Sa cida sulcitana. Dae su 26 de freàrgiu a a su 4 de martzu
Domingu 26: Gente meda est andada in Igrèsias a castiare s’isfilada chi at serradu is manifestatziones pro su carnevali 2017. Invècias in Sant’Antiogu ant fatu festa manna pro is pipios: s’assoradu comunale a is polìticas sociales at organizadu sa primu editzione de “Maschere in passerella”: totu su mangianu una truma manna de pipios mascarados s’est ispassiadu currilliende in pratza Itàlia e in su Cursu Vittorio Emanuele.
Su Carbònia at bintu a sa Frassinetti 2-0 in Elmas e imoi est primu cun su Samassi in su girone A de su campionadu regionale de Promotzione. Duncas su Carbònia si podet gherrare sa promotzione direta in Ecellèntzia.
Lunis 27: Sighit a fàere tretu su Camminu de Santa Bràbara: defatis is sòtzios de sa Fundatzione de su Camminu ant fatu riunione in Biddacirdu. Ant aprovadu su bilànciu consuntivu de su 2016 chi s’est serradu in parègiu e ant ascurtadu sa relata de Giampiero Pinna chi est su presidente de sa Fundatzione. Pinna at sinnialadu comente s’educational tour fatu in mese de idas passadu cun is giornalistas est donende resurtados bonos (sunt essende artìculos siat in rivistas de setore siat in giornales natzionales) at aciuntu chi in Milanu s’at a presentare sa Guida de su Camminu, aina fundamentale chi at a permitere a is pellegrinos de ddu fàere in autonomia. A custu iscopu 4 iscuadras de volontàrios ant a incumentzare a ponnere is sinniales e is plachetas in is biddas interessadas dae su percursu e s’at a aprontare puru su situ internet.
Martis 28: Su consìliu comunale de Carbònia at aprovadu su bilànciu in mesu de is polèmicas. Defatis in antis de cumentzare sa setziada nc’est istètiu unu cunfrontu intru de su sìndigu Paola Massidda e su presidente de su Consòrtziu Fieristicu Sulcitanu Mauro De Sanctis. De Sanctis s’est chesciadu ca in su bilànciu no ddoe at dinare pro Il Sulcis Iglesiente Espone (sunt giai 10 is editziones fatas); su sìndigu dd’at arrispùndiu chi s’Amministratzione at a pigare in cunsideru s’eventu sceti candu is organizadores ant a presentare in comunu una rechesta iscrita de finantziamentu. Fatu istat chi s’opositzione at votadu contras a su bilànciu (francu Daniela Garau chi s’est astènnida) e sa Magiorantza e no at aprovadu mancu unu de is 80 e prus emendamentos propostos dae s’opositzione cunsiderinde-ddos atziones de ostrutzionismu (e tocat a nàrrere chi is ufìtzios nd’ant decrarados inamissìbiles prus de sa metede). De siguru in Carbònia, cun s’aprovatzione de su primu “bilànciu a cincu isteddas” est incumentzada diaderus un’època noa e a parridade de chini iscriet custa rubrica, fortzis totus custas polèmicas, chi bortas meda sunt istrumentales, dipendint pròpiu dae custu fatu.
mercuris 1: sa sienda isvitzera Sider Halloys at mandadu, a manera ufitziale, una proposta a su Guvernu pro comporare s’istabilimentu ALCOA de Portovesme. Imoi tocat a su Ministeru de s’Isvilupu econòmicu a valutare sa proposta e sa cunsistèntzia finantziària de sa sienda isvitzera. Su ministru Carlo Calenda iat a bòllere serrare a lestru sa chistione ma su MISE iat a pòdere dimandare de torrare a formulare sa rechesta proite, a parridade is sòlitos bene informados, in sa proposta ddoe sunt cunditziones contràrias a sa normativa italiana. Fatu istat ca custa est primu borta, dae candu s’istabilimentu est serradu (2012), chi arribat una proposta cuncreta pro torrare a faere partire sa produtzione.
Giòbia 2: Igrèsias un òmine de 46 annos at mortu sa mulleri a istocadas. Maridu e mulleri fiant foras pari de unas cantu meses e sa fèmmina fiat torrada bìvere in domu de sa mamma. S’òmine nc’at passadu sa die cun is fillas chi tenent 4,6 e 9 annos, e a su telèfunu at nadu a sa mulleri de andare a nde-ddas pigare. Parit chi comente sa mulleri siat lòmpida a domu de s’òmine apant atacadu a certare e issu dd’at afracada e dd’at morta. Gente chi fiat passende at intèndiu is tzèrrios e at telefonadu a sa polìtzia. Sa polìtzia est lòmpida sùbitu ma s’ùnica cosa chi ant pòtzidu fàere fiat cussa de arrestare s’òmine chi apoi at cunfessadu chi timiat de nche pèrdere is fillas pro curpa de sa mulleri etotu chi, a parridade de issu, fiat provende a nche-ddas istesiare.
Cenàbara 3: Un’òmine de 31 annos est mortu in d-unu incidente istradale in Carbònia. Faci a is 21:00 s’òmine at pèrdiu su controllu de su scooter chi fiat guidende in s’ingruxeri chi collegat arruga Dalmazia cun s’uspidale Sirai, nc’est arrutu e nc’at isbàtidu sa conca in terra. Mancari non fessit currende meda e is sucursos siant lòmpidos a lestru (su logu est a pagu tretu dae s’ùspidale) is lesiones fiant tropu graves e duncas no at fatu a fàere nudda pro ddu sarvare.
Sàbudu 4: sunt giai 3000 is chi ant pigadu parte a sa corteu pro regordare Federica Madau, sa mamma de 31 annos morta a istocadas dae su maridu. Su corteu est partidu dae Pratza Sella cun d-unu istriscione in ue ddoi fiat iscritu “L’amore non ammette violenza” est passadu in is arrugas de su centru istòricu, est arribadu a su palàssiu comunale e apoi est torradu a Pratza Sella in ue cun is notas de “The Sound of Silence” is citadinos, totus mudos, ant regordadu Federica.