Sa cida sulcitana in curtzu, in Limba Sarda Comuna. Dae su 3 a su 9 de freàrgiu
S’Amministratzione Comunale de Sant’Antiogu at annuntziadu, dae chi ant torradu a fàere is palos pro s’illuminatzione e ant postu s’erba sintètica, àteros traballos de importu in s’istàdiu comunale. Infatis ant prevèdidu de torrare a fàere sa tribuna chi at a èssere prus pitica ma acarrargiada de su totu, is spogliatoios e s'ant a fàere aposentos de dedicare a is assòtzios isportivos e a su pùbblicu. In prus ant a assetiare is essidas de siguresa e is àreas dedicadas a is allenamentos. In custa manera s’istàdiu torrat nou de su totu. Is interventos balent 1 milione e 240 mila èuros chi arribant in parte dae su bilànciu comunale e in parte dae contributos ontentos pro mèdiu de unu bandu regionale.
A lestru ant a incumentzare puru a assetiare sa piscina comunale de Carbònia chi est serrada ormai dae 3 annos. Infatis is ufìtzios comunales ant acabbadu is protzeduras de intrega de is traballos (su valore est de 760mila èuros): est prevèdidu de torrare a fàere sa cobertura, cambiare totus is infissos e àteros interventos chi ant a permìtere unu bonu rispàrmiu energèticu a manera de abasciere is costos de gestiones chi non fiant prus sustenìbiles.
Custa cida passada puru ant sighidu a arribare algerinos in sa costa sulcitana. Martis is Carabineris nd’ant agatadu 14 in su parghègiu de Porto Pino, àteros 11 ddos ant intertzetados in mare mannu a largu de Su Cabu (Capo Sperone) e nche ddos fatos calare a terra in su portu de Ponti. Comente semper, a pustis de is bìsitas mèigas, is Carabineris nche ddos ant lòmpidos a su tzentru de collidura de Muristenis pro incarrerare is protzeduras de identificadura e de espulsione. In su mentris est giae de unu pagu de tempus chi assumancus in pràgias de su Sulcis de Bàsciu no agatant prus i barcas chi is migrantes imperant pro sartare su mare: a su chi si narat paret chi nce siat gente chi ddas fatzat isparèssere, mancai pro ddas torrare a bèndere, innantis chi ddas scercuestit sa Giustìtzia.
Is sìndigos de s’Unione de is Comunos de su Sulcis martis passadu ant mandadu una lìtera a sa Provìntzia de su Sud Sardigna, a su Prefetu e fintzas a sa Presidente de sa Regione e s’Assessore regionale a is traballos pùbblicos dimandende interventos de manutentzione lestra in sa SP 2 (chi iat torradu a abèrrere mancu duos meses agoa). A die infata ant dèpidu torrare a serrare s'istrada proita ca su pontinu chi aiant arrangiadu est torradu a aciuvare. E duncas fintzas chi no dd’arrangiant – si isperat una borta po sèmper – is chi dae su Sulcis de Bàsciu e dae Carbònia movint conca a Casteddu ant a deper passare a marolla dae sa SS 130 faende assumancus 10km in prus e, a segunda de s’oràriu, arriscant de nche pònnere fintzas 20 minutos in prus de tempus.
Mèrcuris in su MIMIT in Roma ant torradu a fàere un’àteru atòbiu in contu de sa Portovesme srl e su ministru Urso chi at decraradu chi sa lìnnea de su zingu chi est de interessu natzionale e chi fortzis nc’at unu sugetu econòmicu chi est interessadu a comporare is impiantos dae sa Glencore e at agratziadu sa sienda isvìtzera proita ca at postu a disponimentu totus is datos chi ant a permìtere de connoschère in manera prus pretzisa is potentzialidades de su situ. In prus ant arresonadu fintzas de is chistiones energèticas: a su chi paret su MASE (su ministeru de s’ambiente) e sa RAS sunt acanta de agatare un’acòrdiu pro assigurare s’arribu de su metanu a costos bàscios pro mèdiu de sa presèntzia costante in su portu de Portovesme de duas naves gassificadoras. In is dies imbenientes ant a fàere àteras riuniones pro sighire a definire totus is chistiones tècnicas.
Roberto Pinna
