sighire a bìvere custa traditzine e de donare unu sinniale de ispera.

Ammelliorat ancora sa situatzione de su covid in Sardigna e fintzas in logu nostru. In Villaperùciu a pustis de 4 meses su contu de is postivos est torradu a zeru. Siguramente sa biddixedda de su Sulcis de Bàsciu est sa chi at pagadu su prètziu prus artu in totu sa zona: a pitzus de pagu prus de 1000 residentes si sunt contados 33 positivos paris a metade de su mese de gennàrgiu passadu; su totale de is casos est prus de 80, cun 4 ricoveros in terapia intensiva (totus sanados) e 2 antzianos mortos. Novas bonas puru dae Domunosa: a pustis de 2 meses no nc’at prus mancu unu positivu in sa comunidade-allògiu “Solidarieta”, invècias sunt 10 is casos de positividade de is residentes. In Igrèsias abarrant 21 positivos (cun 50 negativizados). 1 casu nou sceti in Portescusi. Est prus cumplicada sa situatzione de Carbònia aundi su nùmeru de positivos est torradu a artziare a 59 (. In medas dimandant prus controllos a su sìndigu Paola Massidda chi ddos at promìtidos ma nc’at de nàrrere chi su sìndigu, de calisisiat logu, no est unu carabineri e tenet arresone issa candu narat chi sa bìncida de custa batalla est responsabilidade de totus cantu seus. Nc’at casos meda puru in sa base de Cabu Teulada: sunt 16 is positivos in mesu de su personale chi est in addestramentu e mancu unu in mesu de su “personale locale istàbile”. In su mentris sighint su screening de tipu sierològicu Ad Adiuvandum incarreradu dae s’Assessoradu a sa Sanidade de sa RAS, Gruppo L’Unione Sarda, s’Esèrcitu e unas cantu assòtzios sardos. De chi ant acabbadu is prelievos domìniga in Sant’Antiogu, giòbia ant incumentzadu in Teulada e in Santu Giuanni Surèrgiu.

Is racumandatziones e s’augùriu sunt semper ugualess: est a rispetare is normas de distantziamentu sotziale e de igene e a sighire a abarrare sanos!

A cura di Roberto Pinna.