Sa cida in curtzu. Dae su 25 de cabudanni a su primu de mese de ladàmine.
Lunis 25: in su Lù Hotel de Carbònia s’est fatu unu cunvènniu interessante meda in contu de s’indùstria 4.0, est a nàrrere su protzessu nou chi integrat sa tecnologia pro aumentare sa cualidade de sa produtzione e pro ammelliorare is cunditziones de traballu. Sunt intervènnidos in contu de is oportunidades e de is prospetivas chi aberrit s’indùstria 4.0 is deputados de su PD Emanule Cani e Gianluca Benamati, su presidente de Confindustria Sardegna Alberto Scanu, su presidente de su Cacip Salvatore Mattana. At moderadu sa debata Giuseppe Deiana chi est su caburedatore de s’Unione Sarda.
Martis 26: Mancai su ministru de s’Internu Minniti apat anuntziadu sa collaboratzione cun su guvernu algerinu pro firmare is isbarcos, est arribada un’undada manna meda de gente in sa costa sulcitana: sceti martis nd’at allòmpiu 150, in totu is chi sunt arribados custa cida sunt giai de 350. Sa parte prus manna est isbarcada in sa zona de Porto Pino e de su polìgonu de Capo Teulada ma nc’est puru chini est isbarcadu in Ponti (Sant’Antiogu) e nc’est chini andadu deretu a che sa Guàrdia de Finantza; unas cantu barchitas ddas ant intercetadas in mare sa Guàrdia Costera. Siguramente custu fenòmenu depet èssere istudiadu in manera funguda. Medas partint dae su portu de Hannaba e cun su mare chietu e bentu bonu ddis abastat una note pro lòmpere in su Sulcis ma paret chi nche siant puru naves chi fatzant de “taxi” calende in mare barcas aundi setzit sa gente a unus 30km dae sa costa.
Mèrcuris 27: is consilieris regionales Pietro Cocco (PD) e Luca Pizzuto (Articolo 1- SDP) ant atobiadu in Carbònia sìndigos e amministradores de su Sulcis e gente comuna pro resonare in contu de sa lege de riforma de sa retza de is uspidales chi su Consìliu Regionale est pro aprovare cida chi benit. Nche fiant giai totus is sìndigos sulcitanos, nde ammancaiat unas cantu (intru de is custos Carbònia e Sant’Antiogu) in polèmica pro su logu de s’atòbiu (chi non fiat istitutzionale) e ca proita ca non fiat prus tempus de cambiare s’impiantu generale de sa lege etotu chi at a andare a ismenguare is servìtzios pro is sulcitanos. Cocco e Pizzuto ant ispiegadu ita cambiat e s’isfortzu fatu pro sarvare cantu prus unidades possìbiles in sa zona sulcitana. Defatis si su DM70 (su regolamentu natzionale) fessit apllicadu in manera pretzisa, depint isparèssere totus is uspidales de Igrèsias e in Carbònia abarraiat sceti su pronto soccorso e cun is unidades de traumatologia, chirurgia e mexina generale.
Giòbia 28: paret chi puru su grupu Glencore (chi est giai mere de sa Portovesme srl) siat interessadu a comporare s’istabilimentu Alcoa de Portovesme. Sa Glencore aiat giai provadu a comporare s’istabilimentu in su 2014 ma aiat lassadu a pèrdere proite chi su prètziu de s’energia non fiat cumbeniente. Is sindacados confederales dimandant craresa e bollent un’atòbiu a su MISE pro circare de cumprèndere mellus sa situatzione.
Cenàbara 29: Sighit su traballu mannu de promotzione de su territòriu incarreradu dae Visit Sulcis. De bonu mangianu est incumentzadu su Famtrip (est acabadu domingu a note), est a nàrrere unu viàgiu apariciadu pro unu grupu de 10 operadores turìsticos arribados dae totu s’Èuropa in sitos prus bellos e interessantes de sa zona nostra. In prus is siendas privadas e is amministratzione locales ant tentu s’oportunidade de faeddare diretamente cun is operadores istràngios e de presentare is comunos e is atividades insoro. Pro su territòriu est una cosa noa chi de seguru at a donare resurtados bonos in su benidore.
Sàbudu 30: fiant prus de 250 is chi ant partetzipadu a sa giorronada apariciada dae sa Diocesi pro sa “Custodia del Creato”. Su grupu est partidu a is 3 de merie dae Monteponi e, passende in mesu de is montes chi ant pigadu fogu su 26 de mese de argiolas passadu, eat arribadu a is 7 a su Santuàriu de “Buon Cammino”. Is camminadores ant ascurtadu sa relata de su prof. A. Arru in contu de sa desertificatzione e su cuncertu de su pianista coreanu Juhnee Kin. A pustis sunt intervènnidos sa pastora E. Green de sa Crèsia Batista, Padre N. Volskyy de sa Crèsia Ortodossa e a ùrtimu s’Obispu de Igrèsias mons. G.P. Zedda.
Domingu 1 de mese de ladàmine: sunt incumentzados is campionados regionales de fubalu. In su girone A de su campionadu de promotzione su Carbonia Calcio, a pustis de un’istadi trumentada pro chistiones sotzietàrias, at fatu 0-0 in domu contras contras a La Palma-Monte Urpinu; su Carloforte de su bomber Samuele Curreli at bintu 4-0 in trasferta contras a su Vecchio Borgo S. Elia. In su girone B de su campionadu de primu categoria giogant 8 iscuadras sulcitanas, intru de custas sa gloriosa Monteponi (2-0 contras a Sarroch) chi at a provare a bìnchere pro torrare a artziare a lestru in Promotzione.
Rubrica a cura di Roberto Pinna
